1 Kɔrɛntinyɛje 7 - Dɔnɔn kə̂ Siki: Tar kə̂ aw arə təbbə

Tar taa-naan lə dɛnɛ̂n de kə dingaw

¹ Bbasinɛn mâ kila tar tə̂ ləse kə̂ ulaje nɛ̂n kə makəturu arəmje le. Bbo dingaw taa dɛnɛ̂n ang a, to nɛ̂n kə̂ maji.

² A ta karə dəw ngəm rɔɛ̂ ddəw kaya tə̂, maji karə dingawje kâra kâra tɔyn taaje dɛnɛ̂n ngaâ dɛnɛ̂nje kâra kâra tɔyn taaje ngaw.

³ Maji karə dingaw arə dɛnɛ̂n laa nɛ̂n kə̂ to tar laa ta karɛ̂. Ngaâ maji karə dɛnɛ̂n kara arə ngawɛ̂je nɛ̂n kə̂ to tar laa ta karɛ̂.

⁴ Dɛnɛ̂n njaa ɔn dɔ rɔɛ̂ ang, dingaw â ɔn dɔ rɔ dɛnɛ̂n. Ddəw kâra baa, dingaw njaa ɔn dɔ rɔɛ̂ ang, dɛnɛ̂n â ɔn dɔ rɔ dingaw.

⁵ Maji karə ɔkuje naan rɔse ang. Bbo ooje ta naan mba marə kar ta duju Lubba a, goe tə̂, ə-təlje rɔ naan tə̂ nan Satan a kin nanse, mba â gərəje ta tɔ bbo kə̂ da-rɔse tə̂ ang.

⁶ Yeenn to ddəw â maw tɔjuse bbo to ndu â munn dɔse tə̂ ang.

⁷ M-ndiki karə dəwje tɔyn toje tokə əman. A dəwje kâra kâra tɔyn ingaje gusu dang dang ji Lubba tə̂. Narə marə dəwje gusu kə̂ be, a narə marɛ̂je gusu kə̂ be.

⁸ M-pa marə dingawje kə̂ taaje dɛnɛ̂n ang bbay wase dɛnɛ̂nje kə̂ taaje ngaw ang bbay kə dɛnɛ̂n-ndubbaje karə n̂-naynje baann tokə əman.

⁹ Bbo dasəje ta tɔ bbo kə̂ da-rɔ tə̂ ang a, maji karə n̂-taaje dɛnɛ̂n wase n̂-taaje ngaw. Yeenn maji uta karə bbo kə̂ da-rɔ tə̂ ɔnde to puru.

¹⁰ M-pa marə dəwje kə̂ taaje dɛnɛ̂n wase taaje ngaw (to əman â m-pa ang, to Əbbə-dəwje â unn ndu nan): Maji karə dɛnɛ̂n mbətə ngawɛ̂je ang.

¹¹ Bbo n̂-mbətə ngawɛ̂je a, maji karə n̂-taa ngaw ang, baann ang a, to tar laa ta təl rɔ ngawɛ̂je tə̂. Maji karə dingaw mbətə dɛnɛ̂n laa ang.

¹² Ənga kəseje, bbo marə ngokɔnje taa dɛnɛ̂n kə̂ to nje-mə-kunn ang ngaâ dɛnɛ̂n le ndiki ta nayn saa a, maji karə n̂-tubbɛ̂ ang. Yeenn to Əbbə-dəwje â pa ang, əman njaa m-pa.

¹³ Ddəw kâra baa, bbo dɛnɛ̂n kə̂ to nje-mə-kunn taa dingaw kə̂ to nje-mə-kunn ang ngaâ dingaw le ndiki ta nayn saa a, maji karə n̂-mbəte ang.

¹⁴ Mba dingaw kə̂ to nje-mə-kunn ang le a ddee maji kəm Lubba tə̂ ddəw tə̂ lə dɛnɛ̂n laa le ngaâ dɛnɛ̂n kə̂ to nje-mə-kunn ang le a ddee maji kəm Lubba tə̂ ddəw tə̂ lə ngokɔnje kə̂ nje-mə-kunn le. Bbo baann ang a, ngannse a majije kəm Lubba tə̂ ang, a kə̂ tɔkɔrɔ tə̂, ngannje le majije kəmɛ̂ tə̂ njaa.

¹⁵ Bbo dəw kə̂ to nje-mə-kunn ang ndiki ta mbətə dɛnɛ̂n laa wase ngawɛ̂je kə̂ to nje-mə-kunn a, tar goto. Mba lo tə̂ənn, marə nɛ̂n kə̂ tɔɛ̂ naan tə̂ kə ngokɔnje kə̂ dingaw wase ngokɔnje kə̂ dɛnɛ̂n le goto. Lubba bbarje karə jisi kə mə-wul-lɔm.

¹⁶ Əi dɛnɛ̂n kə̂ oo məi tə̂, ə-gərə tokə baânn bba â kaji ngawije wa? Wase əi dingaw kə̂ oo məi tə̂, ə-gərə tokə baânn bba â kaji dɛnɛ̂n ləi wa?

Ddəw kisi lə njê-mə-kunnje

¹⁷ Tar kə̂ ta kila dɔ marɛ̂ tə̂ â nəənn. Maji karə dəw kâra kâra nayn kə kisi laa kə̂ Əbbə-dəwje arɛ̂ karə nisi nɛ̂n, kisi kə̂ nisi nɛ̂n kete bba Lubba bbarɛ̂ le. Yeenn to ndu kə̂ munn marə Egilisije tɔyn.

¹⁸ Bbo dəw uja ganja kete bba Lubba bbarɛ̂ a, maji karə n̂-nayn baann. Bbo Lubba bbar dəw kə̂ uja ganja ang a, maji karə narə dujɛ̂ ganja ang.

¹⁹ Kuja ganja wase kuja ganja ang dda marə nɛ̂n kâra ang. Ngəm nduje lə Lubba â to nɛ̂n kə̂ ngəng.

²⁰ Maji karə dəw kâra kâra nayn kisi tə̂ laa kə̂ nisi nɛ̂n kete bba Lubba bbarɛ̂.

²¹ Ə-nayn to bbərə bbay bba Lubba bbari wa? Əjə tar ang. Â bbo inga ddəw ta tee kɔ bbərə tə̂ le a, ə-tee.

²² Mba dəw kə̂ to bbərə bba Əbbə-dəwje bbarɛ̂ ddee to dəw lə Əbbə-dəwje kə̂ tee kɔ bbərə tə̂. Ddəw kâra baa, dəw kə̂ to bbərə ang bba Əbbə-dəwje bbarɛ̂ ddee to bbərə lə Kristə.

²³ Lubba uka dɔse kə gatə kə̂ ngəng nya. Maji karə ə-ddeeje to bbərəje lə dəwje ang.

²⁴ Ngakɔnʼmje, maji karə nân nân kara isi nɔn Lubba tə̂ kə kisi laa kə̂ nisi nɛ̂n kete bba Lubba bbarɛ̂.

Tar lə dəwje kə̂ taaje dɛnɛ̂n ang wase taaje ngaw ang bbay

²⁵ Dɛnɛ̂nje kə̂ gərəje ngaw ang kə dingawje kə̂ gərəje dɛnɛ̂n ang, Əbbə-dəwje arəm ndu mbade ang. Tar kə̂ məm tə̂ njaa maw pa nəənn, əman kə̂ ddəw maji tə̂ kə̂ Əbbə-dəwje dda səm, dəwje a kasəje ta kundaje məde dɔm tə̂.

²⁶ Kə̂ kəjə tə̂ ləm, maji taa dɛnɛ̂n ang ddəm taa ngaw ang ddəm maji ta nayn baann mba lo ngəng nya.

²⁷ Ə-taa dɛnɛ̂n wa? Maji karə ə-sangə ddəw ta mbəte ang. Ə-taa dɛnɛ̂n ang wa? Maji karə ə-sangə ddəw ta taa dɛnɛ̂n ang.

²⁸ Â bbo ə-taa dɛnɛ̂n a, yeenn to majang â ə-dda ang. Bbo dɛnɛ̂n kə̂ gərə ngaw ang bbay taa ngaw a, yeenn to majang â n̂-dda ang. A nɛ̂n a ngəng kə dəwje kə̂ taaje dɛnɛ̂n ddəm njê kə̂ taaje ngaw ddəm. M-ndiki ta karə nɛ̂ɛnn le ingase ang.

²⁹ Ngakɔnʼmje, m-pa marəse: Ndɔ nayn banya ang ngaa. Unn kute bbokənɛn, maji karə dingawje kə̂ taaje dɛnɛ̂n isije tokə n̂-taaje dɛnɛ̂n ang.

³⁰ Maji karə dəwje kə̂ aw nɔnje isije tokə dəwje kə̂ aw nɔnje ang. Maji karə njê kə̂ aw ddaje rɔ-nəəl, isije tokə dəwje kə̂ aw ddaje rɔ-nəəl ang. Maji karə dəwje kə̂ ndokoje nɛ̂nje isije tokə dəwje kə̂ nɛ̂nje ləde goto.

³¹ Maji karə dəwje kə̂ aw ubbaje maji nɛ̂nje kə̂ nangə̂ nəənn isije tokə dəwje kə̂ aw ubbaje maji nɛ̂nje le ang, mba nangə kə̂ jaw jooje nəənn a nday.

³² M-ndiki karə əjəje tar ang. Dəw kə̂ taa dɛnɛ̂n ang wase taa ngaw ang unda kəjə laa kə dɔ kula tə̂ lə Əbbə-dəwje. Naw sangə ddəw ta nəəl kəm Əbbə-dəwje tə̂.

³³ A dingaw kə̂ taa dɛnɛ̂n aw unda kəjə laa kə dɔ nɛ̂n tə̂ kə̂ duninya tə̂. Naw sangə ddəw ta nəəl kəm dɛnɛ̂n tə̂ laa.

³⁴ Yeenn a, kəjə laa to joo. Ddəw kâra baa, dɛnɛ̂n kə̂ taa ngaw ang kə ngonn mandə, dundaje kəjə ləde kə dɔ kula tə̂ lə Əbbə-dəwje. Baann bba dâ ngəmje rɔde kə kəjə ləde karə maji tɔyn. Dɛnɛ̂n kə̂ taa ngaw unda kəjə laa kə dɔ nɛ̂nje tə̂ kə̂ duninya tə̂. Naw sangə ddəw ta nəəl kəm ngawɛ̂je tə̂.

³⁵ M-pa tar nəənn marəse mba kisi maji ləse bbo to buwa â muru karə osoje tə̂ ang. A m-ndiki ta karə nɛ̂n kə̂ maji â ta ə-ddaje ngaâ karə ə-naynje ddəw kula tə̂ lə Əbbə-dəwje kə kəjə kə̂ kâra baa.

³⁶ Bbo ngonn kə̂ dingaw kə̂ maal nje-mɔrɔ laa uta dɔɛ̂ ngaâ nəjə to nâ kin dda nɛ̂n kə̂ maji ang saa, a bbo n̂-ndiki ta tɛɛ̂ a, maji karə n̂-taaje naan. Yeenn to majang â n̂-ddaje ang.

³⁷ A ngonn kə̂ dingaw le, bbo ne njaa n̂-gɔl məɛ̂ tə̂ ta kinya ddəw ta dɛnɛ̂n le ddəm ta mbɔn saa naan ddəm a, yeenn n̂-dda maji. Bbo dəw uwɛ̂ kə singa ang ngaâ nasə ta tɔ bbo kə da-rɔɛ̂ tə̂ a, taa dɛnɛ̂n laa ang le to nɛ̂n kə maji.

³⁸ Yeenn a, ngonn kə̂ dingaw kə̂ taa nje-mɔrɔ laa dda maji, a ne kə̂ n̂-taa nje-mɔrɔ laa ang kara n̂-dda maji nya uta bbay.

³⁹ Bbo dɛnɛ̂n taa ngaw mban a, maji karə n̂-nayn kə ngawɛ̂je ndərəng ndɔ yo lə ngawɛ̂je le. Bbo ngawɛ̂je le oy a, ddəw ɔru arɛ̂ ta karə n̂-təl n̂-taa ngaw kə̂ məɛ̂ ndiki. A maji karə dəw kə̂ nje-mə-kunn bba n̂-tɛɛ̂.

⁴⁰ A kə̂ kəjə tə̂ ləm, bbo n̂-taa ngaw ang a, nâ kisi kə rɔ-nəəl nya uta. Əman njaa kara məjə to Ndil lə Lubba to rɔm tə̂ tɔ.