1 Timɔte 5 - Dɔnɔn kə̂ Siki: Tar kə̂ aw arə təbbə

Ddəw ndəjə njê-mə-kunnje

¹ Maji karə ə-ndəjə dingaw kə̂ bbuka tokə lə bɔije njaa, bbo ə-ndangɛ̂ ang. Ə-ndəjə basanje tokə lə ngakɔinje njaa.

² Maji karə ə-ndəjə kɔn dɛnɛ̂nje tokə lə kɔinjedede. Ə-ndəjə dɛnɛ̂nje kə̂ naynje kə singade bbay kə mə-nda kayn tokə ngakɔn-nanni.

Tar dɔ dɛnɛ̂n-ndubbaje tə̂

³ Maji karə ə-wal dɛnɛ̂n-ndubbaje kə̂ isije kə karəde njaa.

⁴ A bbo marə dɛnɛ̂n-ndubba kə̂ ngannɛ̂ wase ngakɛɛ̂ toje a, dɔngɔr nɛ̂n kə̂ ta dda â to karə n̂-tɔjuje kula mə-kunn ləde horo nujuje tə̂ ngaâ n̂-təlje kə nɛ̂n kə̂ njê-kujudeje ngəm nɛ̂n de darəde. Lubba ndiki nɛ̂n kə̂ baann nya.

⁵ Dɛnɛ̂n-ndubba kə̂ isi kə karɛ̂ baa ngaâ nje-kaa lo kə dɔɛ̂ tə̂ goto, unda məɛ̂ kə̂ dɔ Lubba tə̂. Nəw ta dda rɔɛ̂ to ndoo rɔ Lubba tə̂ ang, naw duju Lubba, til kə kar.

⁶ A dɛnɛ̂n-ndubba kə̂ unn rɔɛ̂ mba rɔ-nəəl kə̂ nangə̂ nəənn isi kəm baa ddəw da-rɔ tə̂, a ddəw ndil tə̂ noy mban.

⁷ Yeenn le â to nɛ̂n kə̂ ta karə ə-ndəjəde mbɛɛ̂ karə tar to dɔde tə̂ ang.

⁸ Bbo marə nje-mə-kunn aa lo kə dɔ nujuje tə̂ laa ang, uta tɔyn bbo naa lo kə dɔ dəwje tə̂ kə̂ mə kəy tə̂ laa ang a, ninya mə-kunn laa mban ngaâ n̂-maji ang nuta dəw kə̂ unn məɛ̂ ang.

⁹ Dɛnɛ̂n-ndubba kə̂ to nje-ngaw kə̂ kâra, kə̂ bbalɛ̂ uta bbal dɔmisan bba maji karə ə-dda ria horo marɛ̂je tə̂.

¹⁰ Maji karə ria bbar mba kula-ddaje kə̂ maji: Maji karə n̂-to dəw kə̂ ngəm ngannɛ̂, dəw kə̂ ngəm njê-mbaje, nje-toko gɔl dəwje lə Lubba. Maji karə n̂-to dəw kə̂ aw aa dəwje kə̂ nɛ̂n kəm-to-ndoo oso dɔde tə̂ oo. Maji karə n̂-to dəw kə̂ dda marə kulaje kə̂ maji dang dang.

¹¹ Maji karə ə-dda ri dɛnɛ̂n-ndubbaje kə̂ naynje kə singade bbay horo marɛ̂je tə̂ ang. Mba ndɔ kə̂ bbo kə̂ da-rɔ tə̂ ddade a, dâ kinyaje go Jeju-Kristə ta taa ngaw.

¹² Kula-dda kə̂ baann tɔju to dinyaje ndu kə̂ dunnje dɔngɔr le.

¹³ Tɔ bbay, mba dingaje kula ta dda ang le a, n̂-ndoje ta kasə lo kə ta-kəy kəy. Dɔɛ̂ tə̂, n̂-təlje to njê-kundaje bula. Tar kə̂ osode tə̂ ang kara dilaje tade tə̂ baa baa. Tar kə̂ asə ta pa ang kara daw paje.

¹⁴ Yeenn bba m-ndiki karə dɛnɛ̂n-ndubbaje kə̂ naynje kə̂ singade bbay taaje ngaw, maji karə dujuje ngannje. N̂-tɔjuje ddəw kə̂ maji njê kə̂ mə kəy tə̂ ləde. Baann bba njê-baanje a kingaje ddəw ta nanɛn kə je ang.

¹⁵ Mba marə dɛnɛ̂n-ndubbaje unnje go Satan ngaâ n̂-ndəəmje ddəw mban.

¹⁶ Bbo marə dɛnɛ̂n-ndubbaje toje horo nujuje tə̂ lə marə dɛnɛ̂n kə̂ to nje-mə-kunn a, maji karə numande. Baann bba dɛnɛ̂n-ndubbaje le a toje to nɛ̂n-koto kə̂ aw ɔɔy Egilisi ang. Baann bba Egilisi le a kinga ddəw ta kuman dɛnɛ̂n-ndubbaje kə̂ isije kə karəde njaa.

Tar lə dəwje kə̂ dɔ Egilisi tə̂

¹⁷ Asə karə dəwje kə̂ dɔ Egilisi tə̂ kə̂ aw tɔjuje ddəw kə̂ maji dəwje ingaje kuka kə̂ bo. Uta tɔyn, dede kə̂ kula pa tar lə Lubba kə kula nɛ̂n-tɔju ɔɔyde nya.

¹⁸ Makəturu lə Lubba pa nan: «Mangə kə̂ aw dda kula ndɔ kuja ko-ndɔɔ tə̂, dang bba ɔkɛ̂ ddəw karə nusa ko-ndɔɔ le ang.» Makəturu le pa bbay nan: «Maji karə nje-kula inga kuka laa.»

¹⁹ Bbo dəw unda tar dɔ marə dəwje kə̂ dɔ Egilisi tə̂ a, ə-ndiki tə̂ ang. Ə-nginan ta oo tar lə njê-tar-najije joo wase mota bba ta ə-ndiki tə̂.

²⁰ A bbo dəw dda majang a, ə-ndangɛ̂ kəm dəwje tə̂ tɔyn. Baann bba kəsə dəwje a bbəəlje ta dda majang.

²¹ M-duji nya kəm Lubba tə̂ kə kəm Jeju-Kristə tə̂ kə kəm anjəje tə̂ kə̂ n̂-mbərəde, karə ə-dda nɛ̂n kə turu nduje kə̂ mari. Ɔru kəm dəw ang, ə-dda kə dəwje tɔyn ddəw kâra baa.

²² Ila jii kə ngɔru baa dɔ dəw tə̂ karə dda kula lə Lubba ang. Ula rɔi mə majang tə̂ lə dəw ang. Arə məi nda kayn nɔn Lubba tə̂ ləi.

²³ Maann dɔrɔ â ay ang. Maji karə ay bɛn ngaji mba wuri kə̂ aw toi kə rɔ-to kə̂ aw jɔki nya.

²⁴ Majangje lə marə dəwje teeje kə ddaka kəm dəwje tə̂ kete kete bba n̂-ngangə sariya dɔɛ̂ tə̂. A manjangje lə marɛ̂je teeje kə ddaka kəm dəwje tə̂ dɔ guku baa.

²⁵ Ddəw kâra baa, kulaje kə̂ maji kə̂ marə dəw aw dda, kəm dəwje aw oo. Kulaje kə̂ maji kə̂ n̂-dda ngaâ kəm dəwje oo ang kara a nayn lo-kiyɛ̂ tə̂ ang.