1 Kɔrɛntinyɛje 15 - Dɔnɔn kə̂ Siki: Tar kə̂ aw arə təbbə

Kristə le oy ngaâ ndol

¹ Ngakɔnʼmje, m-ndiki ta kole məse dɔ Tar tə̂ kə̂ Maji kə̂ mila mbəre marəse ngaâ ə-taaje, aw uwaje arə ngəng le.

² Bbo ə-ngəmje Tar kə̂ Maji le kə ddəwe kə̂ m-tɔju nɛ̂n se a, Tar le a kajise. Baann ang a, mə-kunn ləse a to nɛ̂n kə̂ baa.

³ Nɛ̂n kə̂ m-tɔjuse dɔngɔr le, to nɛ̂n kə̂ əman njaa n̂-tɔjum: Kristə le oy mba majang ləje tokə makəturu lə Lubba pa kete le.

⁴ N̂-dubbe dda ndɔ mota a, n̂-ndol tokə makəturu lə Lubba pa le.

⁵ N̂-tee ninga Piyɛr, goe tə̂ a, ninga njê-njaje goe tə̂ kə̂ dɔku gire joo le.

⁶ Goe tə̂ a, n̂-tee ninga njê-mə-kunnje kə̂ kɔrde uta kɔr min naan tə̂ kâra baa. Marɛ̂je nya horode tə̂ isije kəm baa bbay, a marɛ̂je oyje mban.

⁷ Goe tə̂ a, n̂-tee ninga Jakə ngaâ ninga njê-kaw-kulaje tɔyn.

⁸ Ta kutu nɛ̂n dɔɛ̂ a, gode tə̂ tɔyn, n̂-tee ningam tɔ, əman kə̂ m-to tokə ngonn kə̂ kɔɛ̂nje ɔrɛ̂ to kɔru.

⁹ Mba m-to tɛn baa horo njê-kaw-kulaje tə̂ tɔyn. Masə karə n̂-bbarəm to nje-kaw-kula ang, mba mula kəm Egilisi lə Lubba ndoo tə̂.

¹⁰ A ddəw mə-maji tə̂ lə Lubba â m-ddee tokə be nəənn. Mə-maji laa kə̂ n̂-dda səm le to baa njaa baann ang. M-dda kula nya muta kəsə njê-kaw-kulaje tɔyn. Əman njaa m-dda kula le dɔ singam tə̂ ang, mə-maji lə Lubba le â dda kula ddəw tə̂ ləm.

¹¹ Yeenn a, le to əman wase marə njê-kaw-kulaje kara, nɛ̂ɛnn â jila mbəre. Nɛ̂ɛnn â ooje nɛ̂n məse tə̂.

Tar ndol lə dəwje kə̂ oyje

¹² Bbo jaw jila mbər n-pa nan Kristə kə̂ oy le ndol a, tokə baânn bba marə dəwje horose tə̂ aw paje nan dəwje kə̂ oyje a ndolje ang wa?

¹³ A bbo ndol lə dəwje kə̂ oyje goto a, yeenn, Kristə le kara ndol ang tɔ.

¹⁴ A bbo Kristə le ndol ang a, tar kə̂ jaw jila nɛ̂n mbər to nɛ̂n kə̂ baa ngaâ mə-kunn ləse to nɛ̂n kə̂ baa tɔ.

¹⁵ Tɔ bbay, bbo dəwje kə̂ oyje aw ndolje tɔkɔrɔ ang a, yeenn pa nan Lubba ndol Kristə kə̂ oy le ang tɔ. Yeenn a, ja toje to njê-tar-najije lə Lubba kə̂ toje to njê-ngəmje, mba jaw pa nan Lubba ndol Kristə kə̂ oy le.

¹⁶ Bbo njê kə̂ oyje a ndolje ang a, Kristə le ndol ang tɔ.

¹⁷ A bbo Kristə le ndol ang a, mə-kunn ləse to nɛ̂n kə̂ baa, ə-naynje mə nɛ̂n-dda tə̂ kə̂ maji ang ləse bbay.

¹⁸ Yeenn tɔju to dəwje kə̂ ooje məde tə̂ kə Kristə bba oyje le naynje kə kɔrɔ̂ baa.

¹⁹ Bbo jaw jundaje məje dɔ Kristə tə̂ mba təbbə kə̂ jisi nɛ̂n bbokənɛn nəənn njaa a, n-toje to ndoo uta kəsə dəwje tɔyn.

²⁰ A tɔkɔrɔ njaa, Kristə le ndol. Horo dəwje tə̂ kə̂ oyje, n̂-to dɔngɔr dəw kə̂ ndol ta tɔju to dəwje kə̂ oyje a ndolje tɔ.

²¹ Mba yo ddee ddəw tə̂ lə marə dəw kara, a ndol lə dəwje kə̂ oyje ddee ddəw tə̂ lə marə dəw kâra tɔ.

²² Dəwje tɔyn oyje mba n̂-toje kâra baa kə Adam, ddəw kâra baa, dəwje tɔyn a kingaje təbbə mba n̂-toje kâra baa kə Kristə le.

²³ A dəwje kâra kâra tɔyn a ndolje kə goe goe. Kristə to dɔngɔr dəw kə̂ ndol. Goe tə̂ a, dəwje kə̂ toje to dəwje laa a ndolje ndɔ tə̂ kə̂ nâ ddee.

²⁴ Kristə a guru singa ndilje kə̂ maji ang tɔyn kə̂ aw ɔnje mbay kə singa-mɔnguje tɔyn. Goe tə̂ a, to dɔbɔyn nɛ̂n. Nâ təl kə kɔn-mbay le karə Lubba kə Bɔ.

²⁵ Mba maji karə nɔn bbe ndərəng ndɔ kə̂ bɔɛ̂je a kungu njê-baanje laa tɔyn kɔ gɔlɛ̂ tə̂.

²⁶ Yo a to dɔbɔyn nje-baan kə̂ nâ tuje.

²⁷ Mba makəturu lə Lubba pa nan: «Lubba ungu nɛ̂nje tɔyn kɔ gɔlɛ̂ tə̂.» A tar nəənn a ta pa nan Lubba kə̂ ungu nɛ̂n tɔyn kɔ gɔl Kristə tə̂ le njaa kara ee kɔ gɔl Kristə tə̂ tɔ ang.

²⁸ Bbo nɛ̂n tɔyn ddee kɔ gɔl Kristə tə̂ le mban a, Ngonn le a təl kɔ gɔl Lubba tə̂. Baann bba Lubba a kɔn dɔ nɛ̂nje tɔyn tɔyn.

²⁹ Əjəje tar lə marə dəwje kə̂ aw ddaje batɛm mba dəwje kə̂ oyje. Ddi â daw sangəje wa? Bbo dəwje kə̂ oyje a ndolje ang a, mba ddi bba daw ddaje batɛm mbade wa?

³⁰ A jeje njaa, mba ddi bba kə ndɔ tɔyn jaw jilaje rɔje kɔrɔ̂ wa?

³¹ Mərəse ang, ngakɔnʼmje kə ndɔ kâra kâra tɔyn yo aw bbərə gom. Tɔkɔrɔ njaa rɔm nəələm nya mbase, sese kə̂ əman kə se n-ddaje mə-kâra kə Əbbəjeje Jeju-Kristə le.

³² Bbo maw məjə tar tokə lə dəwje a, mâ dda ddɔ kə dəwje kə̂ Epɛjə kə̂ toje tokə lə daje kə̂ muû mba ddi wa? Bbo ndol lə dəwje kə̂ oyje goto a, maji karə n-ddaje tokə marə dəwje kə̂ aw paje nan: «Jusaje ta jayje mba ndɔ kə̂ bara a, ja koyje.»

³³ Ərəje rɔse ang: «Dəw kə̂ uwa go nje-nɛ̂n-dda kə̂ maji ang, a ddee to nje-nɛ̂n-dda kə̂ maji ang tɔ.»

³⁴ Maji karə ə-təlje uwaje dɔse kə majɛ̂, inyaje nɛ̂n-ddaje kə̂ maji ang. Mba marə dəwje horose tə̂ gərəje Lubba ang. M-pa baann karə rɔ-kul ddase.

Dəwje kə̂ oyje a ndolje tokə baânn wa?

³⁵ A marə dəwje a paje nan: «Dəwje kə̂ oyje a ndolje tokə baânn wa? Da-rɔ kə̂ baânn bba dâ ndol nɛ̂n wa?»

³⁶ Mbə! Kandə-ko kə̂ əi njaa ə-dubbu le oy bba tee.

³⁷ Nɛ̂n kə̂ ə-dubbu le to da-rɔ nɛ̂n le njaa ə-dubbu ang, to kandə-ko baa. A du ang to kandə waa wase marə kandə-ko kə̂ dang â ə-dubbu.

³⁸ Goe tə̂ a, Lubba dda arə kandə-ko le unn rɔ nɛ̂n le tokə məɛ̂ ndiki ngaâ narə kandə-ko kâra kâra tee kə kakɛ̂ kakɛ̂.

³⁹ Taal rɔ asə naan tɔyn ang. Taal dəwje to dang kə taal daje, taal əəlje to dang kə taal kanjije tɔ.

⁴⁰ Rɔ nɛ̂nje kə̂ darâ to dang, a rɔ nɛ̂nje kə̂ nangə̂ to dang. Ndoko lə nɛ̂n kə̂ darâ to dang, a ndoko lə nɛ̂n kə̂ nangə̂ to dang tɔ.

⁴¹ Ndoko lə kar to dang, nda lə nɛyn to dang, ndoko lə əndɛtɛrɛndɛnje to dang. Horo əndɛtɛrɛndɛnje tə̂ kara ndoko ləde to dang dang tɔ.

⁴² Ndol lə dəwje kə̂ oyje to tokə baann tɔ. Rɔ kə̂ n̂-dubbu le tuju. A rɔ kə̂ a ndol le tuju ang.

⁴³ Rɔ kə̂ n̂-dubbu le to ndoo, a rɔ kə̂ a ndol le to nɛ̂n piti. Rɔ kə̂ n̂-ndubbu le ubba singa ang, a rɔ kə̂ a ndol le ubba singa.

⁴⁴ Rɔ kə̂ n̂-dubbu le to rɔ dəw kə̂ baa. A rɔ kə̂ a ndol le to rɔ kə̂ Ndil lə Lubba arɛ̂ təbbə. Bbo rɔ kə̂ to rɔ dəw baa to a, yeenn pa nan rɔ kə̂ Ndil arɛ̂ təbbə to tɔ.

⁴⁵ Yeenn bba, Makəturu lə Lubba pa nan: «Adam kə̂ to dəw kə̂ dɔngɔr le ddee to dəw kə̂ ee kə təbbə. A Adam kə̂ dɔ guku a to ndil kə̂ aw arə təbbə dəwje.»

⁴⁶ A ne kə̂ n̂-to dəw-ndil le â n̂-ddee dɔngɔr ang. Ne kə̂ n̂-to dəw kə̂ baa â n̂-ddee dɔngɔr. Goe tə̂ bba dəw-ndil le ddee.

⁴⁷ Lubba dda Adam kə̂ dɔngɔr kə əbaburu nangə. A Adam kə̂ joo laa in darâ bba ddee.

⁴⁸ Dəwje kə̂ nangə̂ toje ddəw kâra baa kə dəw kə̂ Lubba ddɛɛ̂ kə əbaburu nangə. Dəwje kə̂ darâ toje ddəw kâra baa kə dəw kə̂ in darâ bba ddee.

⁴⁹ Ddəw kâra baa tokə jundaje rɔ dəw kə̂ Lubba ddɛɛ̂ kə əbaburu nangə le, ja kundaje rɔ dəw kə̂ in darâ bba ddee le tɔ.

⁵⁰ Ngakɔnʼmje, nɛ̂n kə̂ m-ndiki ta pa â nəənn: Da-rɔ dəw a kasə ta kandə mə Bbe-kɔn tə̂ lə Lubba ang. Nɛ̂n kə̂ aw oy a kasə ta nayn kə təbbə kə̂ to kə ndɔ kə ndɔ ang.

⁵¹ Mâ pa tar nɛ̂n kə̂ to lo-kiyɛ̂ tə̂ karə ooje. Jeje tɔyn ja koyje ang, a jeje tɔyn ja turuje to dang

⁵² kə ngɔru baa tokə dəw kə̂ tuka kəmɛ̂, kar tə̂ kə̂ dɔbɔyn təbbə-narɛ a bbar. Mba bbo təbbə-narɛ bbar a, dəwje kə̂ oyje a ndolje kə rɔ kə̂ a tuju ang, a jeje, ja turuje to dang.

⁵³ Mba maji karə rɔ kə̂ a tuju le turu to rɔ kə̂ a tuju ang. Maji karə rɔ kə̂ a koy turu to rɔ kə̂ a koy ang.

⁵⁴ Ndɔ kə̂ rɔ kə̂ a tuju le turu to rɔ kə̂ a tuju ang ngaâ rɔ kə̂ a koy le turu to rɔ kə̂ a koy ang a, tar kə̂ makəturu tə̂ lə Lubba a ddee to nɛ̂n kə̂ tɔkɔrɔ. Tar le nan: «N̂-tuju yo kə ddang ngaa, to ndɔ tətə ddɔ kə bo.»

⁵⁵ «Yo, singai kə̂ aw tɔl nɛ̂n dəwje le ee dda wa? Yo, nɛ̂n kə̂ aw tɔl nɛ̂n dəwje le ee dda wa?»

⁵⁶ Nɛ̂n kə̂ yo aw tɔl nɛ̂n dəwje to majang, a ndu aw dda arə majang aw inga singa.

⁵⁷ A jarəje wooyo Lubba kə̂ dda arə n-tətə ddɔ ddəw tə̂ lə Əbbəjeje Jeju-Kristə.

⁵⁸ Yeenn a, ngakɔnʼmje kə̂ m-ndikise nya, uwaje arə ngəng, arəje nɛ̂n yəkəse ang. Ə-ddaje arə kula lə Əbbə-dəwje aw kə kete kete bbo inyaje ddəwe ang, mba ə-gərəje kə majɛ̂ to kula kə̂ aw ddaje ddəw mə-kâra tə̂ kə Əbbə-dəwje a to baa ang.