1 Jan 5 - Dɔnɔn kə̂ Siki: Tar kə̂ aw arə təbbə

Tar tətə duninya kə ddɔ

¹ Bbo dəw ndiki tə̂ məɛ̂ tə̂ nan Jeju to Kristə a, dəw le to Ngonn lə Lubba. Dəw kə̂ ndiki Lubba kə̂ Nje-kuju Jeju le ndiki Jeju kə̂ Lubba uje le tɔ.

² Ddəw kə̂ ja gərəje nɛ̂n to n-ndikije ngann lə Lubba â nəənn: n-ndikije Lubba ngaâ n-ddaje nɛ̂n kə turu nduje laa.

³ Nɛ̂n kə̂ daw bbar nan ndiki Lubba to n-ngəm nduje laa. Nduje laa to nɛ̂n-koto kə̂ ɔɔy ang.

⁴ Mba dəw kə̂ Lubba uje tətə duninya nəənn kə ddɔ. A mə-kunn ləje â to nɛ̂n kə̂ ja tətə nɛ̂n duninya nəənn kə ddɔ.

⁵ Nân bba tətə duninya nəənn kə ddɔ wa? Dəw kə̂ ndiki tə̂ məɛ̂ tə̂ nan Jeju to Ngonn lə Lubba â tətə ddɔ le.

Tar-naji kə̂ dɔ Jeju-Kristə tə̂

⁶ Ne Jeju-Kristə, kə̂ n̂-ddee ddəw maann tə̂ kə ddəw məsə tə̂. N̂-ddee kə maann kâra baa ang, n̂-ddee kə maann ddəm kə məsə ddəm. Tar-naji kə̂ Ndil pa dɔ nɛ̂n tə̂ənn to tar kə̂ tɔkɔrɔ, mba n̂-to Ndil tar kə̂ tɔkɔrɔ.

⁷ Mba nɛ̂nje mota â paje tar-naji le.

⁸ Nɛ̂nje le to Ndil, maann kə məsə. N̂-paje tar-naji kə̂ kâra baa njaa.

⁹ Bbo jaw jooje məje tə̂ kə tar-naji kə̂ dəwje aw paje a, tar-naji lə Lubba ngəng nya uta. Tar-naji lə Lubba le to tar-naji kə̂ n̂-pa dɔ Ngonnɛ̂ tə̂.

¹⁰ Dəw kə̂ unn məɛ̂ arə Ngonn lə Lubba, tar-naji le to məɛ̂ tə̂. Dəw kə̂ unn məɛ̂ arə Lubba ang, dəw le dda arə Lubba ddee to nje-ngəm, mba nunda mə-kunn laa dɔ tar-naji tə̂ kə̂ Lubba pa dɔ Ngonnɛ̂ tə̂ le ang.

¹¹ Tar-naji le tokə be: Lubba arəje təbbə kə̂ to kə ndɔ kə ndɔ ngaâ təbbə le to rɔ Ngonnɛ̂ tə̂.

¹² Dəw kə̂ ee kə Ngonn le a, ee kə təbbə. Dəw kə̂ ee kə Ngonn le ang a, ee kə təbbə ang tɔ.

¹³ M-dda nɛ̂njeenn makəturu tə̂ marəse karə ə-gərəje to eeje kə təbbə kə̂ to kə ndɔ kə ndɔ, sese kə̂ ooje məse tə̂ kə ri Ngonn lə Lubba le.

¹⁴ Nɛ̂n kə̂ dda arə məje oso pɔn dɔɛ̂ tə̂ le â nəənn: Bbo n-dujuje marə nɛ̂n ji Lubba tə̂ ddəw mə-ndiki tə̂ laa a, nâ koo.

¹⁵ Bbo n-gərəje məje tə̂ to naw noo tar ləje a, nɛ̂n tɔyn kə̂ n-dujuje jia tə̂, n-gərəje to jingaje nɛ̂n le watə mban.

¹⁶ Bbo dəw oo ngokɔɛ̂n lo dda majang tə̂ kə̂ a kaw saa karə noy ang a, maji karə dəw le duju Lubba, a Lubba a karə təbbə ngokɔɛ̂n le, tokə majang laa le to majang kə̂ a kaw saa karə ninga yo ang. Majang kə̂ aw uju yo to. M-duju karə ə-dujuje Lubba mba majang kə̂ baann ang.

¹⁷ Nɛ̂n-ddaje tɔyn kə̂ to kə dɔgɔlɛ̂ ang to majang, majang tɔyn njaa aw uju yo ang.

¹⁸ Jeje, n-gərəje to dəwje kə̂ Lubba ujude ddaje majang ang ngaa. Jeju kə̂ Lubba uje ngəm dəwje le arə Nje-mə-majang inga ddəw ləde ang.

¹⁹ Jeje, n-gərəje to n-toje to dəwje lə Lubba, a duninya nəənn tɔyn to mə ji Nje-mə-majang tə̂.

²⁰ Jeje, n-gərəje to Ngonn lə Lubba ddee ngaâ arəje kəm-karɛ karə n-gərəje Lubba kə̂ tɔkɔrɔ. Ngaâ n-ddaje mə-kâra kə Lubba kə̂ tɔkɔrɔ ddəw tə̂ lə Ngonnɛ̂ Jeju-Kristə. Ne â n̂-to Lubba kə̂ tɔkɔrɔ, ne â n̂-to təbbə kə̂ to kə ndɔ kə ndɔ.

²¹ Ngannje, aaje rɔse ddəw tə̂ lə kɔrje!