1 Kɔrɛntinyɛje 12 - Dɔnɔn kə̂ Siki: Tar kə̂ aw arə təbbə

Gusuje kə̂ Ndil-mə-nda aw arə dəwje

¹ Ngakɔnʼmje, m-ndiki karə ə-gərəje tar dɔ gusuje tə̂ kə̂ Ndil-mə-nda aw arə dəwje le kə majɛ̂.

² Ə-gərəje kə majɛ̂ to ləw kə̂ ə-gərəje Lubba ang bbay le, bbo polo kɔrje kə̂ aw paje tar ang uta dɔse.

³ Yeenn bba, m-ndiki ta pa karəse, dəw kə̂ pa nan: «Ndu-ndɔɔl to dɔ Jeju tə̂» a, dəw le aw pa tar ddəw Ndil tə̂ lə Lubba ang. A dəw kə̂ aw pa tar ddəw Ndil tə̂ lə Lubba bba a kasə pa nan: «Jeju to Əbbə-dəwje.»

⁴ Gusuje dang dang banyaje nya. A Ndil kə̂ nje-karə gusujeenn le kâra baa.

⁵ Gusu kə̂ ta dda nɛ̂n kula lə Əbbə-dəwje banya nya. A Əbbə-dəwje kə̂ kâra baa njaa â jaw ddaje kula jarɛ̂.

⁶ Kulaje dang dang banya nya, a Lubba kə̂ kâra baa njaa aw dda kulaje tɔyn ddəw tə̂ lə dəwje.

⁷ Ndil aw dda kula mə dəwje tə̂ kâra kâra ddəw gusu tə̂ mba kisi maji lə dəwje tɔyn.

⁸ Ndil aw arə marə dəw tar kəm-karɛ. Ndil kə̂ kâra baa le njaa tɔ â aw arə dəw tar nɛ̂n-gərə.

⁹ Ndil kə̂ kâra baa le njaa arə marə dəw mə-kunn ngaâ arə marə dəw dang gusu kaji nɛ̂n njê-rɔ-toje.

¹⁰ Ndil le arə marə dəw singa dda nɛ̂n-mɔri, narə marə dəw dang gusu kila mbər tar, narə marə dəw gusu gərə Ndil kə̂ maji kə ndil kə̂ maji ang. Narə marə dəw dang bbay gusu pa tar kə ndɔn-tar kə̂ dəw gərə ang ngaâ narə marə dəw gusu ndaji kandə tarjeenn le.

¹¹ Ne Ndil kə̂ kâra le njaa naw dda nɛ̂njeenn tɔyn. Narə gusu dəwje kâra kâra tokə məɛ̂ ndiki.

Njê-mə-kunnje toje to barkəm-rɔ Kristə

¹² Junnje nɛ̂n-kɔju-marɛ̂. Da-rɔ dəw kâra baa, a barkəm-rɔ dəw â banya. Barkəm-rɔ kə̂ dang dang le mbɔnje naan ngaâ toje kâra baa. Nɛ̂ɛnn to ddəw kâra baa kə Kristə.

¹³ Mba jeje tɔyn, Jiipije wase Gɛrɛkəje, bbərəje wase bbərəje ang kara n-ddaje batɛm tɔyn ddəw Ndil tə̂ kə̂ kâra baa karə n-ddeeje da-rɔ kə̂ kâra baa ngaa. Ndil kə̂ kâra baa le â Lubba arəje tɔyn.

¹⁴ Mba barkəm-rɔ kâra baa â to da-rɔ ang. Barkəm-rɔ tokə banya â tɔsuje naan bba ddee to da-rɔ.

¹⁵ Bbo gɔl pa nan: «M-to dəbbə rɔ dəw ang, mba m-to ji ang», a mba yeenn â, nâ to nɛ̂n to dəbbə rɔ dəw le ang wa?

¹⁶ Bbo mbi pa nan: «M-to dəbbə rɔ dəw ang, mba m-to kəm ang», a mba yeenn â, nâ to nɛ̂n to dəbbə rɔ dəw le ang wa?

¹⁷ Bbo da-rɔ to kəm njaa tɔyn a, dəw a koo tar tokə baânn wa? Wase da-rɔ to mbi njaa tɔyn a, dəw a gərə nɛ̂n kə̂ aw ətə tokə baânn wa?

¹⁸ A Lubba tula barkəm-rɔje dang dang rɔ dəw tə̂ tokə məɛ̂ ndiki.

¹⁹ Bbo barkəm-rɔ kə̂ kâra baa njaa to da-rɔ dəw tɔyn a, da-rɔ dəw a goto.

²⁰ Yeenn a, barkəm-rɔ banya nya, a da-rɔ kâra baa.

²¹ Kəm asə ta pa karə ji nan: «M-ndiki karə umam ang» wa? Wase dɔ a pa karə gɔl nan: «M-ndiki karə umam ang» wa?

²² Dəbbə rɔjeje kə̂ dəw oo to nɛ̂n kə̂ ubba singa ang kara toje to nɛ̂n kə̂ ngəng.

²³ Dəbbə rɔjeje kə̂ joode kəmje tə̂ to nɛ̂n ang â n-walde nya. Barkəm-rɔjeje kə̂ asə bbar ride baa ang aw ddaje nɛ̂n kə̂ maji,

²⁴ a kəseje kə̂ kura le, tar goto. A Lubba dda da-rɔ dəw kə gusu kə̂ karə dəw wal barkəm-rɔje kə̂ dəw oo to nɛ̂n ang le.

²⁵ Yeenn bba tin-naan to horo barkəm-rɔje tə̂ ang, a ta barkəm-rɔje le tɔyn əjəje dɔ naan tə̂.

²⁶ Bbo marə barkəm-rɔ kâra aw oo ndoo a, kəseje tɔyn ooje saa ndoo. Bbo barkəm-rɔ kâra inga piti a, rɔ kəseje tɔyn nəəlde.

²⁷ A sese, ə-toje to da-rɔ Kristə ngaâ sese kâra kâra tɔyn ə-toje to barkəm-rɔɛ̂.

²⁸ Mba yeenn bba, mə Egilisi tə̂, Lubba unda Njê-kaw-kulaje to dəwje kə̂ dɔngɔr. Njê-kilaje mbər tar lə Lubba toje to joo ləde. Njê-nɛ̂n-tɔjuje toje to mota ləde. A goe tə̂ to njê-ddaje nɛ̂n-mɔri, goe tə̂ a narə gusu kaji njê-rɔ-toje, gusu kuman dəwje, gusu kɔn dɔ dəwje kə gusu pa ndɔn-tarje dang dang.

²⁹ Dəwje tɔyn toje to njê-kaw-kulaje ang. Dəwje tɔyn toje to njê-kilaje mbər tar lə Lubba ang. Dəwje tɔyn toje to njê-nɛ̂n-tɔjuje ang ddəm toje to njê-ddaje nɛ̂n-mɔri ang ddəm.

³⁰ Dəwje tɔyn njaa ingaje gusu kaji njê-rɔ-to wa? Dəwje tɔyn njaa aw paje ndɔn-tarje kə̂ dang wa? Dede tɔyn njaa daw ndajije kandə tarje wa?

³¹ Yeenn a, arəje bbo kinga gusuje kə̂ maji nya uta kəseje ddase. A bbasinɛn, mâ tɔjuse marə ddəw kə̂ maji uta kəseje tɔyn.