1 Kɔrɛntinyɛje 2 - Dɔnɔn kə̂ Siki: Tar kə̂ aw arə təbbə

Pɔl ila mbər tar lə Kristə kə̂ n̂-tɔlɛ̂ kakə-dəsə tə̂

¹ Ngakɔnʼmje, ndɔ tə̂ kə̂ m-tee nɛ̂n rɔse tə̂ mba kila mbər tar nɛ̂n kə̂ Lubba ndiki ta dda kə̂ nayn lo-kiyɛ̂ tə̂ bbay le, tarje kə̂ toje to ngɔɛ̂ ngɔɛ̂ wase tar kəm-karɛ â mila nɛ̂n mbər le marəse ang.

² Mba kar kə̂ m-nayn nɛ̂n horose tə̂ le, m-ndiki ta gərə marə nɛ̂n dang ang. Bbayɛ̂ njaa to Jeju-Kristə, Jeju-Kristə kə̂ n̂-tɔlɛ̂ kakə-dəsə tə̂.

³ Mba yeenn bba, ndɔ kə̂ maw nɛ̂n rɔse tə̂ le singam goto, m-bbəəl ngaâ misa nya.

⁴ Tarje ləm kə nɛ̂n-tɔjuje ləm to tokə lə dəwje kə̂ aw unnje tar kəm-karɛ lə dəwje bba aw buje nɛ̂n njê-marədeje ang. Lubba â tɔju ddəw singa-mɔngu tə̂ lə Ndil-mə-nda to tarje ləm toje to tar kə̂ tɔkɔrɔ.

⁵ Baann bba karə mə-kunn ləse ar dɔ singa-mɔngu tə̂ lə Lubba bbo ar dɔ kəm-karɛ tə̂ kə̂ nangə̂ nəənn ang.

Kəm-karɛ lə Lubba

⁶ Ta koo a, to kəm-karɛ njaa â jaw tɔju njê-mə-kunnje kə̂ sangəje. Kəm-karɛ le to kəm-karɛ kə̂ nangə̂ nəənn ang ddəm kəm-karɛ lə njê-kɔn-bbeje kə̂ dɔ nangə tə̂ nəənn ang ddəm, mba Lubba a tujude kə ddang.

⁷ Jaw tɔju kəm-karɛ lə Lubba kə̂ to nɛ̂n kə̂ dum dɔ dəw ngaâ iya rɔɛ̂. Kete bba karə duninya to le, Lubba gɔl kəm-karɛ le tokə kete, ta dda karə jinga nɛ̂n piti laa.

⁸ Dəw kâra horo njê-kɔn-bbeje tə̂ kə̂ nangə̂ nəənn gərə kəm-karɛ le ang. Bbo n̂-gərəje kəm-karɛ le a, dâ tɔlje Əbbə-dəwje kə̂ piti to laa le kakə-dəsə tə̂ ang.

⁹ Ddəw kâra baa tokə Makəturu lə Lubba pa tarɛ̂ nan: «Nɛ̂n kə̂ kəm dəw oo ang ddəm mbi dəw oo ang ddəm Nɛ̂n kə̂ dəw əjə ndɔ kâra ang, Lubba gɔl mba dəwje kə̂ ndikeje.»

¹⁰ A jeje â Lubba arə Ndil-mə-nda tɔju nɛ̂nje le kə ddaka arəje. Mba Ndil-mə-nda gərə nɛ̂nje tɔyn. Nɛ̂nje lə Lubba kə̂ nayn lo-kiyɛ̂ tə̂ kara n̂-gərə.

¹¹ Nân bba a kasə gərə kəjə lə nje-marɛ̂ wa? Ndil dəw â gərə nɛ̂n kə̂ to mə dəw tə̂. Ddəw kâra baa, dəw gərə kəjə lə Lubba ang, Ndil lə Lubba â gərə kəjə laa.

¹² Jeje, ndil kə duninya tə̂ nəənn â jingaje ang, Ndil kə̂ in rɔ Lubba tə̂ â jingaje. Baann bba ja gərəje nɛ̂n kə̂ Lubba arəje ddəw mə-maji tə̂ laa.

¹³ Yeenn a, jaw junn tar kəm-karɛ lə dəwje bba jaw pa nɛ̂n tarɛ̂ ang. Jaw pa tarɛ̂ ddəw tar tə̂ kə̂ Ndil lə Lubba tɔjuje.

¹⁴ Dəw kə̂ Ndil lə Lubba goto rɔɛ̂ tə̂ a ndiki tə̂ kə nɛ̂nje lə Ndil lə Lubba ang, mba noo kəmɛ̂ tə̂ to nɛ̂n-mbə baa. Nâ kasə ta gərə gəle ang, mba ddəw Ndil tə̂ bba dəw a kasə ta gərə gəle.

¹⁵ A dəw kə̂ Ndil lə Lubba to rɔɛ̂ tə̂ gərə gəl nɛ̂nje tɔyn. A ne, dəw kə̂ nje-gərə gəle goto.

¹⁶ Mba Makəturu lə Lubba pa nan: «Nân â gərə kəjə lə Əbbə-dəwje wa? Nân â asə ndəjə Əbbə-dəwje wa?» A jeje, jeeje kə kəjə lə Kristə.