तितस 2 - जुम्लीस्हाँचो सिच्छ्या सिकाउ 1 तितस, तुमिले स्हाँचो सिच्छ्या सिकाया। 2 बुडापाखा लोक्न्याकन आम्नो कब्जामै बैन, स्हबैले मान्या र इमान्दर, कुडा बुजि राम्मो काम गन्न, बिसासमै पक्का, माया र धिर गन्न सिकाया। 3 यइथैगरि बुडिपाखि स्हैनिहरुको चालचलन परमेसोरकन मान गन्न्या जिबन हुनुपड्छ, अरुको खिसि नगन्न्या, जाँड रक्सि खायर मात्तिन्या हुनुहुदैन भुनि सिच्छ्या दिया। ज्या राम्मो छ, तिनुहरुले तेइ सिकाउन्। 4 बुडिपाखि स्हैनिहरुले तरुनिहरुकन आम्ना आम्ना पोइ र छाचुरिहरुकन माया गन्न, 5 र तिनुहरु अपुकन कब्जामै राख्न्या, लोक्न्याकै ध्यान गन्न्या, घरबार गन्न स्हक्न्या, दया गन्न्या, लोक्न्याका कब्जामै बैन्या कुडाहरु तिनुहरुकन सिकाउन्, यइथो भयो भुन्या परमेसोरका बचनको बदनाम हुन नपाओस्। 6 तेइथैगरि तन्नेरिहरुकन पुनि आपुकन कब्जामै राख्न्या सिच्छ्या सिकाउ। 7 तुमि स्हबै कुडामै राम्मा काम गरि उदारन बन, र तुम्मो सिच्छ्यामै बिसासिलो, स्हबैले मान्या, 8 र कोइले पुनि खिसि गन्न नपाउन्या स्हइ बोलि होस्, तेइथो भयो भुन्या हाम्मो बिरुद्दमै अराम्मो कुडा केइ नभयापछि हाम्मो बिरोद गन्न्याकन स्हरम मान्नु पडोस्। 9 कमाराहरुकन पुनि आम्ना मालिकको भुन्या मान्नु र स्हबै कुडामै आम्ना मालिकहरुकन खुसि पाड्नु भुनि हुकुम देउ, र तिनुहरु मुखमुख नलागुन्। 10 तिनुहरुले नचोरुन्, तर स्हबै काममै बिसासिलो होउन्। यइथैगरि स्हबै कुडामै तिनुहरुले हाम्मा मुक्तिदिन्या परमेसोरको सिच्छ्याको मान बढाउन्। 11 क्यानभुन्या स्हबै मान्ठहरुले मुक्ति पाओस् भुनि परमेसोरले अनुग्र देखायाछुन्। 12 तेइले हामिकन परमेसोरकन मान नहुन्या कुडा र सुन्सारका चिजबिजमै लाल्चो गन्न छोड्न लाउन्याछ र सुन्सारमै आम्नो कब्जामै बैन, स्होजो र परमेसोरकन मान गन्न्या मान्ठ हुन सिकाउन्छ। 13 यइथैगरि हामिले आस गर्या कुडा पुरा हुन्या दिनको बाटो हेद्दाछौं। तेइ दिन हाम्मो म्हाँन परमेसोर र मुक्तिदिन्या इसु ख्रिस्टको ठुलो मान भया देख्न्याछौं। 14 ख्रिस्टले हामिकन स्हबै अधर्मबाट मोल तिर्यर उद्दार गर्या, अनि राम्मो काम गन्न जाँगरिलो भया उनुको आम्नै मान्ठहरुकन पबित्त पाड्न आपुकन बलि हुन दिया। 15 यि कुडाहरु तुमिले पुरै हकस्हात स्हुनाउ, अत्ति देउ र हप्काउ। कोइले पुनि तुमिकन हेला नगरोस्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.