1 Kɔrɛntinyɛje 4 - Dɔnɔn kə̂ Siki: Tar kə̂ aw arə təbbə

Njê-kaw-kulaje lə Kristə

¹ Maji karə dəwje oojeje to njê-kulaje lə Kristə, dəwje kə̂ Lubba inya nɛ̂nje kə̂ toje lo-kiyɛ̂ tə̂ jide tə̂ karə n̂-tɔjuje kə ddaka.

² A nɛ̂n kə̂ daw duju ji dəwje tə̂ kə̂ dinya nɛ̂nje jide tə̂, to ta karə n̂-toje gatə gatə.

³ Kə̂ kəjə tə̂ ləm, bbo sese wase njê-gangəje sariya kə̂ nangə̂ nəənn bba ə-ndikije ta gangə sariya dɔm tə̂ kara jɔkəm ang. Əman kara m-gangə sariya dɔm tə̂ ang tɔ.

⁴ Kəjə ləm jɔkəm mba marə nɛ̂n kâra ang. A m-ddee to dəw kə̂ gatə gatə mba yeenn ang. Nje-gangə sariya dɔm tə̂ to Əbbə-dəwje.

⁵ Yeenn a, ə-gangəje sariya dɔ dəw tə̂ kete bba karə ndɔɛ̂ asə ang. N-nginanje ndɔ təl lə Əbbə-dəwje. Ne â nâ tee kə nɛ̂n kə̂ iya rɔɛ̂ lo ndul tə̂ kə ddaka ngaâ nâ tɔju kəjəje kə̂ mə dəwje tə̂ kə ddaka. Baann bba dəw kâra kâra a kinga piti kə̂ asə kəm kula laa ji Lubba tə̂.

⁶ Ngakɔnʼmje, mba tar ləse â munn nɛ̂n nɛ̂n-kɔju-marɛ̂ dɔm tə̂ kə dɔ Apolos tə̂, ta karə ə-gərəje nɛ̂n gəl kɔn-tar nəənn: «Nɛ̂n kə̂ n̂-dda makəturu tə̂ njaa maji ta nayn dɔɛ tə̂». Baann bba karə dəw kâra horose tə̂ unda gue ngaâ unn go marə dəw mbətə nɛ̂n marɛ̂ ang.

⁷ Ddi â tɔju to ə-to dəw kə̂ dang wa? Nɛ̂n tɔyn kə̂ ee nɛ̂n to Lubba â ari ang wa? Yeenn a, mba ddi bba aw unda nɛ̂n gui tokə Lubba â ari ang wa?

⁸ A kə̂ ingaje nɛ̂n tɔyn asəse mban le! A kə̂ ə-toje to njê-nɛ̂n-kingaje mban le! A kə̂ aw ɔnje mbay mban, a jeje jɔn mbay ang le! Bbo le to ɔnje mbay le tokə tɔkɔrɔ a, jeje kara ja kɔn kə se mbay tɔ!

⁹ Mba kə̂ kəmʼm tə̂, Lubba undaje jee njê-kaw-kulaje to dəwje kə̂ guku, n-toje tokə lə dəwje kə̂ n̂-gangə sariya-yo dɔde tə̂. Mba n-təlje to əkarə-koko kə̂ duninya tə̂ tɔyn, kəm anjəje tə̂ kə kəm dəwje tə̂.

¹⁰ Jeje n-to mbəje ɔju dɔ Kristə, a sese ə-toje to njê-kəm-karɛje ddəw tə̂ lə Kristə. Jeje, jubba singa ang, a sese ubbaje singa. Dəwje aw ɔsuje gajise, a jeje dooje to nɛ̂n ang.

¹¹ Ndərəng kar tə̂ nəənn, bbo aw ddaje, kunda aw ɔnje, kubbu aw goto rɔje tə̂, dəwje aw ddajeje maji ang, jaw nja taar jəm jəm,

¹² jaw joo ndoo ddəw kula tə̂ kə̂ jaw dda kə jije njaa. Dəwje tajijeje, a n-bbar tar kə̂ maji dɔde tə̂, n̂-ddaje kə je singa, a n-tɔ wurje,

¹³ n̂-tujuje rije, a n-wul məde. Ndərəng bbasinɛn, kəm dəwje tə̂, n-təl to yərəw kə̂ duninya tə̂, n-təl to san-nɛ̂n kə̂ dungu kɔrɔ̂.

Pɔl ndəjə ngannɛ̂

¹⁴ M-dda nɛ̂nje nəənn makəturu tə̂ mba ndəjə nɛ̂n se tokə lə ngannəm kə̂ m-ndikide, bbo m-dda mba kila nɛ̂n rɔ-kul kəmse tə̂ ang.

¹⁵ Mba le eeje kə dəwje doro dɔku kə̂ aw tɔjuse ddəw lə Kristə njaa kara, bɔsese kâra baa. Əman â mujuse ddəw tə̂ lə Jeju-Kristə kə̂ mila mbər Tar kə̂ Maji laa marəse.

¹⁶ Yeenn bba, m-dujuse nya karə ə-ndajimje.

¹⁷ Mba yeenn bba mula nɛ̂n Timɔte marəse. N̂-to ngonn kə̂ m-ndike, ngonn kə̂ to gatə gatə ddəw kula tə̂ lə Əbbə-dəwje. Nâ kole məse dɔ ddəw tə̂ kə̂ maw nja nɛ̂n go Jeju-Kristə tə̂, tokə ye kə̂ maw tɔju loje tə̂ tɔyn kə Egilisije tə̂ tɔyn le.

¹⁸ Marə dəwje horose tə̂ ooje rɔde bo mba dəjəje to mâ tee horose tə̂ ang.

¹⁹ Əbbə-dəwje ndiki a, mâ kaw rɔse tə̂ mbɔr ang. M-tee a, mâ koo tarje ləde kə̂ daw paje ddəm mâ koo nɛ̂n kə̂ dasəje ta dda ddəm.

²⁰ Mba kɔn-mbay lə Lubba to tar kə̂ ta tə̂ ang, to singa-mɔngu.

²¹ Ddi â ə-ndikije wa? Ə-ndikije karə m-ddee rɔse tə̂ kə ndəy wase m-ddee kə ndiki kə kəjə kə wul pee?