رِسَالَةُ يُوحَنَّا ٱلرَّسُولِ ٱلْأُولَى 1 - العهد الجديد باللهجة الجزائرية

كَلمة الحْياة

¹ اللي كان من البَدية، اللي سْمَعناه، اللي شَفناه بعينينا، اللي ريناه ومَسّيناه بيَدّينا في آمَر كَلمة الحْياة،

² الحْياة بانَت، وشَفنا ونَشَّهدو ونْخَبّروكُم بالحْياة الدايمة اللي كانَت عَند الآب وبانَت لينا،

³ اللي شَفناه وسْمَعناه، نْخَبّروكُم بيه تاني، باش أنتومَ تاني تْكون عَندكُم الشَركة معانا. والشَركة مْتاعنا حْنايَ راهي مع الآب ومع وْليدو يَسوع المَسيح،

⁴ وهاد الشي حْنا نَكَّتبوه باش الفَرحة تْولّي كاملة.

السيرة فالنور

⁵ وهَدا هُوَ الخْبَر اللي سْمَعناه مَنّو، واللي نْخَبروكُم بيه، باللي الله نور وما كانش كامَل فيه الضَلمة،

⁶ لوكان نْقولو: عَندنا الشَركة معاه، ونَمشيو فالضْلام، رانا نَكَّدبو وما راناش نَفَّعلو الحَق،

⁷ لو كان نَمشيو فالنور كيما هُوَ فالنور، عَندنا الشَركة مع بَعضنا بَعض، ودَم يَسوع وْليدو يْطَهَّرنا من كُل دَنب.

⁸ لوكان نْقولو باللي ما عَندناش الدَنب، نَخَّدعو روحنا والحَق ما كانش فينا،

⁹ لوكان نَستَعرفو بدْنوبنا، هُوَ صادَق وعادَل، باش يَغفَرَّلنا دْنوبنا ويْطَهَّرنا من كُل شَر،

¹⁰ لوكان نْقولو باللي ما دَرناش الدَنب، نْرَدّوه كَدّاب وكَلمتو ما راهيش فينا.