प्रेरित 7 - जुम्लीठुलो सबाका अगाडि स्तिफनसले प्रचार गर्या 1 तब ठुला पुजारिहरुले स्तिफनसकन स्होद्या, “क्या तोकन दोस लाया यिँ कुडा स्हाँचा हुन्?” 2 स्तिफनसले भुन्या, “या मेरा बाबा र दाजुभाइहरु हौं, स्हुन। महिमाका परमेसोरले हाम्मा जिजुबाज्या अब्राहाम हारान भुन्या ठौर बैनु भुन्दा पैला मेसोपोटामिया देसमै बैथा परमेसोर तेइस्हात देखला पड्या। 3 परमेसोरले अब्राहामकन भुन्या, ‘आम्नो देस र आम्ना कुटुम्ब छोडि मोइले तोकन जो देस देखाउन्याछु, ताँइ जा।’ 4 तब अब्राहाम कल्दिहरुको देसबाट निक्लेर हारानमै आइ बस्या, अनि तिनुका बाबा मरिस्हक्यापछि परमेसोरले तिनुकन ताँइबाट यइ मुलुकमै ल्याया, जाँ अइले तुमिहरु बैथाछौ। 5 अब्राहामकन तेइ ठौरमै जग्गा जुमिन त परै जाओस्, पाइला टेक्न्या ठौर स्हम्म पुनि दियानुन्। तर तिनुको स्हुन्तान नभया पुनि तेइ जग्गा जुमिन परमेसोरले तिनुका स्हुन्तानकन स्हबै स्हुम्पति दिन्या बाचा गर्या। 6 परमेसोरले अब्राहामकन भुन्या, ‘तेरा स्हुन्तान अक्काको देसमै गैइ बैनु पड्न्याछ, र ताँइका मान्ठहरुले तिनुहरुकन कमारा बुनाइ चार सय बर्स्हस्हम्म दुख दिन्याछुन।’ 7 परमेसोरले भुन्या, ‘तर तिनुहरु जो जातिका कमारा भइ बैन्याछुन् तेइ जातिका मान्ठहरुकन निसाप गर्नेछु। तेइपछि तिनुहरु निस्किकन आयर यइ ठौरमै मेरो आराधना गन्न्याछुन्।’ 8 परमेसोरले अब्राहामस्हात खतनाको बाचा गर्या, र तेइ बाचा स्हुम्जाउनिका निम्ति अब्राहाम इसहाकका बाबा भैइ आठ दिना दिनमै इसाकको खतना गरिदिया। इसाकले आम्नो छोरा याकुबकन र याकुबले बारै कुलकन खतना गर्या र याकुब नै बार कुलका बाबा भया। 9 “याकुबका छोरा योसेफकन अरु दाजुभाइहरुले झोक मान्यार तेइकन मिस्रदेसमै बेचिदिया। तर परमेसोर तेइस्हातै छिया। 10 परमेसोरले योसेफकन सारा दुखबाट छुट्कारा दिया। जब योसेफ मिस्रदेसका राजा फारोका अगाडि आया, परमेसोरले तिनुकन दया गर्या र बुद्दि दिया, र फारोले योसेफकन मिस्रदेसका तिनुका झानका ठुला हाकिम बुनाया। 11 तेइपछि सारा मिस्रदेस र कनानमै उनिकाल पड्योर ठुलो दुख भयो, र हाम्मा पुर्खाहरुले अनाज पायानुन्। 12 तर याकुबले मिस्रदेसमै अनाज छ भुन्न्या कुडा स्हुनेर आम्ना छोराहरुकन पैलो चोटि अनाज ल्हिन पठाया। 13 दोर्स्हो चोटिको भेटमै तिनुले आम्ना दाजुभाइहरुकन मु योसेफ हुँ भुन्या, र योसेफको झानका बार्यामै फारोकन थाँ भयो। 14 तेइपछि योसेफले आम्ना बाबा याकुबकन र जुम्मै पचत्तरै जुना नातेदारहरुकन ल्यायर मिस्रदेसमै आउनु भुनि रैबार पठाया। तेइबिअ याकुबले आम्नो झान ल्यायर मिस्रमै आया। 15 अनि याकुब मिस्र देसमै गया, र ताँइ मर्या र हाम्मा पुर्खाहरु पुनि ताँइ मर्या। 16 तेइपछि तिनुहरुका मर्या हड सकेममै ल्हिया, र ताँइ अब्राहामले हमोरका छोराहरुबाट किन्या च्यानमै राख्या। 17 “जब परमेसोरले अब्राहामकन गर्या बाचा पुरा हुन्या सुमय आउनै लाग्यो, तब मिस्र देसमै हाम्मा मान्ठहरु थपिया, र तिनुहरु जात्ति मथ्थै भयाछिया। 18 तब मिस्रदेसमै योसेफकन नरउन्या अक्को राजाले राज्या गन्न लाग्यो। 19 तेइले हाम्मा पुर्खाहरुस्हात नराम्मो बेबार गद्दो छियो, र तिनुहरुका आम्नै भाउहरुकन घर बाइर ल्यायर फाल भुनि कर लाउन्छियो, र यइगरि भख्खर जुन्म्या भाउहरुकन मारिदिन्छियो। 20 तेइबेला मोसा जुन्म्या। मोसा परमेसोरको हेराइमै राम्मा छिया। तिनुका बाबा आमाले तिनुकन तिन मुइनास्हम्म घरमै लुकाइकन पाल्या। 21 तर पछिस्हम्म मोसाकन लुकाउन नस्हकेर घर बाइर राख्ता फारोकि छोरिले तिनुकन ल्हि, र आम्नै छोरा बुनाइकन पालि। 22 तेइपछि मोसाकन मिस्रिहरुका स्हबै ग्यान र सिच्छ्या सिकाया, मोसा आम्नो बोलिचालि र काममै सक्तिसालि भया। 23 “मोसा चालिस बर्स्हका हुँदा, तिनुको हिर्दयामै आम्ना इस्राएलि दाजुभाइहरुकन भेट गन्न्या बिचार गर्या। 24 तब मोसाले इस्राएलिमद्दि एक जुनामाथि अन्याय भैइरया देख्या, र तेइकन बचाया, अनि तेइ अन्याय गन्न्या मिस्रिकन मारि अन्यायको स्हट्टा ल्हिया। 25 परमेसोरले मोसाबाट नै इस्राएलिहरुकन छुट्कारा दिन लाग्याछुन् भुनि आम्नै मान्ठहरुले बुजनान् भुन्न्या मोसाले स्हुच्या छिया। तर तिनुहरुले यइ कुडा बुज्यानुन्। 26 भोलिपल्ट मोसाले दुइ जुना इस्राएलिकन आपु आपु झकडा गरिरया बेलामै देख्या, र तिनुहरुकन मिलाउन्या कोसित गरि भुन्या, ‘स्हात्यौ, तुमिहरु त दाजुभाइहरु हौ, क्यान आपु आपु झकडा गद्दाछौं?’ 27 तर आम्नै ओरिपोरिका मान्ठकन दुख दिन्याले मोसाकन घुच्चाउदै भुन्यो, ‘तुमिकन कोइले हामिमाथि सासन गन्न्या र न्यादिस बुनायो?’ 28 बेलि तेइ मिस्रिकन मार्या जैथै तो मुकन पुनि मान्न खोइदो छै? 29 यइथो कुडा स्हुनेर मोसा भागेर मिद्दान देसमै गइकन बस्या। ताँइ तिनुका दुइजुना छोरा जुन्म्या। 30 “चालिस बर्स्ह स्हकियापछि सिनै पहाडको रुखो ठौरमै बलिरया पोथ्याडाको आगामै एक सोर्गका रैबार्या मोसाति देखला पड्या। 31 मोसाले यइ देख्यार अचुम्मै मान्या, अनि राम्मरि हेन्नाबिअ हुँइतिकै जाँदा तिनुले प्रभुको यइथो डाको स्हुन्या, 32 ‘मु तुम्मा पुर्खा अब्राहाम, इसाक र याकुबका परमेसोर हुँ।’ अनि मोसा काम्न लाग्या, र तिनुले ताँइतिर हेन्न्या आँट गर्यानुन्। 33 तब परमप्रभुले मोसाकन भुन्या, ‘तेरा खुट्टाका पौला गाड क्यानकि जो ठौरमै तो ढुक्याछै, तेइ पबित्त ठौर हो। 34 मिस्रदेसमै भया मेरा मान्ठहरुले दुख पाया मोइले देख्या, र तिनुहरुले सोक गर्या पुनि स्हुन्याँ। तिनुहरुकन छुट्कारा दिन मु तल आया छुँ। अब यइ कामको निम्ति मु तोकन मिस्रदेसमै पठाउन्याछु।’ 35 “यिँ मोसा जैकन इस्राएलिहरुले भुन्या, ‘कोइले तोकन हाकिम र न्यादिस बुनायो’ भुनि इन्कार गर्याछिया। बलिरया पोथेडामै तिनुस्हात परमेसोरले सोर्गका रैबार्याबाट बोल्या र उनुले नै इस्राएलिहरुकन छुटकारा दिन र तिनुहरुमाथि अगुवा हुन मोसाकन पठाया। 36 यिनै मान्ठले मिस्र देसमै, लाल समुन्द्रमै अनि चालिस बर्स्हस्हम्म रुखो ठौरमै अचुम्मका काम र चिनारिहरु गरि इस्राएलिहरुकन बाइर ल्याया। 37 तिनै मोसा हुन्, जोले इस्राएलिहरुकन भुन्याछिया, ‘परमेसोरले मुकन छान्या जैथै तुमिहरुका दाजुभाइहरुमद्दिबाट तुमिहरुका निम्ति एक जुना परमेसोरका रैबार्याकन पठाइ दिन्याछुन्।’ 38 यि नै मोसा इस्राएलिहरु रुखो ठौरमै हुँदा तिनुहरुस्हातै छिया, अनि सिनै पहाडमै सोर्गका रैबार्या तिनुस्हात र अरु हाम्मा पुर्खाहरुस्हात बोल्या छिया र तिँ नै परमेसोरको ज्युँदो बचन पायर हामिकन भुन्या। 39 “तर हाम्मा पुर्खाहरुले मोसाको आग्या मान्यानुन् र तिनुहरुले मोसाकन छोडेर मिस्रदेसमै फर्कि जान्या मुन गर्या। 40 तिनुहरुले मोसाको दाजु हारुनकन यइथो भुन्या, ‘हाम्मो बाटो देखाउन्या कोइ देउताहरु हाम्मो निम्ति बुनाइदेउ, क्यानकि हामिकन मिस्र देसबाट निकालेर ल्याउन्या तेइ मोसाकन कैथो छ हामिकन थाँ नाइ।’ 41 तेइपछि इस्राएलिहरुले एक बाछाको मुत्ति बुनाया, र तेइमै बलि चडाया, अनि आपुले गर्या काममै खुसि मुनाया। 42 तर परमेसोरले तिनुहरुकन छोडिदिया, र तिनुहरुकन सरगका ताराहरुको आराधना गन्न छोड्डिया, यइखो बार्यामै परमेसोरका रैबार्याहरुका किताबमै यइथो लेख्याछ, “‘या इस्राएलिहरु हौ! तुमिहरुले चालिस बर्स्हस्हम्म रुखो ठौरमै पसुबलि र भेटिहरु चडायौ, तेइ मेरो निम्ति छियोन। 43 तुमिहरुले मोलोख देउताको मुत्ति राख्न्या पाल र रेफन भुन्न्या देउताको ताराको मुत्ति, र तुमिहरुले पुज्नाबिअ बुनाया मुत्तिहरु उठाइ ल्हियौ। मु तुमिहरुकन कैदि बुनायर बेबिलोन भुन्दा पारि पठाइ दिन्याछु।’” 44 “रुखो ठौरमै हाम्मा पुर्खाहरुस्हात पबित्त पाल छियो। मोसाले तेइ पबित्त पाल परमेसोरले देखाया उदारण उन्सार नै बुनाया छिया। 45 हाम्मा पुर्खाहरुले पुनि तिनुहरुको पालामै अरु जातिहरुको देस परमेसोरको सक्तिले झितेर ल्याउँदा यहोसु स्हातै तेइ पाल ल्याया, तेइपछि दाउद राजाका पालास्हम्मै तेइ पबित्त पाल ताँइ रयो। 46 दाउदले परमेसोरको कृपा पाया, र तिनुले याकुबका परमेसोरको निम्ति एक बैन्या ठौर बुनाउन पाउँ भुनि बिन्ति गर्या। 47 तर दाउदका छोरा सोलोमनले तेइ मुन्दिर बुनाया। 48 “तर मान्ठले बुनाया घरहरुमै परमेसोर बैथैनुन्, जस्हरि परमेसोरका रैबार्याहरुले भुन्याछुन्, 49 “‘सोर्ग मेरो राजगद्दि हो, र धत्ति मेरो खुट्टा राख्न्या ठौर हो, तुमिहरुले मेरो निम्ति कैथो घर बुनाउन्या हौ? परमप्रभु भुन्नाछुन्, मेरो पट्याइ मान्न्या ठौर काँ छ? 50 क्या यिँ स्हबै चिज मोइले बुनाया हैनुन् र?’” 51 “या जिद्दि गन्न्या मान्ठौ, कठ्ठोर हिर्दया र कुन्फुटा कान भयाहरु हौ, तुमिहरु जैलेपुनि पबित्त आत्माको बिरोद गद्दाछौ। तुमिहरुका पुर्खाले जैथो गर्या तुमिहरु पुनि तेइथै गद्दाछौ। 52 परमेसोरका रैबार्याहरुमद्दि कैकन तुमिहरुका पुर्खाहरुले दुख दियानुन्? तिनुहरुले धार्मिक मान्ठ आउन्याछुन् भुनि रैबार दिन्याहरु स्हबैकन मार्या। अनि तुमिहरुले उनुकन धोका दियौ, र मार्यौ। जोइले तिँ धार्मिक मान्ठको आउन्या रैबार अगाडि देखि नै स्हुनाया छिया। अब तुमिहरु उनुकै धोकेबाजि र ज्यानमारा भयाछौ। 53 परमेसोरले आम्ना रैबार्याहरुबाट दिया अइन त पायौं, तर तेइ मान्यानौ।” स्तिफनसकन ढुङ्गाले हानि मार्या 54 जब तिनुहरुले स्तिफनसका कुडा स्हुन्या तब तिनुहरु माइम्मरि झोकाया र दारा टोक्न लाग्या। 55 तर स्तिफनस पबित्त आत्माले भरिकन सोर्गतिर यकोरो हेरिरयो, अनि परमेसोरबाट आउन्या महिमा, र इसुकन परमेसोरको दाइन्यापट्टि उबिया देख्या। 56 अनि स्तिफनसले भुन्या, “हेर, सोर्ग उग्ड्या मोइले देख्याँ, र मान्ठको छोराकन परमेसोरका दाइन्यातिर ढुकिरया मोइले देख्तैछु।” 57 तर तिनुहरु ठुलो डाको गाड्डै उठ्या, र आम्ना कान बुज्या, र तिनुहरुले एकैचोटि स्तिफनसकन कुट्या। 58 तिनुहरुले स्तिफनसकन सहर बाइर निकालिकन ल्हिया, र तेकन ढुङ्गाले हान्या। र झुटा दोस लाउन्याहरुले आम्ना टालाहरु साउल नाउँ गर्या एकजुना ठेटाको जुम्मा दिया। 59 तिनुहरुले स्तिफनसकन ढुंगाले हानि रयाछिया, र तेइले प्रार्थना गर्यो, “हे प्रभु इसु, मेरो आत्माकन ल्हिदेउ।” 60 तेइले घुँडा टेकेर ठुलो डाको गरि भुन्यो, “हे प्रभु, यइ पापको दोस यिनुहरुकन नलाउ।” यइ भुनि स्हक्यापछि तेइको परान गयो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.