तितस 3 - जुम्लीज्या स्हइ छ तेइ गन्नु 1 सासन गन्न्याहरु र अदिकारिहरुका कब्जामै बैनु र तिनुहरुको भुन्या मान्नु र स्हबै राम्मा काममै स्हतिरनु भुनि बिसासिहरुकन स्हुम्जाया। 2 तिनुहरुले कैखै बार्यामै नराम्मो नगरुन्, राडो झकडाबाट परै बसुन्, स्होजो भइ स्हबै मान्ठस्हात राम्मो बेबार गरुन्। 3 क्यानभुन्या हामि पुनि एक चोटि मुर्ख, भुन्या नमान्न्या, बराल्लिया, कुबिचार र सुखचैनमै फस्याछियौं, इबि खोइन्या र रिस गन्न्या कुडामै दिन काट्न्या, मान्ठहरु हामिकन घिन मान्ना छिया र आपु आपु घिन मानामान गद्दाछियौं। 4 तर हामिकन मुक्तिदिन्या परमेसोरले आम्नो दया र माया मान्ठहरुकन देखाया, 5 हामिले राम्मो काम गरिकन हैन तर उनुको दयाले हामिकन बचाया। पबित्त आत्माको सक्तिले हाम्मा पाप पखाल्यार नौलो जुन्म दिया, र नौलो जिबन सुरुभयो। 6 परमेसोरले पठाया मुक्ति दिन्या इसु ख्रिस्टबाट हामिकन पबित्त आत्मा दिया, 7 तेइबिअ उनुको अनुग्रले धर्मि ठरि हामि अजम्बरि जिबनको आस राख्न्या हकवालो बन्न स्हक्छौं। 8 यइ भुनाइ पक्का छ। मोइले चायाछु तुमिले यइ कुडाहरुमै लागिरौ, तेइबिअ जोले परमेसोरमै बिसास गर्याछुन् आपुकन राम्मो काममै रैरन ध्यान देउन् क्यानकि यिँ कुडा मान्ठहरुका लेखि जात्ति राम्मो र काम लाग्न्याछ। 9 तर मुर्ख कुडा, बोबाजियाका कैले नस्हकिन्या बुंसका कुडाहरु, फाटो र अइनका कुडाका बार्यामै राडो झकडाहरुबाट परै बस क्यानकि ति बेकामका र तस्हैका हुन्छुन्। 10 फाटो ल्हयाउन्या मान्ठकन एक दुइ चोटि राम्मरि स्हुम्जाया ताँबाट तेइ स्हात केइ सरोकार नराख्या। 11 तुमिकन यइ कुडा पुनि थाँ होस् यइथो मान्ठ काम नलाग्न्न्या र पापि हो। आम्नो पापले तेइ आपै दोसि ठरिन्याछ। उन्तिम स्हल्ला 12 अर्तिमास या तुखिकसकन मोइले तुमिति पठाउना बित्तिकै, तुमि निकोपोलिस सहरमै मोइति स्हाँटा आउन्या कोसित् गर्या। क्यानकि ताँइ हिउँद काट्न्या निदो गर्याछु। 13 वकिल जेनास र अपोल्लोसकन बाटोमै केइ स्हारोगारो नहोस् भुनि स्हबै चाँजोबाँजो मिलाइदिया। 14 हाम्मा मान्ठहरु राम्मा काममै रैरन स्हकुन्, तेइबिअ खाँचो पड्याबेला तिनुहरुले स्हयोग गन्न स्हकुन् र तिनुहरु बिना कामका नहुन्। 15 मुस्हात हुन्या स्हबैले तुमिकन जदेउ भुन्याछुन्। हामिकन माया गन्न्याहरु बिसासि दाजुभाइहरुकन जदेउ भुनिदिया। तुमिहरु स्हबै जुनास्हात परमेसोरको अनुग्र रहोस्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.