1 Kɔrɛntinyɛje 11 - Dɔnɔn kə̂ Siki: Tar kə̂ aw arə təbbə

¹ Maji karə ə-ndajimje tokə əman, maw ndaji Kristə le.

Ddəw kisi lə dɛnɛ̂n de kə dingaw lo mbɔn-naan tə̂ lə njê-mə-kunnje

² Mɔsu gajise mba aw oleje məse dɔm tə̂ kə ndɔ tɔyn ddəm aw ngəmje nɛ̂nje kə̂ m-tɔjuse kə ddəwe ddəm.

³ A m-ndiki karə ə-gərəje tar nəənn tɔ. Nje-kɔn dɔ dingaw â to Kristə, nje-kɔn dɔ dɛnɛ̂n to dingaw, a Lubba â to nje-kɔn dɔ Kristə.

⁴ Bbo dingaw tɔ dɔɛ̂ bba aw duju Lubba wase aw ila mbər tar kə̂ ta Lubba tə̂ a, yeenn to rɔ-kul â nila kəm Kristə tə̂.

⁵ Â bbo dɛnɛ̂n tɔ dɔɛ̂ ang bba aw duju Lubba wase aw ila mbər tar kə̂ ta Lubba tə̂ a, yeenn to rɔ-kul â nila kəm ngawɛ̂je tə̂. N̂-to ddəw kâra baa kə dɛnɛ̂n kə̂ ngisa dɔɛ̂.

⁶ Bbo dɛnɛ̂n tɔ dɔɛ̂ ang a, maji karə narə n̂-ngisa dɔɛ̂. Â bbo, to nɛ̂n-rɔ-kul karə dɛnɛ̂n ngisa dɔɛ̂ a, maji karə n̂-tɔ dɔɛ̂.

⁷ Maji karə dingaw tɔ dɔɛ̂ ang, mba n̂-to ətaar Lubba ddəm n̂-to nɛ̂n piti Lubba ddəm, a dɛnɛ̂n to nɛ̂n piti dingaw.

⁸ Lubba unn dəbbə rɔ dɛnɛ̂n bba dda nɛ̂n dingaw ang. Dəbbə rɔ dingaw â n̂-dda nɛ̂n dɛnɛ̂n.

⁹ Ngaâ, n̂-dda dingaw mba dɛnɛ̂n ang, dɛnɛ̂n a n̂-ddɛɛ̂ mba dingaw.

¹⁰ Mba yeenn bba, maji karə dɛnɛ̂n tɔ dɔɛ̂ mba anjəje, ta tɔju to nee kɔ dingaw tə̂.

¹¹ A kə̂ kisi tə̂ ləje nɔn Əbbə-dəwje tə̂, dingaw goto a, dɛnɛ̂n goto tɔ, dɛnɛ̂n goto a, dingaw goto tɔ.

¹² Mba dəbbə rɔ dingaw â Lubba dda nɛ̂n dɛnɛ̂n, a dɛnɛ̂n â uju dingaw. A nɛ̂n tɔyn ddee ddəw tə̂ lə Lubba.

¹³ Sese njaa maji karə ujaje kəm tar nəənn: To maji karə dɛnɛ̂n tɔ dɔɛ̂ ang, a duju Lubba wa?

¹⁴ Nɛ̂nje kə̂ Lubba dda njaa kara tɔjuse to, bbo biin-dɔ dingaw ngal a, to nɛ̂n-rɔ-kul laa.

¹⁵ Â bbo biin-dɔ dɛnɛ̂n ngal a, to nɛ̂n-piti laa, mba Lubba arɛ̂ biin-dɔ kə̂ ngal to nɛ̂n-kɔnn dɔɛ̂.

¹⁶ Bbo marə dəw ndiki mayn tar dɔ tar tə̂ nəənn bbay a, jeje kə Egilisije lə Lubba tɔyn joo marə ddəw kə̂ dang kə̂ jaw dda nɛ̂n lo mbɔn-naan tə̂ ang.

Tar kə̂ dɔ muru mə-kâra tə̂

¹⁷ Maw ndɔru mbise bbo mâ ta pitise ang. Mba mbɔn-naanje ləse tuju â tujuse nya bbo ddase maji ang.

¹⁸ Dɔngɔr nɛ̂n â nəənn: Moo nan bbo aw mbɔnje naan a, tin-naan to horose tə̂. Moo a, to tar ngəm tɔyn ang.

¹⁹ A maji karə tin-naan to horose tə̂ bba dâ gərə nɛ̂n dəwje kə̂ aw ddaje nɛ̂n kə ddəwe.

²⁰ Yeenn bba bbo uwaje dɔ naan a, nɛ̂n kə̂ aw ɔnje le to muru lə Əbbə-dəwje ang.

²¹ Mba kar nɛ̂n-kusa a, nân nân kara aw kə ngɔru mba kusa nɛ̂n laa njaa ngaâ bbo dda marɛ̂je, a koto dda marɛ̂je.

²² Kəy ləse to ta kusa nɛ̂n tə̂ ddəm ta kay nɛ̂n tə̂ ddəm ang wa? Wase ə-ndikije ta koo Egilisi lə Lubba to nɛ̂n ang kəmse tə̂ wa? Ə-ndikije ta kila rɔ-kul kəm dəwje tə̂ kə̂ nɛ̂n dude wa? Mâ pa nan ddi karəse wa? Baann ang, m-pitise mba yeenn ang.

²³ Nɛ̂n kə̂ moo ta Əbbəmje tə̂ ngaâ m-tɔjuse â nəənn: Əbbə-dəwje Jeju unn mapa tile tə̂ kə̂ n̂-labbɛ̂ nɛ̂n le,

²⁴ narə wooyo Lubba, goe tə̂ a, n̂-tətə mapa le ngaâ n̂-pa nan: «Nɛ̂n nəənn to da-rɔm kə̂ munn marə mbase. Maji karə ə-ddaje nɛ̂n nəənn mba kole nɛ̂n məse dɔm tə̂.»

²⁵ Ddəw kâra baa, nusa nɛ̂n ngaâ nunn əngo-narɛ, n̂-pa nan: «Əngo-narɛ nəənn to dɔnɔn kə̂ siki kə̂ Lubba ɔsu kə se kə məsəm. Ndɔ tɔyn kə̂ aw ayje a, ayje mba kole nɛ̂n məse dɔm tə̂.»

²⁶ Mba kə ndɔ tɔyn kə̂ aw usaje mapa nəənn ngaâ aw ayje nɛ̂n kə̂ mə əngo-narɛ tə̂ nəənn, nayn to aw ilaje mbər tar yo lə Əbbə-dəwje ndərəng ndɔ kə̂ nâ təl.

²⁷ Mba yeenn bba, dəw kə̂ usa mapa lə Əbbə-dəwje wase ay nɛ̂n mə əngo-narɛ tə̂ laa le kə ddəwe ang a, sariya da-rɔ Əbbə-dəwje kə sariya məse Əbbə-dəwje to dɔɛ̂ tə̂.

²⁸ Maji karə dəw kâra kâra aa go rɔɛ̂ oo kə majɛ̂ bba usa mapa nəənn ngaâ ay nɛ̂n mə əngo-narɛ tə̂ nəənn.

²⁹ Mba dəw kə̂ usa mapa le ngaâ ay nɛ̂n mə əngo-narɛ tə̂ le, a oo to da-rɔ Əbbə-dəwje ang, sariya â n̂-sangə nila dɔɛ̂ tə̂.

³⁰ Mba yeenn bba marə dəwje nya horose tə̂ toje rɔ-to, marɛ̂je ingaje singa ang ngaâ marɛ̂je nya oyje.

³¹ Bbo jeje njaa jaaje go rɔje joo kə majɛ̂ a, Lubba a gangə sariya dɔje tə̂ ang.

³² A Əbbə-dəwje gangə sariya dɔje tə̂ ngaâ tɔjuje ddəw. Yeenn bba nâ kunda tar dɔje tə̂ ddəw kâra baa kə dəwje kə̂ duninya tə̂ nəənn ang.

³³ Yeenn a, ngakɔnʼmje, bbo ə-mbɔnje naan mba kɔn muru a, maji karə ə-ngəbbəje naan.

³⁴ Tokə bbo dda dəw a, maji karə nusa nɛ̂n kəy laa. Baann bba bbo ə-mbɔnje naan a, sariya lə Lubba a to dɔse tə̂ ang. Bbo m-tee horose tə̂ a, mâ gɔl kəsə tarje bbay.