1 Jan 2 - Dɔnɔn kə̂ Siki: Tar kə̂ aw arə təbbə

Jeju to Nje-taa dɔ dəwje

¹ Ngannəm, m-pa tar nəənn makəturu tə̂ marəse mba karə ə-ddaje majang ang. A bbo marə dəw dda majang a, jee kə Nje-taa dɔ dəwje mbɔr Bɔy tə̂. Ria nan Jeju-Kristə kə̂ to gatə gatə.

² Nunn rɔɛ̂ to nɛ̂n-polo mba toko nɛ̂n majang ləje. N̂-to nɛ̂n-polo mbaje kə karəje baa ang. N̂-to nɛ̂n-polo mba dəwje tɔyn kə̂ dɔ nangə tə̂ nəənn.

Ndu kə̂ siki

³ Bbo n-ngəmje ndu lə Lubba a, yeenn tɔju to n-gərəje Lubba.

⁴ Bbo marə dəw pa nan n̂-gərə Lubba, a n̂-ngəm nduje laa ang a, n̂-to nje-ngəm ngaâ tar kə̂ tɔkɔrɔ to məɛ̂ tə̂ ang.

⁵ Dəw kə̂ ngəm tar lə Lubba məɛ̂ tə̂, ndiki lə Lubba to məɛ̂ tə̂ tɔkɔrɔ. Yeenn tɔju to n-ddaje saa mə-kâra.

⁶ Dəw kə̂ pa nan n̂-dda mə-kâra kə Lubba a, maji karə dəw le nja tokə Jeju nja.

⁷ Ngakɔnʼmje kə̂ m-ndikise nya, ndu kə̂ m-dda makəturu tə̂ marəse nəənn to ndu kə̂ siki ang. To ndu kə̂ darəse ləw baa. Ndu kə̂ ləw le to tar kə̂ ooje kete mban.

⁸ Ndu kə̂ ləw le to ndu kə̂ siki tɔ. Ndu kə̂ siki le ddee tɔkɔrɔ ddəw tə̂ lə Jeju-Kristə ddəm ddəw pa-nja tə̂ ləse ddəm. Mba lo ndul aw nday, a lo-karɛ kə̂ tɔkɔrɔ aw ndoko ngaa.

⁹ Dəw kə̂ pa nan nee lo-karɛ tə̂ ngaâ naw mbətə ngokɔɛ̂n a, n̂-nayn lo ndul tə̂ bbay.

¹⁰ Dəw kə̂ ndiki ngokɔɛ̂n to nje-nja lo-karɛ tə̂. Nɛ̂n kə̂ a dda karə dəw oso mə majang tə̂ to rɔɛ̂ tə̂ ang.

¹¹ Dəw kə̂ mbətə ngokɔɛ̂n nayn lo ndul tə̂ bbay. Naw nja lo ndul tə̂ ngaâ n̂-gərə lo kə̂ naw naw tə̂ ang, mba lo ndul ɔku kəmɛ̂.

Bbo nɛ̂nje kə̂ dɔ nangə tə̂

¹² Ngannəm, m-dda makəturu nəənn marəse, mba Lubba ɔru tar majang ləse dɔse tə̂ mba ri Jeju.

¹³ Bɔydede, m-dda makəturu nəənn marəse, mba ə-gərəje ne kə̂ n̂-to kunn-kutu nɛ̂n tə̂ njaa le. Basanje, m-dda makəturu nəənn marəse mba utaje Nje-mə-majang kə singa.

¹⁴ Ngannje, m-dda makəturu nəənn marəse, mba ə-gərəje Bɔ. Bɔydede, m-dda makəturu nəənn marəse, mba ə-gərəje nɛ̂n kə̂ n̂-to kunn-kutu nɛ̂n tə̂ njaa le. Basanje, m-dda makəturu nəənn marəse, mba ingaje singa ngaa, tar lə Lubba to məse tə̂ ngaâ utaje Nje-mə-majang kə singa.

¹⁵ Maji karə ə-ndikije nangə nəənn ang ddəm ə-ndikije nɛ̂n kə̂ dɔ nangə tə̂ nəənn ang ddəm. Bbo dəw ndiki nɛ̂n kə̂ nangə̂ nəənn a, n̂-ndiki Lubba kə̂ Bɔ ang.

¹⁶ Mba, nɛ̂nje tɔyn kə̂ nangə̂ nəənn kə̂ to: Bbo kə̂ da-rɔ tə̂, kunda kəm-nda kə koo-rɔ-bo mba nɛ̂n-kinga. Nɛ̂njeenn inje dɔ nangə tə̂ bbo inje rɔ Lubba kə̂ Bɔ tə̂ ang.

¹⁷ Nangə le aw nday kə bbo nɛ̂nje kə̂ nangə̂ tɔ. A dəw kə̂ dda nɛ̂n kə̂ mə Lubba ndiki a kisi kə ndɔ kə ndɔ.

Nje-baan lə Kristə

¹⁸ Ngannje kə̂ ngaji, ddutu ndɔ asə ngaa. Ooje tar kə̂ n̂-pa darəse nan, nje-baan lə Kristə aw ddee le mban. A bbasinɛn, njê-baanje lə Kristə tokə banya ddeeje ngaa. Yeenn tɔju to jeeje ddutu ndɔ tə̂ ngaa.

¹⁹ Dinje horoje tə̂ bba n̂-teeje, a n̂-toje to dəwje ləje ang. Bbo n̂-toje to dəwje ləje a, dâ naynje kə je. N̂-teeje horoje tə̂ kə̂ ddang karə tɔju kə ddaka to dede tɔyn n̂-toje to dəwje ləje ang.

²⁰ A sese, Ndil-mə-nda kə̂ Kristə arəse le isi məse tə̂ arə sese tɔyn ə-gərəje tar kə̂ tɔkɔrɔ.

²¹ Ə-gərəje tar kə̂ tɔkɔrɔ mban ngaâ ə-gərəje to ngəm in mə tar kə̂ tɔkɔrɔ tə̂ ang. Mba yeenn bba, m-dda makəturu nəənn marəse.

²² Nân bba to nje-ngəm wa? Nje-ngəm to dəw kə̂ mayn nan Jeju to Kristə ang. Dəw kə̂ baann le to nje-baan lə Kristə. N̂-mbətə Bɔ ddəm Ngonn ddəm.

²³ Dəw kə̂ mbətə Ngonn, mbətə Bɔ tɔ. Dəw kə̂ taa Ngonn kə rɔɛ̂ tə̂, taa Bɔ kə rɔɛ̂ tə̂ tɔ.

²⁴ A sese, maji karə tar kə̂ ooje kunn-kute tə̂ njaa nayn məse tə̂. Bbo tar kə̂ ooje kunn-kute tə̂ le nayn məse tə̂ a, yeenn pa nan ə-naynje ddəw mə-kâra tə̂ kə Ngonn ddəm kə Bɔ ddəm.

²⁵ Ooje, nɛ̂n kə̂ Kristə unn ndue ta karəje â to təbbə kə̂ to kə ndɔ kə ndɔ.

²⁶ M-dda makəturu nəənn marəse, mba pa nɛ̂n tar dɔ dəwje tə̂ kə̂ aw sangəje ddəw ta ddase karə ə-ndəəmje ddəw le.

²⁷ A sese, Ndil-mə-nda kə̂ Kristə arəse nayn kə se le, marə dəw kə̂ dang a tɔjuse nɛ̂n ang ngaa. Ndil-mə-nda kə̂ Kristə arəse le aw tɔjuse nɛ̂nje tɔyn. Naw tɔjuse tar kə̂ tɔkɔrɔ mba n̂-to Ndil tar kə̂ tɔkɔrɔ bbo nərə ngəm ang. Yeenn bba, maji karə ə-naynje ddəw mə-kâra tə̂ saa tokə Ndil-mə-nda tɔjuse.

²⁸ Baann a, ngannje kə̂ ngaji, maji karə ə-naynje ddəw mə-kâra tə̂ kə Kristə, mba karə ndɔ kə̂ n̂-ddee a, bbəəl ddaje ang ddəm karə ndɔ təl laa a, rɔ-kul uta dɔje ngaâ jarje ddəw əw saa ang ddəm.

²⁹ Bbo ə-gərəje to Kristə to gatə gatə a, maji karə ə-gərəje tɔ to, dəwje kə̂ ddaje nɛ̂n kə̂ gatə gatə toje to ngannje lə Lubba.