1 Piyɛr 4 - Dɔnɔn kə̂ Siki: Tar kə̂ aw arə təbbə

Maji ta mbətə nɛ̂n-ddaje kə̂ ləw

¹ Kristə oo ndoo da-rɔɛ̂ tə̂. Yeenn a, sese kara maji karə kəjə ləse to tokə baann tɔ. Mba dəw kə̂ oo ndoo da-rɔɛ̂ tə̂, to dəw kə̂ ɔru rɔɛ̂ majang tə̂ kə ddang ngaa.

² Yeenn bba karə kəsə ndɔje kə̂ n̂-nayn nɛ̂n dɔ nangə tə̂ nəənn kə da-rɔɛ̂ bbay le, n̂-nja kə ddəw kə̂ mə Lubba ndiki, bbo ddəw bboje tə̂ kə̂ da-rɔ tə̂ ang ngaa.

³ Mba ləw, unnje kar ləse mba dda nɛ̂n nɛ̂nje kə̂ dəwje kə̂ gərəje Lubba ang ndikije. Aw ddaje kaya, aw ddaje bbo nɛ̂nje kə̂ maji ang, aw ddaje bbərə lə koto, aw mbɔnje naan aw usaje, aw ayje arəje uta dɔse ngaâ aw poloje kɔrje aw ddaje nɛ̂n nɛ̂nje kə̂ asə koo kə kəm ang.

⁴ A bbasinɛn, dəwjeenn le oose a, dɔde ayn, mba aw aynje ngɔru nɛ̂n-kayaje kə de ang ngaa, mba yeenn bba daw tajijese.

⁵ A dâ kɔru gəl nɛ̂n-ddaje ləde le nɔn Lubba tə̂ kə̂ to ngɔsi mba gangə sariya dɔ dəwje tə̂ kə̂ naynje kəm baa ddəm dəwje kə̂ oyje ddəm.

⁶ Mba yeenn bba, dəwje kə̂ oyje kara dila mbər Tar kə̂ Maji darəde. Baann bba karə dede kə̂ n̂-gangə sariya dɔde tə̂ mba kula-ddade tokə kəsə dəwje tɔyn le, disije tokə ye kə̂ Lubba ndiki, ddəw tə̂ lə Ndil-mə-nda.

Kuwa nuju lə njê-mə-kunnje

⁷ Nɛ̂nje tɔyn naynje ngɔsi baa ta kɔsu kɔyn ngaa. Yeenn a, maji karə ə-gərəje dɔ jise, arəje kəmse kətərə ta ə-dujuje Lubba.

⁸ Dɔngɔr nɛ̂n, arəje ndiki naan ləse to kə lo-toe, mba ndiki ɔnn dɔ majangje nya.

⁹ Maji karə ə-taaje naan kə rɔ naan tə̂, a əmje rɔse ang.

¹⁰ Sese kâra kâra tɔyn, Lubba arəse gusu dang dang. Yeenn a, maji karə umanje nɛ̂n naan. Baann bba â ddeeje to njê-ngəmje nɛ̂nje dang dang kə̂ maji kə̂ Lubba inya jise tə̂ ddəw mə-maji tə̂ laa.

¹¹ Dəw kə̂ gusu pa tar to rɔɛ̂ tə̂ a, maji karə tar lə Lubba â n̂-pa. Dəw kə̂ gusu dda kula karə dəwje to rɔɛ̂ tə̂ a, maji karə n̂-dda kula le kə singa kə̂ Lubba arɛ̂. Yeenn bba karə Lubba inga piti mə nɛ̂nje tə̂ tɔyn ddəw tə̂ lə Jeju-Kristə. Lubba kə̂ piti kə singa-mɔngu to laa kə ndɔ kə ndɔ. Amɛnn!

Maji karə njê-mə-kunnje ooje ndoo mba Kristə

¹² Ngakɔnʼmje kə̂ m-ndikise nya, nɛ̂n-nan kə̂ to horose tə̂ tokə lə puru kə̂ aw ɔn lo le, maji karə ooje to nɛ̂n kə̂ siki ang ta arəje dɔse ayn ang.

¹³ A maji karə ə-ddaje rɔ-nəəl, mba aw ooje ndoo kə Kristə, ta bbo ndɔ kə̂ ooje piti laa a, sese kara rɔse nəəlse nya.

¹⁴ Bbo dəwje tajise mba nja kə̂ aw njaje go Kristə tə̂ a, maji arəse, mba Ndil lə Lubba kə̂ to Ndil piti to dɔse tə̂.

¹⁵ Maji karə marə dəw kâra horose tə̂ oo ndoo mba dəw kə̂ n̂-tɔlɛ̂ ang, mba bboko ang, mba nɛ̂n-dda kə̂ maji ang ang, mba kula tɛɛ̂ tar tə̂ lə dəwje ang.

¹⁶ A bbo dəw oo ndoo mba ddee kə̂ n̂-ddee to dəw lə Kristə a, narə rɔ-kul ddɛɛ̂ ang. Maji karə nɔsu gaji Lubba mba ri Kristə kə̂ to dɔɛ̂ tə̂ le.

¹⁷ Kar gangə sariya asə ngaa. Sariya le a kunn-kute dɔ dəwje tə̂ lə Lubba. A bbo jeje â sariya le unn kute dɔje tə̂ a, njê kə̂ mbətəje Tar kə̂ Maji le, ləde a to tokə baânn wa?

¹⁸ Makəturu lə Lubba pa nan: «A bbo to ngəng ta kaji dəw kə̂ gatə gatə a, a to tokə baânn kə dəw kə̂ mbətə Lubba ddəm dəw kə̂ to nje-nɛ̂n-dda kə̂ maji ang ddəm wa?»

¹⁹ Yeenn a, maji karə dəwje kə̂ aw ooje ndoo mba nɛ̂n kə̂ Lubba ndiki kə̂ daw ddaje le inyaje rɔde mə ji Nje-dda nɛ̂nje tə̂ tɔyn, kə̂ asə karə dəw unda məɛ̂ dɔɛ̂ tə̂ ngaâ ta n̂-ddaje nɛ̂n kə̂ maji kə ndɔ tɔyn.