1 Piyɛr 1 - Dɔnɔn kə̂ Siki: Tar kə̂ aw arə təbbə

Tar lapiya lə Piyɛr

¹ Əman Piyɛr, nje-kaw-kula lə Jeju-Kristə, m-dda makəturu nəənn mula nɛ̂n marə dəwje kə̂ Lubba mbərəde, kə̂ sarɛnje naan ngaâ isije dang dang to njê-mbaje, nangə tə̂ kə̂ Pɔn, nangə tə̂ kə̂ Galasi, nangə tə̂ kə̂ Kapados, nangə tə̂ kə̂ Aji kə nangə tə̂ kə̂ Bitini.

² Lubba kə̂ Bɔ mbərəse undase dang, ddəw kâra baa kə nɛ̂n kə̂ n̂-gɔl tokə kete, ddəw tə̂ lə Ndil-mə-nda karə ooje ta Jeju-Kristə ngaâ karə məse tokose arə nɛ̂n-yərəw ɔruse ang. Maji karə Lubba dda kə se mə-maji nya ddəm narə məse wul nya ddəm.

Jaw jundaje məje ta kinga təbbə kə̂ to kə ndɔ kə ndɔ

³ Maji karə jɔsuje gaji Lubba kə̂ to Bɔ Əbbəjeje Jeju-Kristə, mba maji kə̂ n̂-dda kə je bo nya ngaâ n̂-dda narə dujuje tokə siki, ddəw ndol tə̂ kə̂ n̂-ndol Jeju-Kristə kə̂ oy le. Baann bba karə jundaje məje kə dɔ nɛ̂n tə̂ dəw a kisi nɛ̂n kə təbbə

⁴ ta kinga nɛ̂nje kə̂ Lubba ngəm mba dəwje laa. To nɛ̂nje kə̂ a tujuje ang ddəm nɛ̂n-yərəw a kɔru ang ddəm ndoko ləde a goto ang ddəm. Lubba ngəm nɛ̂nje le arəse darâ,

⁵ sese kə̂ naw ngəmse ddəw singa-mɔngu tə̂ laa mba mə-kunn ləse karə ingaje kaji nəənn le. Ddutu ndɔje tə̂ a, nâ tɔju kaji kə̂ najise le kə ddaka karə dəwje tɔyn ooje.

⁶ Mba yeenn bba, le to tar ləse ta karə ooje gar ndooje dang dang bbasinɛn nəənn mba marə gɔju kar njaa kara aw isije kə rɔ-nəəl.

⁷ Ndoo kə̂ aw ooje le to mba nan nɛ̂n mə-kunn ləse koo, tokə andə kə̂ to nɛ̂n kə̂ aw tuju, a n̂-nan kə puru doo. Baann bba karə mə-kunn ləse kə̂ to nɛ̂n kə̂ ngəng uta andə le a dda karə Lubba ɔsu gajise ddəm pitise ddəm walse ddəm ndɔ tə̂ kə̂ Jeju-Kristə a kunda nɛ̂n lo tee kəm dəwje tə̂.

⁸ Ooje Jeju ang njaa, a ə-ndikeje. Bbasinɛn nəənn ooeje ang bbay njaa, a unnje məse arɛ̂je ngaâ aw ddaje rɔ-nəəl arə uta dɔɛ̂, rɔ-nəəl kə̂ asə pa ang.

⁹ Rɔse nəəlse mba ingaje kaji to kuka ləse mba məse kə̂ unnje le.

¹⁰ Njê-kilaje mbər tar lə Lubba kə̂ ilaje mbər mə-maji kə̂ Lubba a ta dda kə se le uruje gəl kaji nəənn le nya ta gərə.

¹¹ Ndil lə Kristə kə̂ to məde tə̂ pa tar ndoo kə̂ Kristə a koo kə tar piti kə̂ a ddee goe tə̂ arəde tokə kete. Mba yeenn bba, dunnje rɔde tɔyn ta gərə se kar kə̂ baânn wase ddi â a to bba nɛ̂nje kə̂ Ndil lə Kristə pa le a ddeeje wa?

¹² Lubba pa kə ddaka arə njê-kilaje mbər tar le to tarje le to mba dede njaa ang. Tarjeenn le toje mbase. Njê-kilaje mbər Tar kə̂ Maji â ilaje mbər tar nəənn le arəse bbasinɛn nəənn. N̂-paje tarɛ̂ darəse ddəw singa-mɔngu tə̂ lə Ndil-mə-nda kə̂ Lubba ulɛ̂ arə nin darâ n̂-ddee le. Anjəje kara ndikije ta gərə tar nəənn le tɔ.

Maji karə pa-nja ləse maji tɔyn

¹³ Mba yeenn le bba, maji karə kəjə dda kula dɔrɔ â to dɔse tə̂, arje dɔ gɔlse tə̂ ta undaje məse dɔ nɛ̂n tə̂ kə̂ maji kə̂ Lubba a karəse ndɔ tə̂ kə̂ Jeju-Kristə a kunda lo tee kəm dəwje tə̂.

¹⁴ Maji karə ə-ddaje nɛ̂n tokə lə ngannje kə̂ ooje tar. Bbo ə-ddaje nɛ̂n ddəw bbo tə̂ kə̂ da-rɔse tə̂ tokə ye kə̂ kete ang ngaa, mba kete le ə-nayn ə-gərəje nɛ̂n ang bbay.

¹⁵ Lubba kə̂ bbarse le maji tɔyn. Yeenn a, sese njaa kara, maji karə ə-majije tɔyn mə pa-nja tə̂ ləse tɔyn tɔ.

¹⁶ Mba Lubba pa Makəturu tə̂ laa nan: «Maji karə ə-majije tɔyn. Mba əman, m-maji tɔyn.»

¹⁷ Lubba aw gangə sariya dɔ dəwje tə̂ asə kəm kula-ddaje ləde, a naw nɔru kəm dəw ang. A bbo mə dujuje tə̂ kə̂ aw dujuje Lubba le aw bbarɛ̂je to Bɔ a, maji karə ə-bbəəleje kar tə̂ kə̂ ə-naynje nɛ̂n dɔ nangə tə̂ nəənn.

¹⁸ Nɛ̂n-ddaje lə kaseseje kə̂ to nɛ̂nje kə̂ baa â unnje goe. A ə-gərəje kə majɛ̂ to, Lubba uka dɔse bba tee nɛ̂n kə̂ se mə nɛ̂nje tə̂ənn le kə ddang. Andə wase narɛ kə̂ toje to nɛ̂nje kə̂ aw tuju â nuka nɛ̂n dɔse le ang.

¹⁹ Məsə Kristə kə̂ ngəng nya â uka nɛ̂n dɔse. Kristə le to tokə ngonn batə kə̂ marə nɛ̂n tuju rɔɛ̂ tə̂ ang ddəm nɛ̂n-yərəw ɔrɛ̂ ang ddəm.

²⁰ Lubba mbəre kete bba dda duninya ngaâ tɔjɛ̂ kə ddaka ddutu ndɔ tə̂ mba maji ləse.

²¹ Ddəw tə̂ laa â unnje məse arəje Lubba kə̂ noy a, ndole ngaâ arɛ̂ piti, mba karə mə-kunn ləse kə mə-kunda ləse to kə dɔ Lubba tə̂.

Maji karə ngann lə Lubba ndikije naan

²² Maji karə ə-ddaje nɛ̂n ddəw tar tə̂ kə̂ tɔkɔrɔ, arəje nɛ̂n-yərəw ɔruse ang mba ndiki nɛ̂n ngakɔnse tokə tɔkɔrɔ tə̂ njaa. Yeenn a, maji karə ə-ndikije naan kə mə-kâra kə ndɔ tɔyn.

²³ Sese le dujuse tokə siki, ddəw tar tə̂ lə Lubba kə̂ a nayn kəm baa kə ndɔ kə ndɔ. Tar le to tokə kandə-ko kə̂ a tuju ndɔ kâra ang. A nayn nyɔm kə ləw.

²⁴ Mba Makəturu lə Lubba pa nan: «Dəwje tɔyn toje tokə lə mu. Nɛ̂n kə̂ daw dingaje nɛ̂n piti to tokə lə putu mu le. Mu aw tutu, pute aw gayn,

²⁵ a tar lə Əbbə-dəwje to kə ndɔ kə ndɔ.» Tar le to Tar kə̂ Maji kə̂ dila mbəre darəse le.