1 Piyɛr 2 - Dɔnɔn kə̂ Siki: Tar kə̂ aw arə təbbə

¹ Maji karə inyaje nɛ̂n-ddaje kə̂ maji ang tɔyn kə nɛ̂n-dda kə̂ kə gusu tɔyn. Maji karə tar kə̂ tase tə̂ to dang kə ye kə̂ məse tə̂ ang, ə-ddaje bbo nɛ̂n lə dəw ang ddəm ə-nanɛnje kə dəw ang ddəm.

² Maji karə ə-ddaje bbo tar lə Lubba tokə ngann əngutayje aw ddaje bbo kay mba kə̂ n̂-pole məɛ̂ ang. Yeenn bba â sangəje ddəwe tə̂ mba kinga nɛ̂n kaji,

³ mba makəturu lə Lubba pa nan: «Sese njaa ə-nanje ooje ngaâ ə-gərəje to Əbbə-dəwje maji.»

Njê-mə-kunnje toje to dəwje lə Lubba

⁴ Maji karə ə-ddeeje ngɔsi kə Əbbə-dəwje Jeju. N̂-to ər kə̂ to kəm baa kə̂ dəwje mbətəje, a Lubba mbərə ngaâ oo to nɛ̂n kə̂ ngəng nya kəmɛ̂ tə̂.

⁵ Sese njaa kara, ə-toje tokə lə ərje kə̂ naynje kəm baa tɔ, yeenn a, maji karə unnje rɔse kə̂ to ər le ə-ddaje nɛ̂n kəy lə Ndil-mə-nda. Baann bba a ddeeje to njê-poloje Lubba kə̂ dundade dang mba kula laa, ta kunn nɛ̂n-polo ddəw Ndil tə̂ karɛ̂, nɛ̂n-polo kə̂ maji kəmɛ̂ tə̂ ddəw tə̂ lə Jeju-Kristə.

⁶ Mba, Makəturu lə Lubba pa nan: «Ooje, m-mbərə ər kə̂ gatɛ̂ ngəng, mila tɔkə bbe tə̂ kə̂ Sinyɔ, to ər kə̂ to singa gɔl kəy kə̂ dungu nangə̂. Dəw kə̂ ar dɔɛ̂ tə̂ a, rɔ-kul a kɔru kəmɛ̂ ang.»

⁷ Yeenn a, ər le to nɛ̂n-piti ləse, sese kə̂ unnje məse arəje Lubba. A ənga njê kə̂ unnje məde ang le, ər kə̂ njê-kɔsuje kəy mbətəje le ddee to singa gɔl kəy kə̂ dungu nangə̂.

⁸ Makəturu le pa bbay nan: «To ər kə̂ dəwje aw tukaje gɔlde tə̂ ddəm tɔkə ər kə̂ aw dda arə dəwje aw tosoje ddəm.» Daw tukaje gɔlde tə̂, mba n̂-mbətəje ta koo məde tə̂ kə tar lə Lubba. Yeenn to nɛ̂n kə̂ Lubba gɔl mbade njaa.

⁹ A sese, ə-toje to dəwje kə̂ Lubba mbərəse, ə-toje to njê-poloje lə tɔkə mbay. Ə-toje to gəl-dəwje kə̂ majije tɔyn, dəwje kə̂ Lubba uka dɔse ta karə ilaje mbər nɛ̂nje kə̂ maji nya kə̂ n̂-dda, ne kə̂ n̂-bbarse narə inje lo ndul tə̂ ə-teeje lo-karɛ tə̂ kə̂ dum dɔ dəwje le.

¹⁰ Ləw, ə-toje to dəwje lə Lubba ang, a bbasinɛn, ə-toje to dəwje lə Lubba ngaa. Ləw, Lubba oo kəm-to-ndoo ləse ang, a bbasinɛn, Lubba oo kəm-to-ndoo ləse ngaa.

Maji karə n-njaje to dəwje lə Lubba njaa

¹¹ See ngakɔnʼmje kə̂ m-ndikise nya, ə-toje to njê-mbaje ddəm dəwje kə̂ aw ndayje to nday dɔ nangə tə̂ nəənn ddəm. Mba yeenn bba, m-ndəjəse karə ə-ngəmje rɔse ddəw bboje tə̂ kə̂ da-rɔ tə̂ kə̂ aw ddaje ddɔ kə se.

¹² Arəje pa-nja ləse to kə majɛ̂ horo dəwje tə̂ kə̂ gərəje Lubba ang. Yeenn bba karə, bbo daw dundaje tar dɔse tə̂ baa mba marə nɛ̂n a, dâ kooje kula-ddase kə̂ maji ngaâ dâ kɔsuje nɛ̂n gaji Lubba ndɔ tə̂ kə̂ nâ tee dɔde tə̂.

¹³ Maji karə ooje ta njê-kɔn-bbeje tɔyn mba tar lə Əbbə-dəwje, ooje ta tɔkə mbay kə̂ ɔn dɔ kəsə mbayje tɔyn.

¹⁴ Ooje ta ngann mbayje kə̂ nulade karə gangəje sariya dɔ dəwje tə̂ kə̂ ddaje nɛ̂n kə̂ maji ang ddəm karə n̂-pitije dəwje kə̂ ddaje maji ddəm.

¹⁵ Mba nɛ̂n kə̂ Lubba ndiki â to karə ə-ddaje maji bba karə dəwje kə̂ dɔde goto ngaâ gərəje nɛ̂n ang, ooje tar ta pa ang.

¹⁶ Maji karə ə-ddaje nɛ̂n tokə dəwje kə̂ teeje kɔ bbərə tə̂ mban, a maji karə tee kə̂ ə-teeje kɔ bbərə tə̂ le təl to marə nɛ̂n kə̂ ta kɔnn nɛ̂n dɔ majang ang. Maji karə ə-ddaje nɛ̂n tokə bbərəje lə Lubba ngaa.

¹⁷ Maji karə ə-walje dəwje tɔyn, ə-ndikije ngakɔnse, ə-bbəəlje Lubba, ə-walje tɔkə mbay.

Maji ta koo ndoo tokə Kristə

¹⁸ See bbərəje, maji karə ə-bbəəlje əbbəsese nya ta ooje tade. Njê kə̂ maji ngaâ wulje pee kə karəde baa bba ta ə-bbəəljede ta ooje tade ang, njê kə̂ məde kətərə tɔ.

¹⁹ Mba bbo aw ooje ndoo dɔ naji tə̂ ləse ngaâ aw tɔje wurse mba Lubba a, yeenn to nɛ̂n kə̂ maji kəm Lubba tə̂.

²⁰ Bbo dəw aw oo ndoo mba majang kə̂ n̂-dda ngaâ naw tɔ wure a, piti kə̂ baânn â nâ kinga goe tə̂ wa? A bbo ə-ddaje maji bba daw dula kəmse ndoo tə̂ a, Lubba oo nɛ̂ɛnn kəmɛ̂ tə̂ to nɛ̂n kə̂ maji.

²¹ Nɛ̂ɛnn njaa Lubba bbarse mbɛɛ̂, mba Kristə njaa kara oo ndoo mba tar ləse. N̂-dda baann to nɛ̂n-kɔju-marɛ̂ mba tɔju nɛ̂n se ddəw.

²² Kristə dda majang ang, nərə ngəm ndɔ kâra ang.

²³ Dəwje tajɛ̂je, a nila tə̂ ang. Dula kəmɛ̂ ndoo tə̂, a n̂-pa tar dingaw ang, ninya rɔɛ̂ tɔyn mə ji Lubba tə̂ kə̂ aw gangə sariya kə̂ gatə gatə.

²⁴ Noto majangje ləje dɔɛ̂ tə̂ dɔ kakə-dəsə tə̂ mba karə jeje kə̂ jɔruje rɔje majang tə̂, ddəw koy tə̂ kə̂ joyje saa mban le jisije kəm baa mba dda nɛ̂n kə̂ gatə gatə. Ddəw doje tə̂ kə̂ ninga, najije rɔ-toje tə̂ ləje.

²⁵ Mba ləw ə-toje tokə lə batəje kə̂ aw njaje kə nangə̂ baa. A bbasinɛn, ə-turuje rɔse kə rɔ nje-ngəm nɛ̂n-kuulje tə̂, ne kə̂ n̂-to nje-ngəm kəwn ləse le.