1 Kɔrɛntinyɛje 14 - Dɔnɔn kə̂ Siki: Tar kə̂ aw arə təbbə

Ndəjəje dɔ gusuje tə̂ kə̂ Ndil-mə-nda arə dəwje

¹ To tar ləse ta sangə ddəw nya mba ndiki njê-marəseje. To tar ləse ta dda bbo gusu kulaje lə Ndil, uta tɔyn gusu kila mbər tar lə Lubba.

² Dəw kə̂ aw pa tar kə ndɔn-tarje kə̂ dəw gərə ang, pa tar le arə Lubba bbo n̂-pa narə dəwje ang. Mba dəw kâra oo kandə tar laa le ang. Naw pa nɛ̂nje kə̂ to lo-kiyɛ̂ tə̂ ddəw tə̂ lə Ndil-mə-nda.

³ A dəw kə̂ aw ila mbər tar lə Lubba, ila mbər le arə dəwje karə mə-kunn ləde sangə, karə dingaje singa ngaâ məde wul.

⁴ Dəw kə̂ aw pa tar kə ndɔn-tarje kə̂ dəw gərə ang dda arə mə-kunn laa njaa sangə. A dəw kə̂ aw ila mbər tar lə Lubba dda arə njê-mə-kunnje tɔyn sangəje.

⁵ M-ndiki karə sese tɔyn ə-paje tar kə ndɔn-tarje kə̂ dəw gərə ang le njaa. A m-ndiki nya karə ilaje mbər tar lə Lubba. Mba dəw kə̂ aw ila mbər tar lə Lubba arə njê-marɛ̂je â ngəng uta dəw kə̂ aw pa tar kə ndɔn-tarje kə̂ dəw gərə ang. Baann ang a, maji kar marə dəw ndaji tar kə̂ dəw aw pa kə ndɔn-tar kə̂ dang le bba a kuman Egilisi.

⁶ Ngakɔnʼmje, bbo m-tee horose tə̂ ngaâ maw pa kəsə tar kə ndɔn-tarje kə̂ dəw gərə ang a, ddi kə̂ maji â, â kingaje ddəw tə̂ ləm wa? Maji karə m-pa tar nɛ̂n kə̂ Lubba tɔjum marəse, m-pa tar nɛ̂n-gərə marəse, m-ndaji tar kə̂ ta Lubba tə̂ marəse wase m-tɔjuse nɛ̂n bba a dda kə se maji.

⁷ Junnje nɛ̂n-kɔju-marɛ̂ dɔ nɛ̂n-kəmje tə̂ kə̂ kɔrɛ̂ aw bbar tokə kɔl mbula wase kəm konde. Bbo kɔru nɛ̂njeenn bbarje ddəw kâra baa a, ja kayn horode tokə baânn wa?

⁸ Â bbo təbbə-ddɔ bbar kə majɛ̂ ang a, nân bba a gɔl rɔɛ̂ mba ddɔ wa?

⁹ Ddəw kâra baa, bbo ndɔn-tar kə̂ aw paje le kandɛ̂ goto a, dəw a gərə nɛ̂n kə̂ aw paje tokə baânn wa? Nayn to aw paje tar mə ləl tə̂ baa.

¹⁰ Ndɔn-tarje dang dang kə̂ dɔ nangə tə̂ nəənn banya nya njaa, a kandə tarje le toje tɔyn.

¹¹ Bbo moo marə ndɔn-tar ang a, mâ koo dəw kə̂ aw pa ndɔn-tar le to nje-mba kəmʼm tə̂ ngaâ nâ koom to nje-mba kəmɛ̂ tə̂ tɔ.

¹² Ddəw kâra baa, sese ə-ndikije nya ta kinga gusuje lə Ndil. Yeenn a, maji karə ə-sangəje gusuje kə̂ a kasəje ta dda karə Egilisi ubba singa.

¹³ Yeenn bba, maji karə dəw kə̂ aw pa ndɔn-tar kə̂ dəw gərə ang duju Lubba mba kinga gusu ndaji nɛ̂n kandə tar le.

¹⁴ Bbo maw duju Lubba kə ndɔn-tar kə̂ dang a, ndilim â aw duju Lubba. A nɛ̂n-gərə ləm dda nɛ̂n kâra ang.

¹⁵ Yeenn a, ddi â mâ dda wa? Mâ duju Lubba kə ndilim, a mâ duju Lubba kə nɛ̂n-gərə ləm tɔ. Mâ kɔsu pa kə ndilim, a mâ kusa pa kə nɛ̂n-gərə ləm tɔ.

¹⁶ Bbo aw duju Lubba mba karə nɛ̂n wooyo kə ndili a, dəw kə̂ oo ndɔn-tar kə̂ aw pa le ang le a pa nan «Amɛnn» mba duju ləi le tɔkə baânn wa? Mba ne n̂-gərə kandə tar kə̂ aw pa le ang.

¹⁷ Tɔkɔrɔ aw arə wooyo Lubba kə majɛ̂ njaa. A nje-mari ubba singa ddəwe tə̂ ang.

¹⁸ Marə wooyo Lubba, mba m-pa tar kə ndɔn-tarje kə̂ dang mutase tɔyn.

¹⁹ A bbo mar nɔn njê-mə-kunnje tə̂ a, m-ndiki nya ta pa kandə tar min kə ndɔn-tar kə̂ dəwje gərəje uta ye kə̂ ta pa kandə tar doro dɔku kə ndɔn-tarje kə̂ dəwje gərəje ang. Baann bba mâ tɔju nɛ̂n kəsə dəwje.

²⁰ Ngakɔnʼmje, maji karə ə-paje tar tokə lə ngannje ang. Maji karə ə-ddeeje tokə lə ngannje kə̂ ngaji kə̂ gərəje ta dda majang ang. A ə-paje tar tokə njê kə̂ tɔkə.

²¹ Mə Makəturu-Ndu tə̂ Lubba pa nan: «Əbbə-dəwje pa nan: Mâ pa tar kə dəwje kə̂ Ijarayɛl ddəw tə̂ lə dəwje kə̂ aw paje ndɔn-tarje kə̂ dəw gərə ang. Mâ pa tar kə de ddəw tə̂ lə njê-mbaje. Yeenn njaa kara dâ ndikije ta koo tar ləm ang.»

²² Yeenn a, pa tar kə ndɔn-tarje kə̂ dang to nɛ̂n kə̂ aw tɔju marə nɛ̂n mba dəwje kə̂ ooje məde tə̂ ang, bbo to mba dəwje kə̂ ooje məde tə̂ mban ang. Mbər-tar lə Lubba to nɛ̂n kə̂ aw tɔju marə nɛ̂n mba dəwje kə̂ ooje məde tə̂ mban, bbo to mba dəwje kə̂ ooje məde tə̂ ang bbay ang.

²³ Bbo njê-mə-kunnje tɔyn uwaje dɔ naan lo tə̂ kâra baa ngaâ dede tɔyn daw paje ndɔn-tarje kə̂ dang dang ngaâ bbo dəwje kə̂ baa wase dəwje kə̂ ooje məde tə̂ ang aw ingade a, dâ koode to njê-wooyje ang wa?

²⁴ Bbo sese tɔyn aw ilaje mbər tar lə Lubba ngaâ marə dəw kə̂ unn məɛ̂ ang wase marə dəw kə̂ baa andə dɔse tə̂ a, nâ gərə majang laa. Tar kə̂ noo le a gangə sariya dɔɛ̂ tə̂.

²⁵ Nɛ̂nje kə̂ toje lo-kiyɛ̂ tə̂ məɛ̂ tə̂ a teeje kə ddaka ngaâ nâ tee koso dəbbə kəmɛ̂ nangə̂, nâ wal Lubba ngaâ nâ pa nan Lubba ee horose tə̂ tɔkɔrɔ njaa.

Nɛ̂n kə̂ ta dda lo mbɔn-naan tə̂

²⁶ Yeenn a, ngakɔnjeje, ddi â to maji ta dda wa? Bbo ə-mbɔnje naan a, nân nân kara a kasə ta kɔsu pa, ta tɔju nɛ̂n wase pa tar marə nɛ̂n kə̂ Lubba tɔjɛ̂ kə ddaka, pa tar kə ndɔn-tarje kə̂ dang wase ndaji kandə tarje le. A maji karə ə-ddaje nɛ̂nje tɔyn karə arə singa dəwje tɔyn.

²⁷ Bbo marə dəwje ndikije ta pa ndɔn-tarje kə̂ dang a, maji karə dəwje joo wase motajeenn be â paje tar le go naan tə̂. A maji karə marɛ̂ ndaji kandə tar le.

²⁸ Bbo nje-ndaji kandə tar le goto a, maji karə ngakɔnje kə̂ a ta pa tar kə ndɔn-tarje kə̂ dang le utuje tade lo mbɔn-naan tə̂ le. Maji karə n̂-paje tar le məde tə̂ ngaâ n̂-paje tar le darəje Lubba.

²⁹ Nɛ̂n kə̂ ɔju dɔ kila mbər tar lə Lubba, maji karə dəwje joo wase mota paje tar. A kəseje isaje tar le ooje.

³⁰ Â bbo Lubba pa marə nɛ̂n arə marə dəw horo njê-mbɔn naanje tə̂ le a, maji karə dəw kə̂ nayn aw pa tar bbay əw rɔɛ̂.

³¹ Sese tɔyn asəje ta kila mbər tar lə Lubba. A maji karə ə-paje tar le kâra kâra go naan tə̂, mba karə dəwje tɔyn gərəje nɛ̂n ngaâ ingaje singa.

³² Njê-kilaje mbər tar lə Lubba ɔnje dɔ gusu kila mbər tar kə̂ Ndil arəde le.

³³ Mba Lubba to nje-nɛ̂n-dda kə̂ ngabula ang, n̂-to Lubba kə̂ nje-mə-wul-lɔm. Ddəw kâra baa tokə daw ddaje Egilisije tə̂ lə dəwje lə Lubba tɔyn le,

³⁴ to tar lə dɛnɛ̂nje ta kutu tade lo mbɔn-naan tə̂. Darəde ddəw karə n̂-paje tar ang. Maji karə disije ddekeke ngaâ dooje ta dingawje tokə Makəturu-Ndu pa.

³⁵ Bbo n̂-ndikije ta gərə tar dɔ marə nɛ̂n tə̂ a, maji karə n̂-dujuje ngawdedeje ta-kəy tə̂. Bbo dɛnɛ̂n pa tar lo mbɔn-naanje tə̂ a, to kə ddəwe ang.

³⁶ Wase, əjəje to tar lə Lubba le unn kute bbe ləse wa? Wase sese kə karəse baa njaa tar le tee bbe ləse wa?

³⁷ Bbo marə dəw oo rɔɛ̂ to nje-kila mbər tar lə Lubba wase oo to Ndil tɔjɛ̂ marə nɛ̂n a, maji karə n̂-gərə to tar kə̂ makəturu tə̂ kə̂ maw dda marəse nəənn to ndu kə̂ Əbbəjeje â unn.

³⁸ Â bbo marə dəw gərə to ndu nəənn to ndu lə Əbbə-dəwje ang a, Lubba a gərə dəw le ang tɔ.

³⁹ Yeenn a, ngakɔnʼmje, maji karə ə-sangəje ddəw ta kila mbər tar lə Lubba, a ɔkuje ddəw karə dəwje paje tar kə ndɔn-tarje kə̂ dang ang.

⁴⁰ A maji karə ə-ddaje nɛ̂nje kə majɛ̂ ddəm kə dɔgɔlɛ̂ ddəm.