1 Kɔrɛntinyɛje 1 - Dɔnɔn kə̂ Siki: Tar kə̂ aw arə təbbə

Tar lapiya lə Pɔl

¹ Əman Pɔl kə̂ Lubba bbarəm kə mə-ndiki laa karə m-to nje-kaw-kula lə Jeju-Kristə, əman kə ngokɔnʼm Sostɛnn,

² jula kə makəturu nəənn jarə njê-mə-kunnje kə̂ mə Egilisi tə̂ lə Lubba kə̂ bbe tə̂ kə̂ Kɔrɛntə ddəm jarə dəwje kə̂ Lubba bbarde ddəw tə̂ lə Jeju-Kristə ngaâ undade dang arə n̂-toje to njê-mə-ndaje ddəm. Jula kə makəturu nəənn jarə dəwje tɔyn kə̂ aw bbarje ri Əbbəjeje Jeju-Kristə loje tə̂ tɔyn. Jeju-Kristə kə̂ to Əbbədede ddəm Əbbəjeje ddəm.

³ Maji karə Bɔjeje Lubba kə Əbbə-dəwje Jeju-Kristə n̂-ddaje kə se mə-maji ngaâ darə məse wul lɔm.

Lubba arəje nɛ̂n kə̂ maji ddəw tə̂ lə Jeju-Kristə

⁴ Kə ndɔ tɔyn maw marə wooyo Lubba ləm ɔju dɔse mba mə-maji kə̂ n̂-dda kə se ddəw tə̂ lə Jeju-Kristə.

⁵ Mba, ddəw tə̂ lə Jeju-Kristə le bba ingaje nɛ̂n nɛ̂n-kingaje tɔyn, narəse gusu pa-tar kə gusu nɛ̂n-gərə.

⁶ Tar lə Kristə kə̂ n̂-pa darəse le ungu ngirɛ̂ nangə̂ horose tə̂ kə majɛ̂.

⁷ Yeenn bba nɛ̂n-karə-baa lə Lubba kâra duse ang, see njê kə̂ aw ngəbbəje ndɔ təl lə Əbbəjeje Jeju-Kristə le.

⁸ Lubba le njaa a karəse singa ndərəng ddutu ndɔ tə̂ karə ndɔ təl lə Əbbəjeje Jeju-Kristə a, tar to dɔse tə̂ ang.

⁹ Lubba kə̂ to gatə gatə, ne kə̂ n̂-bbarse karə ə-ddaje mə-kâra kə Ngonnɛ̂ Jeju-Kristə kə̂ to Əbbəjeje le.

Tar tin-naan Egilisi tə̂ kə̂ Kɔrɛntə

¹⁰ Ngakɔnʼmje, m-ndəjəse kə ri Əbbəjeje Jeju-Kristə karə ooje ta naan. Ə-tinje naan ang. Uwaje naan ta arəje kəjəje ləse to kâra baa.

¹¹ Mba, ngakɔnʼmje, njê kə̂ dɔ Kolowe tə̂ paje arəmje nan koo-ta-naan goto horose tə̂.

¹² Nɛ̂n kə̂ mâ ta pa karəse â nəənn. Horose tə̂, marɛ̂ pa nan: «Əman m-to dəw lə Pɔl», marɛ̂ pa nan: «Əman m-to dəw lə Apolos», marɛ̂ pa nan: «Əman m-to dəw lə Piyɛr», marɛ̂ pa bbay nan: «Əman m-to dəw lə Kristə.»

¹³ Kristə le kayn rɔɛ̂ wa? Pɔl â n̂-tɔlɛ̂ kakə-dəsə tə̂ ɔju dɔse wa? Ingaje batɛm kə ri Pɔl wa?

¹⁴ Marə wooyo Lubba mba m-dda batɛm marə dəw kâra horose tə̂ ang, bbayɛ̂ njaa to Krispus de kə Gayus.

¹⁵ Yeenn a, dəw kə̂ a kasə pa nan ingaje batɛm kə rim goto.

¹⁶ Tɔkɔrɔ njaa, njê kə̂ kəy lə Ɛstepanas â m-ddade batɛm tɔ. Nayn dɔɛ tə̂ənn bbo m-gərə dəw kə̂ m-ddɛɛ̂ batɛm dang ang.

¹⁷ Mba Kristə ulam karə m-dda dəwje batɛm ang. Nulam karə mila mbər Tar kə̂ Maji, a karə munn tar kəm-karɛ lə dəwje mila nɛ̂n mbər Tar kə̂ Maji le ang. Baann bba koy lə Kristə dɔ kakə-dəsə tə̂ a təl to nɛ̂n kə̂ baa ang.

Jeju-Kristə to singa-mɔngu ddəm kəm-karɛ lə Lubba ddəm

¹⁸ Tɔkɔrɔ, tar koy lə Kristə dɔ kakə-dəsə tə̂ to nɛ̂n-mbə baa kəm dəwje tə̂ kə̂ aw unnje ddəw yo. A tar le to singa-mɔngu lə Lubba kəmje jeje tə̂ kə̂ naw najije.

¹⁹ Mba Makəturu lə Lubba pa nan: «Mâ tuju kəm-karɛ lə njê-kəm-karɛje, mâ dda karə nɛ̂n-gərə lə njê-nɛ̂n-gərəje təl to nɛ̂n kə̂ baa.»

²⁰ Nje-kəm-karɛ to dda wa? Nje-gərə-Ndu to dda wa? Nje-nɛ̂n-gərə kə̂ bbasinɛn nəənn to dda wa? Lubba dda arə kəm-karɛ kə̂ duninya tə̂ nəənn təl to nɛ̂n-mbə.

²¹ Lubba dda ddəw kəm-karɛ tə̂ laa arə dəwje kə̂ duninya tə̂ nəənn asəje ta gəre ddəw kəm-karɛ tə̂ ləde njaa ang. Yeenn bba Lubba oo maji ta kaji dəwje kə̂ unnje məde ddəw tar tə̂ kə̂ jaw jila nɛ̂n mbər kə̂ to tokə tar mbəjeenn le.

²² Jiipije dujuje nɛ̂n-mɔri, a Gɛrɛkəje aw sangəje kəm-karɛ.

²³ A jeje, jaw jila mbər tar lə Kristə kə̂ n̂-tɔlɛ̂ kakə-dəsə tə̂. Jiipije ooje tar le to tar-kɔbbu, a Gɛrɛkəje ooje to tar mbə.

²⁴ A dede kə̂ n̂-toje to Jiipije wase Gɛrɛkəje kə̂ Lubba bbarde kə ddaka, dooje Kristə to singa-mɔngu lə Lubba ddəm kəm-karɛ lə Lubba ddəm.

²⁵ Mba nɛ̂n lə Lubba kə̂ tokə nɛ̂n-mbəjeenn le to kəm-karɛ kə̂ bo nya uta kəm-karɛ lə dəwje. Nɛ̂n lə Lubba kə̂ tokə nɛ̂n kə̂ singɛ̂ gotojeenn le ubba singa uta singa lə dəwje.

²⁶ Ngakɔnʼmje, sese njaa aaje rɔse ooje, sese kə̂ Lubba bbarse: Kə̂ kəm dəwje tə̂, njê-kəm-karɛje wase dəwje kə̂ ngəng wase dəwje kə̂ gəlde ngəng banyaje horose tə̂ ang.

²⁷ A Lubba unn nɛ̂n kə̂ to nɛ̂n-mbə duninya tə̂ mba kila nɛ̂n rɔ-kul kəm njê-nɛ̂n-gərəje tə̂. Lubba unn nɛ̂n kə̂ singɛ̂ goto kəm dəwje tə̂ mba kila nɛ̂n rɔ-kul kəm njê-singaje tə̂.

²⁸ Nɛ̂n kə̂ dɔ nangə tə̂ kə̂ dəwje ooje to nɛ̂n kə̂ ture goto, nɛ̂n kə̂ to nɛ̂n ang, nɛ̂n kə̂ dəwje mbətəje bba Lubba unn mba tuju nɛ̂n nɛ̂n kə̂ ngəng.

²⁹ Baann bba dəw a kasə kunda gue nɔn Lubba tə̂ ang.

³⁰ Ddəw mə-maji tə̂ lə Lubba â ə-ddaje nɛ̂n mə-kâra kə Jeju-Kristə kə̂ to kəm-karɛ kə̂ in rɔ Lubba tə̂. Kristə le dda arə n-ddeeje gatə gatə kəm Lubba tə̂, narə n-ngəm rɔje dang ngaâ nɔruje mə-majang tə̂.

³¹ Yeenn bba tokə makəturu lə Lubba pa le: «Bbo marə dəw ndiki ta kunda gue a, unda gue kə kula kə̂ Əbbə-dəwje dda.»