1 Kɔrɛntinyɛje 10 - Dɔnɔn kə̂ Siki: Tar kə̂ aw arə təbbə

Nɛ̂n kə̂ inga ngann Ijarayɛlje təl to nɛ̂n-kɔju-marɛ̂

¹ Ngakɔnʼmje, m-ndiki kole məse dɔ nɛ̂n tə̂ kə̂ inga kajejedede dɔ ndɔ tə̂ lə Mɔyijə. Dede tɔyn njaa mum ɔru nɔnde ngaâ dede tɔyn n̂-gangəje ba-katə.

² Kajejedede le tɔyn ingaje batɛm mə mum tə̂ ddəm mə ba-katə tə̂ ddəm ddəw mə-kâra tə̂ kə̂ n̂-ddaje kə Mɔyijə.

³ Dede tɔyn dɔnje muru Ndil kə̂ kâra baa,

⁴ ngaâ dayje maann Ndil kə̂ kâra baa. Mba dayje maann kə̂ tee mə ər Ndil tə̂ kə̂ aw nja gode tə̂. Ər le to Kristə.

⁵ A nya ləde majije kəm Lubba tə̂ ang. Mba yeenn bba, doyje nɛ̂n mə kɔr tə̂.

⁶ Nɛ̂njeenn le ingade karə təl to nɛ̂n-kɔju-marɛ̂ horoje tə̂. Baann bba nɛ̂nje kə̂ maji ang kə̂ kajejedede ddaje ləw le ja ddaje bboe ang.

⁷ Maji karə ə-poloje kɔr tokə marɛ̂je horode tə̂ ddaje le ang. Ddəw kâra baa tokə Makəturu lə Lubba pa nan: «Dəwje isije nangə̂ mba kusa nɛ̂n, mba kay nɛ̂n. Goe tə̂ a, dinje tar mba ndam.»

⁸ Maji karə n-dda lo-to-majang tokə marə kajejedede ddaje le ang, mba ndɔ kâra baa njaa dəwje doro dɔjoo gire mota oyje.

⁹ Maji karə n-nanje Kristə tokə marə kajejedede nɛɛ̂nje le ang, mba lije tɔnde tɔlde.

¹⁰ Maji karə n-nyuruje tokə marə kajejedede nyuruje le ang, mba anjə kə̂ nje-rasə dəwje rasəde.

¹¹ Nɛ̂njeenn ingaje kajejedede karə ddee to nɛ̂n-kɔju-marɛ̂. N̂-dda tarɛ̂ makəturu tə̂ ta ndəjə nɛ̂n jeje kə̂ n-ddee ngɔsi kə ddutu ndɔ.

¹² Yeenn a, maji karə dəw kə̂ oo to nar taar a, aa rɔɛ̂, mba nâ kin koso.

¹³ Nɛ̂n-nanje kə̂ nanse to nɛ̂nje kə̂ aw ingaje dəwje. Lubba to gatə gatə, nâ kinya ddəw karə nɛ̂n nanse uta singase ang. Bbo nɛ̂n-nan to a, nâ karəse singa karə uwaje arə ngəng ngaâ nâ karəse ddəw karə ə-teeje məɛ tə̂ kə ddang.

Maji karə dəwje kə̂ Kɔrɛntə awje kusu polo kɔr tə̂ ang

¹⁴ Mba yeenn bba, ngakɔnʼmje kə̂ m-ndikise nya, to maji karə ə-ngəmje rɔse ddəw polo kɔr tə̂.

¹⁵ Maw pa tar marəse tokə dəwje kə̂ toje to njê-kəm-karɛje. Sese njaa aaje mə tar kə̂ maw pa marəse le ooje.

¹⁶ Jaw jarəje wooyo Lubba mba əngo-narɛ kə̂ jaw ddaje nɛ̂n mə-kâra. Yeenn to mə-kâra â jaw ddaje ddəw məsə Kristə tə̂ ang wa? Mapa kə̂ jaw tətəje jusaje to mə-kâra â jaw ddaje kə da-rɔ Kristə ang wa?

¹⁷ Mapa kə̂ kâra baa tɔju to jeje tɔyn da-rɔje kâra baa, mba jeje tɔyn â jusaje mapa kə̂ kâra baa le.

¹⁸ Ooje ngann Ijarayɛlje: Njê kə̂ usaje da kə̂ n̂-polo nɛ̂n Lubba dɔ bann tə̂ ddaje mə-kâra kə Lubba.

¹⁹ Yeenn mâ ta pa nan ddi wa? Da kə̂ n̂-polo nɛ̂n kɔr to marə nɛ̂n wase kɔr to marə nɛ̂n wa?

²⁰ Baann ang. Mâ ta pa nan, nɛ̂nje kə̂ n̂-polo nɛ̂n kɔrje le, n̂-polo nɛ̂n ndilje kə̂ maji ang bbo n̂-polo nɛ̂n Lubba ang. Mba yeenn bba, m-ndiki karə ə-ddaje mə-kâra kə ndilje kə̂ maji ang ang.

²¹ Asəje ta kay nɛ̂n mə əngo-narɛ tə̂ lə Əbbə-dəwje ddəm mə əngo-narɛ tə̂ le ndilje kə̂ maji ang ddəm ang.

²² Wase n-ndikije ta dda karə Əbbə-dəwje dda nin wa? Əjəje to jarɛje jutɛ̂ wa?

Maji ta dda nɛ̂n tɔyn mba kɔsu nɛ̂n gaji Lubba

²³ Marə dəwje paje nan: Ddəw ɔru arəm karə m-dda nɛ̂n tɔyn. A nɛ̂n tɔyn njaa maji to maji dɔrɔ ang. Dəw ee kə ddəw ta dda nɛ̂n tɔyn, a nɛ̂n tɔyn njaa dda maji kə Egilisi ang.

²⁴ Maji karə dəw sangə kisi maji laa kə karɛ̂ baa njaa ang. Maji karə n̂-sangə kisi maji lə nje-marɛ̂ tɔ bba.

²⁵ Maji karə usaje nɛ̂n tɔyn kə̂ dəwje aw labbəje lo nɛ̂n-labbə tə̂ bbo ə-dujuje tar dɔɛ tə̂ mba kəjə ləse kə̂ aw jɔkuse le ang,

²⁶ mba nangə kə nɛ̂n tɔyn kə̂ to tə̂ toje to lə Əbbə-dəwje.

²⁷ Bbo dəw kə̂ to nje-mə-kunn ang bbarse kə nɛ̂n-kusa, â bbo ə-ndikije tə̂ ngaâ awje mban a, maji karə usaje nɛ̂n tɔyn kə̂ narəse bbo ə-dujuje tar dɔɛ tə̂ mba kəjə ləse kə̂ aw jɔkuse le ang.

²⁸ Â bbo marə dəw pa arəse nan: «Da kə̂ darə ndilje kə̂ maji ang to nɛ̂n-polo â nəənn» a, maji karə usaje ang mba dəw kə̂ pa tar arəse le ddəm mba kəjə laa kə a jɔkɛ̂ ddəm.

²⁹ Maw pa tar nəənn mba kəjə lə dəw le kə̂ a jɔkɛ̂ bbo maw pa mba kəjə ləse ang. A mba ddi bba kəjə lə dəw a gangə sariya dɔ nɛ̂n tə̂ kə̂ ddəw ɔru arəm karə m-dda wa?

³⁰ Bbo marə wooyo Lubba bba musa nɛ̂n a, dâ tuju rim mba nɛ̂n kə̂ marə wooyo Lubba mbɛɛ̂ le mba ddi wa?

³¹ Yeenn bba, bbo aw usaje nɛ̂n, aw ayje nɛ̂n wase nɛ̂n ddi bba aw ddaje kara, maji karə ə-ddaje nɛ̂n tɔyn mba kɔsu nɛ̂n gaji Lubba.

³² Maji karə ə-ddaje marə nɛ̂n kə̂ a dda karə Jiipije wase Gɛrɛkəje wase Egilisi lə Lubba osoje ang.

³³ Mba yeenn bba, maw sangə ddəw ta ddee maji kəm dəwje tə̂ tɔyn, ddəw nɛ̂nje tə̂ tɔyn. Maw sangə kisi maji lə dəwje tokə banya, mba karə dingaje kaji bbo maw sangə kisi maji ləm njaa ang.