1 Kɔrɛntinyɛje 16 - Dɔnɔn kə̂ Siki: Tar kə̂ aw arə təbbə

Tar mbɔn nɛ̂n mba Egilisi kə̂ Jerujalɛm

¹ Tar kə̂ ɔju dɔ nɛ̂n-mbɔn mba njê-mə-kunnje kə̂ Jerujalɛm le, maji karə sese kara, ə-ddaje kə turu ndu kə̂ munn marə Egilisije kə̂ Galasi le.

² Kə ndɔ-kuwa-rɔ kâra kâra tɔyn, maji karə dəw kâra kâra unn marə nɛ̂n ngəm dang kə̂y laa, mba karə ndɔ kə̂ m-tee bba unnje kutu mbɔn nɛ̂n-karə-baa le ang.

³ Ndɔ kə̂ m-tee nu a, mâ dda makəturu kula ji dəwje tə̂ kə̂ ə-mbərəjede le bba karə dawje nɛ̂n kə nɛ̂n-karə-baa le Jerujalɛm.

⁴ Bbo to maji karə əman njaa maw tɔ a, dâ kaw səm.

Pɔl ndiki ta kaw marə lo tə̂

⁵ Mâ kaw bbe ləse kə ddəw kə̂ Maseduwann mba mâ nday dɔ nangə tə̂ kə̂ Maseduwann le.

⁶ Ddəw to a, mâ nayn rɔse tə̂ ngaji, ang a, nɛyn-kul a nday tɔyn dɔm tə̂ rɔse tə̂ karə ta umamje nja tə̂ ləm kə̂ nayn kə kete bbay.

⁷ M-ndiki ta koose a nday to nday ang. Bbo Əbbə-dəwje ndiki a, munda məm ta nayn kə se ngaji.

⁸ A mâ nayn Epɛjə ndərəng ndɔ Pantekotə tə̂.

⁹ Mba ddəw ɔru tokə bo arəm karə m-dda kula lo tə̂ənn, a njê-baanje ləm banyaje nya.

¹⁰ Bbo Timɔte ddee a, ə-ddaje arə nisi horose tə̂ kə bbəəl ang. Mba naw dda kula lə Əbbə-dəwje tokə ləm tɔ.

¹¹ Maji karə dəw kâra yabbɛ̂ ang. Umɛ̂nje arəje n̂-təl kə mə-wul-lɔm n̂-ddee rɔm tə̂, mba əman je kə njê-mə-kunnje jaw ngəbbe.

¹² Tar kə̂ ɔju dɔ ngokɔnje Apolos le, mɔsu kute nya karə naw kə marə njê-mə-kunnje naw noose. A n̂-ndiki ta kaw kə bbasinɛn nəənn ang. Ninga ddəw bba nâ kaw.

Kəsə tarje

¹³ Maji karə undaje kəmse dɔ rɔse tə̂, uwaje mə-kunn ləse arə ngəng, uwaje rɔse to dingawje, ə-ngəngje dɔ rɔse tə̂.

¹⁴ Ə-ddaje nɛ̂n tɔyn ddəw ndiki tə̂.

¹⁵ Ngakɔnʼmje, ə-gərəje to Ɛstepanas de kə njê kə̂ kə̂y laa n̂-toje to dəwje kə̂ Akay kə̂ dɔngɔr kə̂ ooje məde tə̂ ngaâ dumanje njê-mə-kunnje nya.

¹⁶ Yeenn a, maji karə ooje ta dəwje kə̂ tokə baann ddəm ooje ta dəwje kə̂ aw ilaje rɔde kula tə̂ kə de ddəm.

¹⁷ Rɔm nəələm nya mba Ɛstepanas, Porutunatus kə Asaykus kə̂ n̂-ddee doomje. Dede ngaâ n̂-ndayje turuse.

¹⁸ N̂-ddaje darə wurum ddəm wurse ddəm oso nangə̂. Maji karə ə-gərəje go kula kə̂ maji kə̂ dəwje kə̂ baann aw ddaje.

¹⁹ Njê-mə-kunnje kə̂ Aji ddase lapiya. Akilas de kə Pirisil kə njê-mə-kunnje kə̂ aw mbɔnje naan mə kəy tə̂ ləde n̂-ddase lapiya kə ri Əbbə-dəwje.

²⁰ Njê-mə-kunnje tɔyn kə̂ eeje nəənn ddase lapiya. Ə-ddaje naan lapiya ə-toje nɛ̂n mbi naan tokə ngakɔn-naan.

²¹ Əman Pɔl muja tar lapiya nəənn makəturu tə̂ kə jim njaa.

²² Bbo marə dəw to nam Əbbə-dəwje ang a, maji karə ndu-ndɔɔl to dɔɛ̂ tə̂! Maranata.

²³ Maji karə mə-maji lə Əbbə-dəwje Jeju nayn kə se.

²⁴ M-ndikise tɔyn ddəw mə-kâra tə̂ kə̂ n-ddaje kə Jeju-Kristə.