1 Timɔte 3 - Dɔnɔn kə̂ Siki: Tar kə̂ aw arə təbbə

Dəwje kə̂ dɔ Egilisi tə̂

¹ Tar kə̂ tɔkɔrɔ â nəənn. Bbo marə dəw ndiki ta ddee to dəw kə̂ dɔ Egilisi tə̂ a, to kula kə̂ maji nya njaa â n̂-ndiki ta dda.

² Baann a, maji karə dəw kə̂ dɔ Egilisi tə̂ le tar to dɔɛ̂ tə̂ ang, n̂-to nje-dɛnɛ̂n kə̂ kâra, n̂-to dəw kə̂ sangə rɔɛ̂, n̂-to dəw kə̂ gərə dɔ jia, n̂-to dəw kə̂ dda nɛ̂n kə ddəwe, dəw kə̂ gərə ngəm njê-mbaje, dəw kə̂ gərə ta tɔju nɛ̂n.

³ Maji karə n̂-to bbərə lə koto ang, n̂-to nje-ddɔ kə dəwje ang, n̂-to dəw kə̂ wul pee, n̂-to dəw kə̂ ndiki kɔl ang, n̂-to dəw kə̂ ndiki narɛ nya ang.

⁴ Maji karə n̂-to dəw kə̂ gərə ta tɔju ddəw kə̂ maji njê kə̂ mə kəy tə̂ laa, n̂-to dəw kə̂ ngannɛ̂ ooje tɛɛ̂ ngaâ bbəəleje.

⁵ A bbo dəw gərə ta kɔn dɔ njê kə̂ mə kəy tə̂ laa ang a, nâ ngəm Egilisi lə Lubba tokə baânn wa?

⁶ Maji karə dəw kə̂ dɔ Egilisi tə̂ to dəw kə̂ unn məɛ̂ arə Jeju goe əw bba. Baann ang a, nâ koo rɔɛ̂ bo nya ngaâ Lubba a gangə sariya dɔɛ̂ tə̂ tokə n̂-gangə sariya dɔ Əsu tə̂ le.

⁷ Maji karə n̂-to dəw kə̂ dəwje kə̂ toje to njê-mə-kunnje ang paje tar laa maji bba. Baann bba dəwje a nanɛnje saa ang ngaâ nâ koso mə bandə tə̂ lə Əsu ang.

Tar lə diyakərəje

⁸ Ddəw kâra baa, maji karə diyakərəje toje to dəwje kə̂ ulaje gəl rɔde naan tə̂ ang, dəwje kə̂ tar kə̂ tade tə̂ to joo joo ang, n̂-toje to njê-kayje koto nya ang, maji karə n̂-toje to dəwje kə̂ bbo kinga narɛ kə dɔgɔlɛ̂ ang ddade ang.

⁹ Maji karə tar mə-kunn kə̂ Lubba tee nɛ̂n kə ddaka le n̂-ngəmje kə kəjə kə̂ maji.

¹⁰ Maji karə n̂-nande doo kete bba ta goe tə̂, bbo marə tar to dɔde tə̂ ang a, dâ kasəje ta dda kula diyakərə le.

¹¹ Maji karə dɛnɛ̂n njɛɛ̂je kara ulaje gəl rɔde naan tə̂ ang, n̂-toje to njê-nanɛnje ang, n̂-gərəje dɔ jide. N̂-toje to dɛnɛ̂nje kə̂ toje gatə gatə ddəw nɛ̂nje tə̂ tɔyn.

¹² Maji karə diyakərəje le toje to njê-dɛnɛ̂nje kə̂ kâra baa. Maji karə n̂-gərəje ta tɔju ddəw kə̂ maji ngannde kə dəwje tɔyn kə̂ mə kəy tə̂ ləde.

¹³ Mba diyakərəje kə̂ aw ddaje kula ləde kə majɛ̂ a kingaje piti ta dəwje tə̂ tɔyn ngaâ dâ paje tar mə-kunn ləde kə̂ to kə dɔ Jeju tə̂ kə bbəəl ang.

Tar mə-kunn kə̂ n̂-tee kə gəle kə ddaka

¹⁴ Kar tə̂ kə̂ maw dda nɛ̂n makəturu mari nəənn, munda məm ta kaw kingai mbɔr ang baa.

¹⁵ A bbo m-ddee kə tɔkɛ̂ ang a, ndəjəje kə̂ mari nəənn a kari ddəw karə ə-gərə ddəw kə̂ â nja nɛ̂n horo dəwje tə̂ lə Lubba. Dəwje lə Lubba le to Egilisi lə Lubba kə̂ to Nje-kisi kəm baa. Egilisi le aw uwa tar kə̂ tɔkɔrɔ arə ngəng.

¹⁶ Tɔkɔrɔ njaa, tar mə-kunn kə̂ n̂-tee kə gəle kə ddaka le to nɛ̂n kə̂ ngəng nya. Tarɛ̂ le tokə be: Kristə unn da-rɔ dəw, Ndil-mə-nda pa tar-naji laa nan n̂-to gatə gatə, anjəje ooeje, dəwje ilaje mbər tar laa horo gəl-dəwje tə̂, dəwje kə̂ dɔ nangə tə̂ unnje məde arɛ̂, Lubba unnɛ̂ aw saa darâ lo piti tə̂ laa.