1 Kɔrɛntinyɛje 9 - Dɔnɔn kə̂ Siki: Tar kə̂ aw arə təbbə

Pɔl to nje-kaw-kula kə̂ maji

¹ Masə dda ta nɛ̂n kə̂ məm ndiki ang wa? M-to nje-kaw-kula ang wa? Moo Əbbəjeje Jeju ang wa? Sese â ə-toje to kandə kula kə̂ m-dda nɔn gɔl Əbbə-dəwje tə̂ le ang wa?

² Bbo marə dəwje oomje to nje-kaw-kula ang kara, kə̂ kəmse tə̂, m-to nje-kaw-kula ləse, mba ə-toje to əndaji kula ləm kə̂ m-dda nɔn gɔl Əbbə-dəwje tə̂.

³ Naji ləm kə̂ mâ kɔru nɔn dəwje tə̂ kə̂ undaje tar dɔm tə̂ â nəənn:

⁴ Jasə ta kusa nɛ̂n, ta kay nɛ̂n ang wa?

⁵ Jee kə ddəw ta ddee kə marə ngokɔnje kə̂ dɛnɛ̂n to dɛnɛ̂n ləje tokə kəsə njê-kaw-kulaje kə ngakɔn Əbbə-dəwje kə Piyɛr daw ddajeenn ang wa?

⁶ Wase to tar ləje, əman kə Barnabas joo baa ta dda kula bba ta kinga nɛ̂n nɛ̂n-kusa taje wa?

⁷ Ndɔ kâra dəw andə mbamba tə̂ a, narɛ laa njaa uka nɛ̂n rɔɛ̂ wa? Nân bba ndɔɔ binyə a, usa kandɛ̂ ang wa? Wase nân bba uul nɛ̂n a, ay mba nɛ̂n-kuul le ang wa?

⁸ Nɛ̂n-ddaje lə dəwje â mar dɔɛ tə̂ bba maw pa nɛ̂n tar nəənn ang. Ndu lə Mɔyijə kara pa tokə baann tɔ.

⁹ Mba, Makəturu-Ndu tə̂ lə Mɔyijə n̂-dda tə̂ nan: «Mangə kə̂ aw dda kula ndɔ kuja ko-ndɔɔ tə̂, dang bba ɔkɛ̂ ddəw karə nusa ko-ndɔɔ le ang.» Tar lə mangəje â uwa wur Lubba nya wa?

¹⁰ Wase jeje â naw pa tar nəənn ɔju dɔje ang wa? Tɔkɔrɔ, n̂-dda nɛ̂nje nəənn makəturu tə̂ ɔju dɔje. Mba nje-ndɔɔ aw ngəbbə ta kinga nɛ̂n go kula tə̂ kə̂ n̂-dda ngaâ dəw kə̂ aw uja ko-ta-kɔsu aw unda məɛ̂ ta kinga marə ko le to dɔ jia tɔ.

¹¹ N-dubbu nɛ̂nje kə̂ maji kə̂ to lə Ndil məse tə̂. Yeenn bba bbo jinga dəbbə nɛ̂n-kingaje ləse kə̂ nangə̂ nəənn to kuka ləje a, to nɛ̂n kə̂ a kɔru singase nya wa?

¹² Bbo marə dəwje asəje ta duju nɛ̂n jise tə̂ a, jeje jasə ta duju nɛ̂n jise tə̂ utade ang wa? A jeje n-dda tokə baann ang. N-tɔ wurje nɛ̂n tə̂ tɔyn, mba n-ndiki ta dda marə nɛ̂n kutu nɛ̂n ddəw Tar kə̂ Maji lə Kristə ang.

¹³ Ə-gərəje kə majɛ̂ to dəwje kə̂ aw ddaje kula mə kəy-polo Lubba tə̂ ingaje nɛ̂n-kusa ləde ddəw kula tə̂ənn le njaa. Dede kə̂ daw darəje nɛ̂n-polo Lubba dɔ bann tə̂, dingaje dəbbə nɛ̂n kə̂ daw poloje nɛ̂n Lubba le to nɛ̂n-kusa ləde.

¹⁴ Ddəw kâra baa, Əbbə-dəwje unn ndu tokə baann tɔ. N̂-pa nan, dəwje kə̂ aw ilaje mbər Tar kə̂ Maji a kisije kə majɛ̂ ddəwe tə̂.

¹⁵ A əman, masə dujuse nɛ̂n njaa, a m-dda baann ang. M-dda makəturu nəənn mba duju nɛ̂n nɛ̂n le ang. Koy ləm maji uta karə m-duju nɛ̂n jise tə̂. Yeenn to nɛ̂n kə̂ maw mɔsu nɛ̂n gajim ngaâ dəw kə̂ asə ta kɔru nɛ̂ɛnn le kə ddang goto.

¹⁶ A əman, kila mbər Tar kə̂ Maji to nɛ̂n-kɔsu nɛ̂n gajim ang. Mba to kula kə̂ darəm kə singa ta karə m-dda, yeenn a bbo mila mbər Tar kə̂ Maji le ang a, a to ndoo nya karəm.

¹⁷ Bbo əman njaa m-dda kula le kə dɔm baa a, asə karə minga kuka ləm. A to kula kə̂ darəm kə singa arə maw dda to kula kə̂ dinya to kinya jim tə̂.

¹⁸ Kuka ləm to ddi wa? Kuka ləm to karə mila mbər Tar kə̂ Maji le baa bbo m-duju kuka kə̂ to ta karə minga goe tə̂ ang.

¹⁹ Tɔkɔrɔ, dəw kâra asə ta kuwam kə singa karə m-dda marə nɛ̂n ang. M-to bbərə lə dəw kâra ang, a əman njaa m-ndiki ta dda rɔm to bbərə ləse tɔyn, mba kinga nɛ̂n dəwje tokə banya karə Kristə.

²⁰ Bbo misi kə Jiipije a, m-dda nɛ̂n tokə lə Jiipije, mba kinga nɛ̂n de. Bbo misi kə dəwje kə̂ aw bbəəlje ndu lə Mɔyijə a, m-dda nɛ̂n kə turu Ndu, mba kinga nɛ̂n de. To dəw bba uwam kə singa ang.

²¹ Ddəw kâra baa, bbo misi kə dəwje kə̂ gərəje Ndu lə Mɔyijə ang a, m-dda tokə dəw kə̂ gərə Ndu le ang tɔ, mba kinga nɛ̂n de. Tɔkɔrɔ m-gərə ndu lə Lubba, mba maw dda nɛ̂n kə turu ndu Kristə.

²² Bbo misi kə dəwje kə̂ mə-kunn ləde sangə ang a, m-dda tokə dəw kə̂ mə-kunn laa sangə ang, mba kinga nɛ̂n de. M-dda rɔm tokə lə dəwje tɔyn marə dəwje tɔyn karə bbo ddəw to a, marɛ̂je kâra kâra ingaje kaji.

²³ Maw dda nɛ̂njeenn tɔyn ɔju dɔ Tar kə̂ Maji, mba kinga nɛ̂n nɛ̂n kə̂ maji kə̂ a ddee ddəwe tə̂.

²⁴ Ə-gərəje kə majɛ̂ to, horo dəwje tə̂ tɔyn kə̂ aw aynje ngɔru natâ mba kuta nɛ̂n naan, dəw kâra baa â a kinga kuka. Yeenn a, aynje ngɔru kə gusu kə̂ â kingaje nɛ̂n kuka.

²⁵ Dəwje tɔyn kə̂ aw gɔlje rɔde mba kayn ngɔru aw sangəje rɔde marə nɛ̂nje tə̂ nya. Daw ddaje baann, mba kinga nɛ̂n kuka kə̂ a tuju marə ndɔ. A jeje jaw ddaje tokə baann, mba kinga nɛ̂n kuka kə̂ a tuju ang ndɔ kâra ang.

²⁶ Yeenn bba maw mayn ngɔru baa njaa baann ang. M-to tokə nje-kunda kutu-bɔn kə̂ aa dəw kə majɛ̂ bba undɛ̂ bbo unda ləl baa ang.

²⁷ M-dda singa nya kə rɔm njaa, mba kɔn dɔ rɔm le. Baann ang a, əman nje-kila mbər tar karə kəsə dəwje le njaa dâ kɔrum kə guku.