1 Kɔrɛntinyɛje 3 - Dɔnɔn kə̂ Siki: Tar kə̂ aw arə təbbə

Tar lə njê-kulaje lə Lubba

¹ Əman, ngakɔnʼmje, m-pa tar marəse tokə lə dəwje kə̂ Ndil-mə-nda goto məde tə̂. M-pa tar marəse tokə dəwje kə̂ baa, tokə lə dəwje kə̂ unnje məde arə Kristə kə̂ sangəje ang bbay.

² Mba â marəse ayje bbo marəse nɛ̂n-kusa kə̂ kətərə ang, mba a kasə singase ang. Kə̂ bbasinɛn nəənn kara asəje ang bbay.

³ Tɔkɔrɔ, ə-naynje ddəw da-rɔ tə̂ baa bbay, mba kunda-mə kə naan kə kɔl-naan nayn horose tə̂. Yeenn a, ə-toje to dəwje kə̂ naynje ddəw da-rɔ tə̂ ngaâ aw ddaje kula-dda lə dəwje kə̂ baa ang wa?

⁴ A bbo marə dəw pa nan: «Əman m-to dəw lə Pɔl», a marɛ̂ pa nan: «Əman m-to dəw lə Apolos» a, yeenn tɔju to ə-naynje to dəwje kə̂ baa ang wa?

⁵ Apolos to nân wa? Pɔl to nân wa? N̂-toje to njê-kulaje lə Lubba baa kə̂ ooje məse tə̂ ddəw tə̂ ləde. Nân nân kara dda kula ddəw gusu tə̂ kə̂ Əbbə-dəwje arɛ̂.

⁶ Əman Pɔl, m-dubbu nɛ̂n, Apolos ungu maann dɔɛ tə̂, a Lubba â dda arə nɛ̂n le tee.

⁷ Yeenn a, dəw kə̂ dubbu nɛ̂n wase dəw kə̂ ungu maann dɔɛ tə̂ toje to nɛ̂n ang, a Lubba kə̂ nje-dda karə nɛ̂n le tee njaa kâra baa â ngəng.

⁸ Dəw kə̂ nje-dubbu nɛ̂n kə dəw kə̂ nje-kungu maann dɔɛ tə̂, dasəje naan. Dâ kinga kuka ləde kâra kâra asə kəm kula kə n̂-ddaje.

⁹ Mba jeje kə Lubba jaw juman naan kula tə̂ ngaâ ə-toje tokə lə ndɔɔ lə Lubba, sese ə-toje tokə lə kəy lə Lubba.

¹⁰ Lubba dda səm mə-maji arə m-ddee to dəw kə̂ gərə gusu kɔsu kəy. Mungu gɔl kəy nangə̂ ngaâ marə dəw ɔsu kəy le dɔɛ tə̂. A maji karə dəw kâra kâra kə̂ aw ɔsu kəy le aa ddəw kə̂ naw nɔsu nɛ̂n kə majɛ̂ bba.

¹¹ Marə dəw kə̂ dang a təl kungu marə gɔl kəy le nangə̂ ang ngaa. Jeju-Kristə njaa to gɔl kəy le.

¹² Bbo marə dəw ɔsu kəy dɔ gɔl kəy tə̂ le kə andə wase narɛ wase ər wase kakə kə muje dang dang a,

¹³ kula lə dəw kâra kâra a tee kə ddaka kəm dəwje tə̂ ndɔ gangə sariya tə̂. Dâ nan kula lə dəw kâra kâra kə puru ta gərə.

¹⁴ Dəw kə̂ puru ɔn kula laa ang a, a kinga kuka laa.

¹⁵ A dəw kə̂ puru ɔn kula laa kə̂ n̂-dda, a kinga kuka laa ang. Nâ tee ta yo tə̂ tokə dəw kə̂ unda lo tee kəm puru tə̂.

¹⁶ Ə-gərəje ang wa? Ə-toje to kəy-polo Lubba ngaâ Ndil lə Lubba isi məse tə̂.

¹⁷ Bbo dəw tuju kəy-polo Lubba a, Lubba a tuju dəw le. Mba kəy-polo Lubba maji tɔyn. Sese â ə-toje to kəy-polo Lubba le.

¹⁸ Maji karə dəw kâra ərə rɔɛ̂ ang. Bbo marə dəw horose tə̂ oo rɔɛ̂ to nje-kəm-karɛ ddəw nɛ̂nje tə̂ kə̂ dɔ nangə tə̂ nəənn a, maji karə noo rɔɛ̂ to mbə bba nâ ddee to nje-kəm-karɛ kə̂ tɔkɔrɔ.

¹⁹ Mba kəm-karɛ kə̂ duninya tə̂ nəənn to nɛ̂n-mbə kəm Lubba tə̂. Mba Makəturu lə Lubba pa nan: «Njê-kəm-karɛje aw osoje mə ji Lubba tə̂ ddəw tar ngəm tə̂ ləde njaa.»

²⁰ Duja makəturu tə̂ bbay nan: «Əbbə-dəwje gərə kəjə lə njê-kəm-karɛje. N̂-gərə kə majɛ̂ to ture goto.»

²¹ Yeenn a, maji karə dəw unda gue mba marə dəw ang. Mba nɛ̂nje tɔyn to nɛ̂nje ləse.

²² Pɔl, Apolos, wase Sepas, duninya nəənn, təbbə, yo, nɛ̂nje kə̂ bbokənɛn kə nɛ̂nje kə̂ a ddeeje bara tɔyn to nɛ̂nje ləse.

²³ A sese, ə-toje to ənga Kristə ngaâ Kristə to ənga Lubba.