1 Timɔte 2 - Dɔnɔn kə̂ Siki: Tar kə̂ aw arə təbbə

Ndəjə dɔ duju Lubba tə̂

¹ Nɛ̂n kə̂ maw ndəjəse ta karə ə-ddaje dɔngɔrɛ̂ â to karə ə-dujuje nɛ̂nje ji Lubba tə̂, karə ə-paje tar kə Lubba, ə-ddaje rɔse to ndoo nɔn Lubba tə̂ ngaâ ə-təlje kə wooyo arəje Lubba mba dəwje tɔyn.

² Maji karə ə-dujuje Lubba mba tɔkə mbayje kə njê-kɔn-bbeje. Baann bba ja kisije ddekeke, ja kisije kə mə-wul-lɔm, karə pa-nja ləje to kə majɛ̂ ngaâ karə junn rɔje jarə Lubba.

³ Yeenn bba to nɛ̂n kə̂ kura ngaâ maji nya kəm Lubba tə̂ kə̂ Nje-kajije,

⁴ Lubba kə̂ ndiki karə dəwje tɔyn ingaje kaji ddəm ndiki karə dəwje tɔyn gərəje nɛ̂n kə̂ tɔkɔrɔ ddəm.

⁵ Mba Lubba kâra baa, nje-gɔl-tar horo Lubba tə̂ kə dəwje kâra baa tɔ. N̂-to dəw, Jeju-Kristə,

⁶ kə̂ unn rɔɛ̂ uka nɛ̂n dɔ dəwje tɔyn. Yeenn bba karɛ̂ asə a, Lubba dda nɛ̂ɛnn le ta tɔju to n̂-ndiki ta kaji dəwje tɔyn.

⁷ Mba yeenn bba, Lubba undam to nje-tɔju tar kə nje-kaw-kula karə m-tɔju dəwje kə̂ toje to Jiipije ang, tar mə-kunn kə tar kə̂ tɔkɔrɔ. Tar kə̂ tɔkɔrɔ â maw pa nəənn bbo maw mərə ngəm ang.

Pa-nja lə dingawje kə dɛnɛ̂nje

⁸ Yeenn a, m-ndiki karə dingawje dujuje Lubba kə lo tɔyn, dulaje jide kə darâ kə mə kə̂ nda kayn kə wungu ang ddəm kə kəjə kɔl ang ddəm.

⁹ Ddəw kâra baa, m-ndiki karə dɛnɛ̂nje ulaje kubbu kə majɛ̂, dulaje kubbu darə kəm dəwje to kə dɔde tə̂ ang, n̂-ddaje mandə kə boro ang: N̂-ddaje dɔde kə dɔgɔlɛ̂, nɛ̂n-mandəje kə̂ n̂-dda kə andə wase mərə wase kubbu kə̂ gatɛ̂ ngəng nya â maji karə dulaje ang.

¹⁰ A maji karə kulaje kə̂ maji â dɛnɛ̂nje ulaje to kubbu. Nɛ̂n kə̂ baann â asə karə dɛnɛ̂nje kə̂ unnje ndude ta bbəəl Lubba ddaje.

¹¹ Kar nɛ̂n-tɔju a, maji karə dɛnɛ̂nje isije ddekeke ta ooje tar ta bbəəlje dəw.

¹² Marə ddəw dɛnɛ̂n karə tɔju nɛ̂n wase ɔn dɔ dingaw ang. Maji karə dɛnɛ̂n utu tɛɛ̂.

¹³ Mba Adam â Lubba ddɛɛ̂ dɔngɔr bba goe tə̂ a n̂-dda Ɛbə.

¹⁴ Adam â arə Satan əre ang. Dɛnɛ̂n â inya arə Satan əre ngaâ oso mə majang tə̂.

¹⁵ A Lubba a kaji dɛnɛ̂n ddəw kuju ngonn tə̂, tokə n̂-nayn ddəw mə-kunn tə̂, ddəw n̂-ndiki dəwje tə̂, ddəw sangə-rɔ tə̂ kə ddəw dda rɔ ngaji tə̂.