1 Jan 1 - Dɔnɔn kə̂ Siki: Tar kə̂ aw arə təbbə

Tar kə̂ arə təbbə dəwje

¹ Nɛ̂n kə̂ to kunn-kute tə̂ njaa, nɛ̂n kə̂ joo kə mbije, nɛ̂n kə̂ joo kə kəmje, nɛ̂n kə̂ n-təənn joo kə majɛ̂ ngaâ jɔru kə jije joo le, nɛ̂n le to Tar kə̂ aw arə təbbə dəwje.

² Mba təbbə le tɔju rɔɛ̂ kə ddaka ngaâ jooe. N-to njê-pa tar-naji lə təbbə le ngaâ jaw jila mbər tar təbbə kə̂ to kə ndɔ kə ndɔ le jarəse. Təbbə kə̂ to kə ndɔ kə ndɔ le to mbɔr Bɔ tə̂ ləw ngaâ n̂-tɔjɛ̂ kə ddaka narəje.

³ Nɛ̂n kə̂ joo kə kəmje ddəm kə mbije ddəm le, jaw pa jarəse tɔ, karə sese kara ə-ddaje mə-kâra kə je. Mə-kâra ləje to mə-kâra kə̂ to horoje tə̂ kə Bɔ ddəm to horoje tə̂ kə Ngonnɛ̂ Jeju-Kristə ddəm.

⁴ N-dda nɛ̂ɛnn makəturu tə̂ jarəse, mba karə rɔ-nəəl ləje to tɔyn.

Lubba to lo-karɛ

⁵ Tar kə̂ joo tɛɛ̂ tə̂ bba n-ndiki ta pa karəse tokə be: Lubba to lo-karɛ, lo ndul ngaji to rɔɛ̂ tə̂ ang.

⁶ Bbo n-pa nan jaw ddaje mə-kâra kə Lubba, bba n-təlje jaw njaje lo ndul tə̂ a, jaw jərəje ngəm ngaâ n-ddaje nɛ̂n kə̂ tɔkɔrɔ ang.

⁷ A, bbo n-njaje lo-karɛ tə̂, tokə ne njaa kə̂ nee lo-karɛ tə̂ le a, mə-kâra to horoje tə̂ kə ngamarjeje ngaâ məsə Ngonnɛ̂ Jeju toko majang ləje tɔyn.

⁸ Bbo n-paje nan n-ddaje majang ang a, jeje njaa jaw jərəje rɔje ngaâ tar kə̂ tɔkɔrɔ to məje tə̂ ang.

⁹ Bbo n-paje tar majang ləje kə ddaka a, Lubba le a kɔru tar majang ləje dɔje tə̂ ngaâ nâ toko kula-ddaje kə̂ maji ang tɔyn, mba naw turu ndue ang ddəm n̂-to gatə gatə ddəm.

¹⁰ Bbo n-paje nan n-ddaje majang ang a, jaw ddaje jarə Lubba təl to nje-ngəm ngaâ tar laa to məje tə̂ ang.