1 Timɔte 4 - Dɔnɔn kə̂ Siki: Tar kə̂ aw arə təbbə

Nɛ̂n tɔyn kə̂ Lubba dda maji to maji dɔrɔ

¹ Ndil-mə-nda pa kə majɛ̂ nan, ddutu ndɔje a, marə dəwje a kinyaje ddəw mə-kunn mba nayn go ndilje tə̂ kə̂ njê-ngəmje ngaâ dâ kunnje go nɛ̂n-tɔju lə ndilje kə̂ maji ang le.

² Dəwjeenn le ndəəmje ddəw mba dəwje kə̂ toje to njê-ngəmje, dede kə̂ tar kə̂ tade tə̂ to dang kə kula-ddade le. Kəjə-tar ləde to kə dɔgɔlɛ̂ ang tokə nɛ̂n kə dula nɛ̂n poro darə kasɛ bba dɔru nɛ̂n kəjə ləde le.

³ Njê-ngəmje le tɔjuje nɛ̂n nan: Taa-naan lə dɛnɛ̂n de kə dingaw to nɛ̂n kə̂ maji ang wase kusa marə nɛ̂n-kusaje to nɛ̂n kə̂ maji ang. A Lubba dda nɛ̂n-kusajeenn mba njê-mə-kunnje kə̂ gərəje nɛ̂n-tɔju kə̂ tɔkɔrɔ. Maji karə darəje wooyo Lubba mban a, dusaje.

⁴ Mba nɛ̂nje tɔyn kə̂ Lubba dda maji to maji dɔrɔ. Nɛ̂n kə̂ ta mbətə goto, a maji ta karə wooyo Lubba mban a, kusa.

⁵ Mba tar lə Lubba kə duju kə̂ jaw duju Lubba ddaje arə nɛ̂n-kusa le təl to nɛ̂n-yərəw ang kəm Lubba tə̂.

Nje-kula lə Jeju-Kristə kə̂ tɔkɔrɔ

⁶ Bbo ə-tɔju nɛ̂nje kə̂ m-pa mari nəənn njê-mə-kunnje a, â to nje-kula lə Jeju-Kristə kə̂ tɔkɔrɔ. Baann bba, â tɔju to ə-to dəw kə̂ aw ubba singa ddəw tar mə-kunn tə̂ ddəm ddəw nɛ̂n-tɔju tə̂ kə̂ tɔkɔrɔ kə̂ unn goe le ddəm.

⁷ Maji karə ə-mbətə əsu ngəmje kə̂ dəwje aw ɔruje kə̂ toje dang kə nɛ̂n-tɔju lə njê-mə-kunnje. Ə-sangə ddəw ta kunn rɔi karə Lubba.

⁸ Kunn rɔ kila ndam-singa tə̂ to nɛ̂n kə̂ dda maji njaa, a dda maji ddəw nɛ̂nje tə̂ nya ang. A kunn rɔ karə Lubba to nɛ̂n kə̂ dda maji ddəw nɛ̂nje tə̂ tɔyn. Kunn rɔ karə Lubba le ndu-kunn mba kisi nɛ̂n kə təbbə kə̂ to ndɔ tə̂ kə̂ bbokonɛn ddəm ndɔ tə̂ kə̂ aw ddee ddəm to tə̂.

⁹ Tar nəənn to tar kə̂ tɔkɔrɔ, maji karə dəwje tɔyn taaje ngəmje məde tə̂ kə majɛ̂.

¹⁰ Jaw jooje ndoo wase jaw ddaje ddɔ mba məje kə̂ jundaje dɔ Lubba tə̂ kə̂ Nje-kisi kəm baa. Lubba kə̂ to Nje-kaji-dəwje tɔyn, uta tɔyn, n̂-to Nje-kaji njê-mə-kunnje.

¹¹ Nɛ̂ɛnn â maji karə unn ndu dɔɛ̂ tə̂ ngaâ ə-tɔjude.

Nɛ̂n-kɔju-marɛ̂ mba njê-mə-kunnje

¹² Maji karə dəw ooi to ngonn baa kəmɛ̂ tə̂ ang. A maji karə njê-mə-kunnje ooije to nɛ̂n-kɔju-marɛ̂ ddəw tar tə̂ kə̂ tai tə̂, ddəw kula-ddai tə̂, ddəw ndiki tə̂ kə̂ ə-ndiki dəwje, ddəw məi tə̂ kə̂ unn arə Jeju kə ddəw rɔi tə̂ kə̂ aw ngəm kə majɛ̂.

¹³ Maji karə ə-tura makəturu nya arə dəwje lo mbɔn-naan tə̂ ə-nginan nɛ̂n ndɔ ddee ləm. Arəde ndəjə ngaâ ə-tɔjude nɛ̂n.

¹⁴ Ndil-mə-nda ari gusu. Ə-dda ngar kə gusu le ang. Inga gusu le go tarje tə̂ kə̂ njê-kilaje mbər tar lə Lubba paje ngaâ dəwje kə̂ dɔ Egilisi tə̂ mbɔnje naan ilaje jide dɔi tə̂.

¹⁵ Nɛ̂ɛnn â maji karə unda məi dɔɛ̂ tə̂. Maji karə unn rɔi ila kula tə̂ ləi. Yeenn bba dəwje tɔyn a kooje kula ləi kə̂ aw kə kete kete le.

¹⁶ Ə-ngəm rɔi kə majɛ̂, unda kəmi dɔ nɛ̂n-tɔju tə̂ ləi. Ə-nayn ddəwe tə̂ kə ndɔ tɔyn, mba bbo ə-dda tokə baann a, əi njaa â kaji rɔi ddəm â kaji dəwje kə̂ aw ooje tar ləi ddəm.