1 Kɔrɛntinyɛje 5 - Dɔnɔn kə̂ Siki: Tar kə̂ aw arə təbbə

Tar nɛ̂n rɔ-kul kə̂ Egilisi tə̂ kə̂ Kɔrɛntə

¹ Dəwje aw paje kə lo tɔyn nan kaya aw to horose tə̂. Dəwje kə̂ gərəje Lubba ang kara ddaje nɛ̂n baann ang. Moo nan marə dəw taa dɛnɛ̂n lə bɔɛ̂je.

² Ngaâ koo-rɔ-bo uta dɔse. Â kasəje ta karə nɛ̂ɛnn le jɔkuse ang wa? To tar ləse ta kɔru dəw kə̂ dda nɛ̂ɛnn le horose tə̂ kə ddang ang wa?

³ Əman kə da-rɔm m-goto horose tə̂, a ddəw ndil tə̂, mee horose tə̂. M-gangə sariya dɔ dəw tə̂ kə̂ dda nɛ̂ɛnn le mban tokə nɛ̂n kə̂ mee horose tə̂.

⁴ Ndɔ kə̂ uwaje dɔ naan a, ndilim a to kə se kâra baa ngaâ kə ri Əbbəjeje Jeju kə singa-mɔngu laa,

⁵ maji karə inyaje dəw kə̂ baann ji Satan tə̂ arəje da-rɔɛ̂ tuju, a ta ndile inga kaji ndɔ tə̂ lə Əbbə-dəwje.

⁶ Kɔsu gaji rɔ ləse le maji ang. Ə-gərəje to wum kə̂ tɛn baa dda arə nduju kə̂ n̂-bɔkɔlɔ in ang wa?

⁷ Maji karə arəje wum kə̂ ləw kə̂ to horose tə̂ goto kə ddang ta ə-ddeeje maji. Yeenn bba a ddeeje tokə lə nduju kə̂ n̂-bɔkɔlɔ tokə siki kə wum ang. Tɔkɔrɔ njaa ə-ddeeje to nduju kə̂ n̂-bɔkɔlɔ tokə siki mban, mba Kristə to ngonn batə Pakə ləje kə̂ dunn darə to nɛ̂n-polo mban.

⁸ Maji karə n-ddaje kusu Pakə le kə mapa kə̂ n̂-dda kə wum kə̂ ləw ang. Mba to wum majang, wum yərəw. A n-ddaje kusu Pakə le kə mapa kə̂ wum goto tə̂ ddəw nɛ̂n tə̂ kə̂ tɔkɔrɔ ddəm ddəw nɛ̂n tə̂ kə̂ yərəw ɔru ang ddəm.

⁹ M-dda marə makəturu tə̂ marəse m-pa nan: «Ə-ddaje mə-kâra kə njê-kayaje ang.»

¹⁰ Dəwje tɔyn kə̂ dɔ nangə tə̂ nəənn kə̂ toje to njê-kayaje â maw pa tar le mbade ang ddəm njê kə̂ aw undaje kəm-nda wase njê-bbokoje kə njê-poloje kɔrje ang ddəm. Bbo tokə baann a, a to maji karə ɔruje rɔse rɔ dəwje tə̂ kə̂ nangə̂ nəənn.

¹¹ Baann ang. M-dda makəturu le marəse karə ta bbo marə dəw oo rɔɛ̂ to ngokɔnje ddəw mə-kunn tə̂ mban bba aw dda kaya, aw unda kəm-nda, aw polo kɔr, aw nanɛn kə dəw, ddee to bbərə lə koto, ddee to nje-bboko a, maji karə nɛ̂n kara usaje saa ang.

^12-13 Dəwje kə̂ toje to njê-mə-kunnje ang le to tar ləm ta gangə sariya dɔde tə̂ wa? Dede le Lubba â a gangə sariya dɔde tə̂. A maji karə ə-gangəje sariya dɔ dəwje tə̂ kə̂ lo mbɔn-naan tə̂ ləse tokə makəturu lə Lubba pa. Makəturu le pa nan: «Ɔruje dəw kə̂ maji ang horose tə̂ kə ddang.»