1 Kɔrɛntinyɛje 6 - Dɔnɔn kə̂ Siki: Tar kə̂ aw arə təbbə

Tar gangəje sariya lə njê-mə-kunnje horo naan tə̂

¹ Bbo marə dəw horose tə̂ inga tar kə ngokɔɛ̂n a, ninya njê-mə-kunnje, a dəwje kə̂ gərəje Lubba ang â narə gangə sariya laa wa?

² Ə-gərəje to njê-mə-kunnje a gangəje sariya dɔ dəwje tə̂ kə̂ duninya tə̂ nəənn ang wa? Bbo sese â, â gangəje sariya dɔ dəwje tə̂ kə̂ duninya tə̂ nəənn a, asəje ta gangə sariya ngann tarje kə̂ ture goto tɔ ang wa?

³ Ə-gərəje to ja gangəje sariya dɔ anjəje tə̂ ang wa? Yeenn a, tar gangə sariya ngann tarje kə̂ horose tə̂ a nyase wa?

⁴ Bbo tarje kə̂ tokə baann to horose tə̂ a, dəwje kə̂ Egilisi oode to nɛ̂n ang â unnjede to njê-gangəje sariyaje ləse mba ddi wa?

⁵ M-pa baann karə rɔ-kul ddase. Marə dəw kə̂ nje-kəm-karɛ kə̂ a gangə sariya horo ngakɔɛ̂nje tə̂ njaa goto wa?

⁶ Marə dəw lə Kristə aw kə ngokɔɛ̂n nɔn sariya tə̂ lə dəwje kə̂ ddaka le to nɛ̂n kə̂ maji wa?

⁷ Kə̂ tɔkɔrɔ, osoje mban, mba aw səkəje naan. Mba ddi bba bbo dəw dda nɛ̂n kə̂ to kə dɔgɔlɛ̂ ang kə se a, arəje nayn dɔse tə̂ ang wa? Mba ddi bba dəw ndiki ta taa nɛ̂n ləse kə singa a, inyaje arɛ̂je ang wa?

⁸ Sese njaa aw ddaje nɛ̂n kə̂ to gatə gatə ang ngaâ aw bbokoje njê-marəseje, ngaâ njê-marəseje le toje to ngakɔnse.

Maji karə nje-mə-kunn mbətə nɛ̂n kə̂ maji ang

⁹ Ə-gərəje ang wa? Dəwje kə̂ toje gatə gatə ang, lo ləde goto Bbe-kɔn tə̂ lə Lubba. Ərəje rɔse ang! Njê-kayaje wase njê-poloje kɔrje, njê-ddaje lo-to-majang wase dingawje kə̂ aw toje kə dingaw marədeje,

¹⁰ njê-bbokoje, njê-kundaje kəm-nda, njê kə̂ toje to bbərəje lə koto, njê-nanɛnje, njê-kuwa nɛ̂n lə ngamarəde kə singa, lo ləde to Bbe-kɔn tə̂ lə Lubba ang.

¹¹ Marə dəwje horose tə̂ toje tokə baann ləw. A Lubba tokose, nundase dang. Narə ə-ddeeje to dəwje kə̂ gatə gatə kə ri Əbbəjeje Jeju-Kristə ddəw tə̂ lə Ndil-mə-nda.

¹² Marə dəwje paje nan: «Ddəw ɔru arəm karə m-dda nɛ̂n tɔyn.» Tɔkɔrɔ njaa, a nɛ̂nje tɔyn maji to maji dɔrɔ ang. «Ddəw ɔru arəm karə m-dda nɛ̂n tɔyn.» A əman, mâ təl to bbərə lə marə nɛ̂n kâra ang.

¹³ Ə-paje nan: «Nɛ̂n-kusa to mba mə dəw ngaâ mə dəw to mba nɛ̂n-kusa.» Tɔkɔrɔ njaa, a Lubba a tujude joo kəm. A da-rɔ dəw to mba kaya ang. Da-rɔ dəw to mba Əbbə-dəwje ngaâ Əbbə-dəwje to mba da-rɔ dəw.

¹⁴ Lubba kə̂ ndol Əbbə-dəwje kə̂ oy le, a ndolje ddəw singa-mɔngu tə̂ laa tɔ.

¹⁵ Ə-gərəje to da-rɔse to barkəm-rɔ Kristə ang wa? Mâ kunn barkəm-rɔ Kristə karə təl to barkəm-rɔ dɛnɛ̂n nje-kaya wa? Baann ang!

¹⁶ Ə-gərəje to dəw kə̂ mbɔn naan kə dɛnɛ̂n nje-kaya, da-rɔde joo kəm ddee kâra baa ang wa? Mba Makəturu lə Lubba pa nan: «Dede joo kəm dâ ddeeje to da-rɔ kə̂ kâra baa ngaa.»

¹⁷ A dəw kə̂ dda mə-kâra kə Əbbə-dəwje, ne, de saa n̂-ddeeje to ndil kə̂ kâra baa.

¹⁸ Aynje kaya. Kəsə nɛ̂nje kə̂ maji ang tɔyn kə̂ dəw aw dda to ddaka bbo to da-rɔɛ̂ tə̂ ang. A dəw kə̂ dda kaya, dda maji ang kə da-rɔɛ̂ ne njaa.

¹⁹ Wase ə-gərəje ang wa? Da-rɔse to kəy-to Ndil-mə-nda kə̂ to rɔse tə̂. Ndil-mə-nda kə̂ in rɔ Lubba tə̂. Da-rɔse to ləse njaa ang.

²⁰ Lubba uka dɔse kə gatə kə̂ ngəng nya. Yeenn a, unnje da-rɔse le ɔsuje nɛ̂n gaji Lubba.