1 Timɔte 6 - Dɔnɔn kə̂ Siki: Tar kə̂ aw arə təbbə

Tar kə̂ dɔ bbərəje tə̂

¹ Maji karə bbərəje tɔyn ooje əbbədede to dəwje kə̂ asəje karə n̂-bbəəljede. Yeenn a dda karə dəwje a kasəje ta taji nɛ̂n-tɔju ləje ang ddəm ri Lubba ang ddəm.

² Bbərəje kə̂ əbbədede toje to njê-mə-kunnje, maji karə n̂-dabbəjede ang, a maji karə n̂-ddaje kula darəde kə majɛ̂ uta bbay, mba əbbədede le toje to njê-mə-kunnje kə̂ Lubba ndikide nya. Nɛ̂ɛnn â maji karə ə-tɔju dəwje ngaâ unn ndu mbɛɛ̂.

Ndəjə dɔ njê-nɛ̂n-tɔjuje tə̂ kə̂ tɔkɔrɔ ang kə bbo nɛ̂n-kinga

³ Bbo dəw tɔju nɛ̂nje kə̂ to kə dɔgɔlɛ̂ ang kə̂ to dang kə tarje lə Əbbəjeje Jeju-Kristə kə̂ to tar kə tɔkɔrɔ le ddəm to dang kə tar mə-kunn a,

⁴ n̂-to dəw kə̂ oo rɔɛ̂ bo ngaâ gərə nɛ̂n kâra ang. N̂-to dəw kə̂ rɔ-to mayn tar to rɔɛ̂ tə̂ ngaâ n̂-to dəw kə̂ aw kɔl mba marə kandə tarje. Nɛ̂nje kə̂ baann aw ddee kə kunda-mə kə naan, mayn-tar, nɛ̂n-taji, koo naan kə kəm kə̂ maji ang,

⁵ mayn tar kə̂ kɔnyɛ̂ goto horo dəwje tə̂ kə̂ kəjə ləde to kə dɔgɔlɛ̂ ddəm tar kə̂ tɔkɔrɔ goto tade tə̂ ddəm. Dooje kunn-mə karə Lubba to ddəw nɛ̂n-kinga ləde.

⁶ Bbo dəw unda məɛ̂ kə dɔ nɛ̂n tə̂ kə̂ to jia tə̂ njaa a, kunn-mə karə Lubba le to nɛ̂n-kinga kə̂ bo nya tɔkɔrɔ njaa.

⁷ Mba, n-ddee kə nɛ̂n kâra dɔ nangə tə̂ ang, ddəw kâra baa, ja təl kə nɛ̂n kâra ang.

⁸ Yeenn a, bbo jinga nɛ̂n-kusa kə̂ taje tə̂ kə kubbu kə̂ rɔje tə̂ a, yeenn njaa asə.

⁹ A dəwje kə̂ ndikije ta ddee to njê-nɛ̂n-kingaje osoje mə nɛ̂n-kərə tə̂. Dosoje mə bandə tə̂ ddəw bbo nɛ̂nje tə̂ kə̂ maji ang dang dang kə̂ aw tuju dəwje ngaâ aw aw kə dəwje arə naynje kə kɔrɔ̂.

¹⁰ Mba, bbo narɛ â to ngira nɛ̂nje kə̂ maji ang tɔyn. Marə dəwje kə̂ isije kə bbo narɛ inyaje mə-kunn ləde ddəw əw. Yeenn bba dede njaa n̂-darje dɔde nɛ̂n kəm-to-ndooje tə̂ dang dang.

Pɔl ndəjə Timɔte

¹¹ A əi dəw lə Lubba, ə-mbətə nɛ̂njeenn ddəw əw ta ə-sangə ddəw ta to gatə gatə, ta bbəəl Lubba, ta kuwa mə-kunn karə ngəng, ta ndiki ngamarije, ta tɔ wuri ngaâ ta ə-ddee to dəw kə̂ wul pee kə dəwje.

¹² Maji karə ə-dda ddɔ kə̂ maji mba ngəm nɛ̂n mə-kunn ləi ta uwa təbbə kə̂ to kə ndɔ kə ndɔ kə̂ Lubba bbari mbɛɛ̂ le, kar tə̂ kə̂ ə-pa kə tai nɔn njê-tar-najije tə̂ kə̂ banya to unn məi arə Jeju-Kristə le.

¹³ Munn ndu nəənn mari nɔn gɔl Lubba tə̂ kə̂ arə təbbə nɛ̂nje tɔyn ddəm nɔn gɔl Jeju-Kristə tə̂ kə̂ pa tar-naji kə̂ tɔkɔrɔ nɔn gɔl Pɔnsə Pilatə tə̂ ddəm.

¹⁴ Maji karə ə-ngəm ndu le arə nɛ̂n-yərəw ɔri ang. Arə tar to dɔi tə̂ ang ndərəng ndɔ təl lə Əbbəjeje Jeju-Kristə.

¹⁵ Nâ təl kə ndɔ kə̂ Lubba ɔju. Lubba kə̂ to nje-dda karə dəwje isije kə rɔ-nəəl, ne kə̂ karɛ̂ â nɔn dɔ nɛ̂nje tɔyn, ne kə̂ n̂-to Mbay-dɔ-mbayje kə Əbbə-əbbə-dəwjeje.

¹⁶ Lubba kə̂ nje-kisi kə ndɔ kə ndɔ, ne kə̂ nisi lo tə̂ kə̂ ndoko kə̂ dəw tee tə̂ ang. Dəw kâra ooe ang ddəm dəw kâra asə ta kooe ang ddəm. Maji karə piti kə singa-mɔngu toje to laa kə ndɔ kə ndɔ. Amɛnn.

Ndəjə dɔ njê-nɛ̂n-kingaje tə̂

¹⁷ Maji karə unn ndu arə njê-nɛ̂n-kingaje kə̂ bbokənɛn nəənn arə dɔsuje gaji rɔde baa ang. Maji karə dundaje məde kə dɔ nɛ̂n-kingaje tə̂ ang, mba to nɛ̂nje kə̂ a ndayje. A maji karə dundaje məde dɔ Lubba tə̂ kə̂ aw arəje nɛ̂n tɔyn arə uta dɔɛ̂ karə jisi nɛ̂n kə majɛ̂.

¹⁸ Maji karə ə-pa arə n̂-ddaje maji, n̂-ddaje kula kə̂ maji nya, arə dɔsuje ngar kə mə-kâra ngaâ n̂-kaynje dəwje dəbbə nɛ̂n-kingaje ləde.

¹⁹ Baann bba dâ gɔlje nɛ̂n dam ləde kə̂ kura kə̂ gɔlɛ̂ kətərə, mba ndɔ kə̂ bara. Yeenn tɔ bba dâ kingaje təbbə kə̂ tɔkɔrɔ.

Lapiya kə̂ to dɔbɔnyɛ̂

²⁰ Timɔte, maji karə ə-ngəm nɛ̂n kə̂ Lubba inya mə jii tə̂ le kə majɛ̂. Ə-mbətə bulaje kə̂ baa baa kə̂ aw tila kəm tar lə Lubba. Nɛ̂njeenn le inje ddəw nɛ̂n-gərə tə̂ kə̂ dəwje ooje to nɛ̂n-gərə kə̂ tɔkɔrɔ.

²¹ Marə dəwje kə̂ ndikije tə̂ kə nɛ̂n-gərə kə̂ baann le, tusuje mə-kunn ləde inyaje. Maji karə mə-maji lə Lubba nayn kə se!