1 Jan 4 - Dɔnɔn kə̂ Siki: Tar kə̂ aw arə təbbə

Ddəw gərə Ndil lə Lubba kə ndil lə nje-baan lə Kristə

¹ Ngakɔnʼmje kə̂ m-dikise, bbo dəw pa nan Ndil-mə-nda to rɔɛ̂ tə̂ a, ooje məse tə̂ kə tar laa le kə ngɔru ang. Maji karə ə-nanje dəw le ooje se ndil kə̂ to məɛ̂ tə̂ to Ndil lə Lubba njaa wa bba. Mba njê-kilaje mbər tar kə̂ tɔkɔrɔ ang banyaje dɔ nangə tə̂ nya.

² Ddəw kə̂ â gərəje nɛ̂n Ndil lə Lubba tokə be: Dəw kə̂ pa kə tɛɛ̂ nan Jeju-Kristə unn da-rɔ dəw bba ddee a, Ndil kə̂ in rɔ Lubba tə̂ to məɛ̂ tə̂.

³ Dəw kə̂ mayn nan Jeju unn da-rɔ dəw ang, ndil kə̂ in rɔ Lubba tə̂ ang â to məɛ̂ tə̂. Ndil kə̂ to məɛ̂ tə̂ le to ndil lə nje-baan lə Kristə kə̂ ooje tar laa nan nâ ddee le, a bbasinɛn nee dɔ nangə tə̂ ngaa.

⁴ See ngannje kə̂ ngaji kə̂ ə-toje to ənga Lubba, aalje dɔ njê-kilaje mbər tar kə̂ toje to njê-ngəmjeenn le mban, mba Ndil kə̂ to məse tə̂ ubba singa nya uta ndil kə̂ duninya tə̂ nəənn.

⁵ Dede, n̂-toje to dəwje kə̂ dɔ nangə tə̂ nəənn ngaâ n̂-paje tar tokə dəwje kə̂ nangə̂ nəənn, mba yeenn le bba dəwje kə̂ nangə̂ nəənn ooje tar ləde.

⁶ A Jeje, n-toje to ənga Lubba. Dəw kə̂ gərə Lubba aw oo tar ləje. Dəw kə̂ to ənga Lubba ang a koo tar ləje ang. Ddəw nɛ̂n tə̂ kə̂ baann bba ja gərəje nɛ̂n Ndil tar kə̂ tɔkɔrɔ kə ndil tar kə̂ tɔkɔrɔ ang.

Lubba to ndiki

⁷ Ngakɔnʼmje kə̂ m-ndikise, maji karə n-ndikije naan horoje tə̂, mba ndiki in rɔ Lubba tə̂. Dəw kə̂ ndiki nje-marɛ̂ to dəw kə̂ Lubba uje ngaâ n̂-gərə Lubba.

⁸ Dəw kə̂ ndiki nje-marɛ̂ ang to dəw kə̂ nayn gərə Lubba ang bbay, mba Lubba to ndiki.

⁹ Ooje ddəw kə̂ Lubba tɔju nɛ̂n ndiki laa kə ddaka horoje tə̂: Lubba ula Ngonn-kâra laa dɔ nangə tə̂ mba karə jisije kəm baa ddəw tə̂ laa.

¹⁰ Tar ndiki le tokə be: Jeje â n-ndikije Lubba ang, ne â n̂-ndikije ngaâ nula Ngonnɛ̂ narə n̂-ddee to nɛ̂n-polo ta kɔru nɛ̂n tar majangje ləje dɔje tə̂.

¹¹ Ngakɔnʼmje kə̂ m-ndikise, bbo Lubba ndikije baann a, maji karə jeje kara n-ndikije naan horoje tə̂.

¹² Dəw oo Lubba ndɔ kâra ang. Bbo n-ndikije naan horoje tə̂ a, Lubba dda kə je mə-kâra ngaâ ndiki laa to məje tə̂ kə majɛ̂.

¹³ Ddəw kə̂ n-gərəje nɛ̂n to n-naynje ddəw mə-kâra tə̂ kə Lubba ngaâ ne kâra n̂-nayn ddəw mə-kâra tə̂ kə je to tokə be: Narəje Ndil laa.

¹⁴ Jooe kə kəmje ngaâ n-pa tar-naji laa jarə dəwje nan Lubba kə̂ Bɔ ula Ngonnɛ̂ to Nje-kaji-dəwje kə̂ duninya tə̂.

¹⁵ Dəw kə̂ pa kə tɛɛ̂ nan Jeju to Ngonn lə Lubba, Lubba nayn ddəw mə-kâra tə̂ saa ddəm ne kâra n̂-nayn ddəw mə-kâra tə̂ kə Lubba ddəm.

¹⁶ Jeje, n-gərəje ndiki kə̂ Lubba ndikije ngaâ jooje məje tə̂ kə ndiki le. Lubba to ndiki. Dəw kə̂ nayn ddəw ndiki tə̂, nayn ddəw mə-kâra tə̂ kə Lubba ddəm Lubba nayn ddəw mə-kâra tə̂ saa ddəm.

¹⁷ Ddəw nɛ̂n tə̂ kə̂ be â ja gərəje to ndiki laa to məje tə̂ kə majɛ̂. Baann bba məje a koso pɔn ndɔ gangə sariya tə̂, mba kisi ləje dɔ nangə tə̂ to ddəw kâra baa kə ənga Jeju.

¹⁸ Bbəəl goto mə dəw tə̂ kə̂ ndiki to məɛ̂ tə̂. A ndiki kə̂ tɔkɔrɔ tubba bbəəl mə dəw tə̂. Bbo bbəəl dda dəw a, tɔju to sariya to dɔɛ̂ tə̂. Dəw kə̂ bbəəl to məɛ̂ tə̂, ndiki laa to tɔyn ang.

¹⁹ Jeje, ndiki to məje tə̂, mba Lubba ndikije dɔngɔr.

²⁰ Bbo marə dəw pa nan: «M-ndiki Lubba», a n̂-mbətə ngokɔɛ̂n a, n̂-to nje-ngəm. Bbo dəw mbətə ngokɔɛ̂n kə̂ naw nooe a, nâ kasə ndiki Lubba kə̂ nooe ang tokə baann wa?

²¹ Ndu kə̂ Kristə arəje â nəənn: Maji karə dəw kə̂ ndiki Lubba ndiki ngokɔɛ̂n tɔ.