1 Kɔrɛntinyɛje 13 - Dɔnɔn kə̂ Siki: Tar kə̂ aw arə təbbə

Ndiki uta nɛ̂nje tɔyn

¹ Bbo maw pa tar kə ndɔn-tarje kə̂ dəwje aw paje wase anjəje aw paje ngaâ ndiki goto məm tə̂ a, m-to tokə dalɛ kə̂ aw bbar baa wase gan sambe kə̂ daw tunda.

² Bbo mee kə gusu kila mbər tar lə Lubba wase gusu kɔru gəl nɛ̂nje tɔyn kə̂ toje lo-kiyɛ̂ tə̂ ngaâ m-gərə nɛ̂nje tɔyn wase mə-kunn ləm asə ngəsə ddingirije, a bbo ndiki goto məm tə̂ a, m-to nɛ̂n kə̂ baa.

³ Bbo m-kayn nɛ̂n-kingaje ləm dəwje kə̂ bbo aw ddade wase munn rɔm marə karə n̂-ro, a bbo ndiki goto məm tə̂ a, mâ kinga nɛ̂n goe tə̂ ang.

⁴ Ndiki to kore-wur, ndiki to dda maji, mə ddɛɛ̂ ang. Naw nunda gue ang ddəm noo rɔɛ̂ bo ang ddəm.

⁵ N̂-dda nɛ̂n-rɔ-kul ang, n̂-sangə kisi maji laa njaa ang, tar ɔɛ̂n ang, nuwa baan tar ang.

⁶ Nɛ̂n-dda kə̂ gatə gatə ang â ninga rɔ-nəəl tə̂ ang. Tar kə̂ tɔkɔrɔ â ninga rɔ-nəəl tə̂.

⁷ Ndiki to tɔ-wur nɛ̂nje tə̂ tɔyn, n̂-ngəm mə-kunn nɛ̂nje tə̂ tɔyn, kunda-mə dɔ nɛ̂n tə̂ tɔyn, kuwa karə ngəng mə nɛ̂nje tə̂ tɔyn.

⁸ Ndiki a goto ndɔ kâra ang, a kila mbər tarje lə Lubba a goto. Gusu pa tar kə ndɔn-tarje kə̂ dəw gərə ang a goto, gusu nɛ̂n-gərə a goto.

⁹ Tɔkɔrɔ n-gərə nɛ̂n tɔyn ang ngaâ jilaje mbər tarje lə Lubba tɔyn ang bbay.

¹⁰ A bbo nɛ̂n kə̂ to kə majɛ̂ tɔyn ddee a, nɛ̂nje kə̂ toje to ta-gɛɛ̂n baa a gotoje.

¹¹ Kar kə̂ m-nayn to ngonn, maw pa tar tokə lə ngannje, maw məjə tar tokə lə ngannje. A kar kə̂ m-ddee dingaw a, minya nɛ̂n-dda lə ngannje.

¹² Bbokənɛn jaw jooje nɛ̂n kəmje tə̂ ndoko ang tokə nɛ̂n kə̂ jaw joo nɛ̂n-koo-rɔ tə̂. A marə ndɔ a, ja kooje kəm kə kəm. Bbokənɛn m-gərə nɛ̂n tɔyn ang bbay. A bbo ndɔɛ̂ asə a, mâ gərə nɛ̂n tokə Lubba gərəm le.

¹³ Bbasinɛn nɛ̂nje kə̂ mota nəənn naynje bbay: mə-kunn, kunda-mə dɔ nɛ̂n tə̂ kə ndiki. A horo nɛ̂nje tə̂ kə̂ mota nəənn, ndiki â utade tɔyn.