1 Jan 3 - Dɔnɔn kə̂ Siki: Tar kə̂ aw arə təbbə

N-to ngannje lə Lubba

¹ Ooje, Bɔy ndikije nya. Ddəw ndiki tə̂ le bba daw bbar nɛ̂n je to ngannje lə Lubba. N-to ngannje lə Lubba le njaa. Yeenn bba, dəwje kə̂ duninya tə̂ nəənn gərəjeje ang, mba dəwje le gərəje Lubba ang.

² Ngakɔnʼmje kə̂ m-ndikise, kə̂ bbasinɛn nəənn n-toje to ngann lə Lubba ngaa. Ndɔ kə̂ bara a, ja toje tokə baânn wa? Yeenn â n-gərəje ang bbay. A n-gərəje to ndɔ kə̂ Jeju-Kristə ddee a, ja toje tokə ne, mba ja kooeje se n̂-to tokə baânn wa!

³ Dəw kə̂ unda məɛ̂ dɔ Kristə tə̂, toko nɛ̂n-yərəw laa kə ddang tokə Kristə kə̂ nɛ̂n-yərəw kâra ɔrɛ̂ ang le.

⁴ Dəw kə̂ aw dda majang to nje-mbətə ndu Lubba, mba majang to mbətə ndu.

⁵ A ə-gərəje to Jeju-Kristə ddee mba kɔru majangje lə dəwje, majang kâra to rɔɛ̂ tə̂ ang.

⁶ Dəw kə̂ nayn ddəw mə-kâra tə̂ saa a, maji karə n̂-dda majang ang ngaa. Dəw kə̂ nayn aw dda majang to dəw kə̂ oo Kristə ang ddəm gərə Kristə ang ddəm.

⁷ Ngannje, arəje dəw ərəse ang. Dəw kə̂ dda kula kə̂ gatə gatə to gatə gatə tokə Jeju-Kristə to gatə gatə le.

⁸ Dəw kə̂ nayn ddəw majang tə̂ to dəw lə Əsu, mba Əsu to nje-nɛ̂n-dda kə̂ maji ang kunn-kutu nɛ̂nje tə̂ njaa. Mba yeenn bba, Ngonn lə Lubba ddee ta tuju kula-dda lə Əsu.

⁹ Dəw kə̂ Lubba uje dda majang ang ngaa, mba tar lə Lubba isi məɛ̂ tə̂ tokə kandə-ko arə nâ kasə ta dda majang ang ngaa, mba n̂-to dəw kə̂ Lubba uje.

¹⁰ Nɛ̂n kə̂ kayn horo ngann lə Lubba kə ngann lə Əsu â nəənn: Dəw kə̂ to nje-nɛ̂n-dda kə̂ gatə gatə ang wase dəw kə̂ mbətə ngokɔɛ̂n to dəw lə Lubba ang.

Maji karə n-ndikije naan

¹¹ Tar kə̂ ooje kunn-kute tə̂ njaa nan: Maji karə n-ndikije naan horo naan tə̂.

¹² Maji karə n-ddaje nɛ̂n tokə lə Kayn ang. Kayn le to dəw lə Nje-mə-majang arə nuja gɔsu ngokɔɛ̂n. Nuja gɔsɛ̂ mba ddi wa? Mba kula-ddaje laa maji ang, a kula-ddaje lə ngokɔɛ̂n to gatə gatə.

¹³ Ngakɔnʼmje, bbo dəwje kə̂ nangə nəənn mbətəse a, arəje dɔse ayn ang.

¹⁴ Jeje n-ndikije ngakɔnje, mba yeenn â n-gərəje to n-teeje ta yo tə̂ ngaâ jingaje təbbə mban. Dəw kə̂ ndiki ngokɔɛ̂n ang nayn mə yo tə̂ bbay.

¹⁵ Dəw kə̂ mbətə ngokɔɛ̂n to nje-tɔl dəw, a ə-gərəje to nje-tɔl dəw ee kə təbbə kə̂ to kə ndɔ kə ndɔ ang.

¹⁶ Nɛ̂n kə̂ tɔju ndiki le â nəənn: Jeju unn təbbə laa ila kɔrɔ̂ mbaje. Baann a, maji karə jeje kara jarəje təbbə ləje mba ngakɔnje tɔ.

¹⁷ Bbo dəw inga nɛ̂nje kə̂ dɔ nangə tə̂ nəənn ngaâ gərə to nɛ̂n du ngokɔɛ̂n, a numɛ̂n ang a, dəw le a pa nan n̂-ndiki Lubba tokə baânn wa?

¹⁸ Ngannje, maji karə n-ndikije naan kə tar kə̂ taje tə̂ baa ang. Maji karə n-ndikije naan ddəw dda marə nɛ̂n tə̂ kə ddəw ndiki tə̂ kə̂ tɔkɔrɔ.

¹⁹ Ddəw tə̂ kə̂ baânn bba ja gərəje to n-toje to ənga tar kə̂ tɔkɔrɔ ngaâ kəjə ləje a to ddekeke nɔn Lubba tə̂.

²⁰ Mba bbo kəjə ləje unda tar dɔje tə̂ a, Lubba bo uta kəjə ləje ngaâ n̂-gərə nɛ̂n tɔyn.

²¹ Ngakɔnʼmje kə̂ m-ndikise nya, bbo kəjə ləje unda tar dɔje tə̂ ang a, məje a koso pɔn nɔn Lubba tə̂.

²² Nɛ̂n tɔyn kə̂ n-dujuje a, ja kingaje jia tə̂, mba jaw ngəmje ndu laa ngaâ jaw ddaje nɛ̂n kə̂ məɛ̂ ndiki.

²³ A ndu laa kə̂ narəje tokə be: Maji karə jooje məje tə̂ kə ri Ngonnɛ̂ Jeju-Kristə ngaâ n-ndikije naan horo naan tə̂ ddəw kâra baa kə ndu kə Kristə unn arəje le.

²⁴ Dəw kə̂ ngəm ndu lə Lubba nayn ddəw mə-kâra tə̂ kə Lubba ngaâ Lubba nayn ddəw mə-kâra tə̂ saa. Nɛ̂n kə̂ tɔju to Lubba dda mə-kâra kə je to Ndil-mə-nda kə̂ narəje.