प्रेरित 4 - जुम्लीपत्तुरुस र युहन्ना ठुलो सबाका अगाडि 1 पत्तुरुस र युहन्ना मान्ठहरुस्हात कुडाकानि गद्दैछिया, अनि पुजारिहरु, मुन्दिरका चौकिदार्याका कप्तान र सदुकिहरु ताँइ आया। 2 तिँ दुइ मुख्य चेलाहरुले इसु मर्याबाट ज्युँदियाछुन्, तेइबिअ अरु मर्या मान्ठहरु पुनि ज्युँदिन्छन् भुनि प्रचार गर्या हुनाले सदुकिहरु जात्ति झोकाया। 3 तब तिनुहरुले पत्तुरुस र युहन्नाकन पक्ड्या, र भोलिपल्टस्हम्म थुनि राख्या, क्यानकि तेइबेला रात पडिस्हक्या छियो। 4 तर तिँ दुइ मुख्य चेलाहरुको राम्मो रैबार स्हुन्न्याहरुमद्दि मथ्थैले इसुमै बिसास गर्या, र बिसास गन्न्या लोग्न्याहरु थपियार लगभग पाँच हजार पुग्या। 5 भोलिपल्ट तिनुहरुका मुख्य पुजारिहरु, धर्मगुरुहरु र अगुवाहरु यरुसलेममै जुम्मा भया। 6 ठुला पुजारि हन्नास, कैयाफा, युहन्ना, अलेक्जेन्डर र ठुला पुजारिका झान पुनि ताँइ आया छिया। 7 तिनुहरुले पत्तुरुस र युहन्नाकन सबाका अगाडि उभ्यायर स्होद्पुछ गर्या, “तुमिहरुले क्या सक्तिले या कैको नाउँमै यइथो काम गर्या हौ?” 8 तब पबित्त आत्माले भरियार पत्तुरुसले तिनुहरुकन भुन्या, “मान्ठहरुका सासन गन्न्या र अगुवाहरु हौ, 9 आज हामिले एकजुना कुज्याकन निको गर्या बार्यामै तेइ क्यागरि भलो भयो भुनि स्होद्छौ भुन्या, 10 तुमिहरु स्हबैकन र इस्राएलका स्हबै मान्ठहरुकन थाँ होस्, कि तुमिहरुले क्रुसमै टाँग्यर मार्या र परमेसोरले मर्याबाट ज्युँदो पाड्या नासरतका इसु ख्रिस्टको नाउँमै यइ मान्ठ तुमिहरुका अगाडि पुरै भलो भइ उठ्याछ। 11 धर्मसास्तरमै लेख्या यइ कुडा इसुकै बार्यामै लेख्याछ, “‘जो ढुङ्गाकन तुमि ओड्याहरुले बेकामको हो भुनि ठानेर फाल्या ढुङ्गा जैथो उनु नै हुन्। जो अइले जगको मुख्य ढुङ्गो भयो।’ 12 इसु बाएक अरु कोइमै मुक्ति नाइ, क्यानकि हामिले मुक्ति पाउन सोर्गमुनि मान्ठहरुमै अक्को कोइ नाउँ दियानाइ।” 13 पत्तुरुस र युहन्ना अन्पड र मामुलि मान्ठ छिया, रपुनि तिनुहरुले आँट गरि बोल्या देख्यार सबाका स्हबै मान्ठहरु छक्क पड्या, यिनुहरु इसुस्हात रन्छिया भुन्न्या पुनि थाँ पाया। 14 तर तेइ भलो भया कुज्याकन तिनुहरुले पत्तुरुस र युहन्नास्हात ढुकिरया देख्यार केइ भुन्न स्हक्यानुन्। 15 तेइबिअ तिनुहरुले पत्तुरुस र युहन्नाकन ठुलो सबाबाट बाइर निक्लुन्या आग्या दिइकन तिनुहरुले यइथो भुन्यार आपु आपु कुडा गर्या, 16 “अब यिँ दुइ मान्ठकन हामिले क्या गन्न्या? क्यानभुन्या यिनुहरुबाट एक अचुम्मको काम भयाछ भुन्न्या यरुसलेमका जुम्मै मान्ठहरुकन थाँ भैइस्हक्याछ, र हामि यइ हैन भुन्न स्हक्तैनौं। 17 तर यइ कुडा मान्ठहरुकन थाँ नहोस् भुनेर ‘फेरि इसुको नाउँमै कोइ मान्ठहरुस्हात नबोल्लु’ भुनि हामिले तिनुहरुकन चेताउनि दिनुपड्छ।” 18 अनि तिनुहरुले पत्तुरुस र युहन्नाकन घोइरायार अब देखि इसुको नाउँमै नबोल्लु र केइ सिच्छ्या नदिनु भुनि आग्या दिया। 19 तर पत्तुरुस र युहन्नाले तिनुहरुकन भुन्या, “परमेसोरले भुन्या कुडा मान्नु कि तुमिहरुले भुन्या कुडा मान्नु परमेसोरका अगाडि क्या ठिक हो? तुमिहरुले आपै बिचार गर। 20 क्यानकि हामिले देख्या र स्हुन्या कुडाहरुमै हामि चुप्पलागि बैन स्हक्तैनौं।” 21 तिनुहरुले दण्ड दिन्या केइ जुक्ति नपाइ पत्तुरुस र युहन्नाकन अझ भौति धुम्कायर छोडिदिया, क्यानभुन्या ताँइ अचुम्मको काम भया हुनाले स्हबै मान्ठहरुले परमेसोरको गुणगान गरिरया छिया। 22 क्यानकि जो मान्ठ अचुम्मको कामबाट भलो भयाछियो, तेइको उम्मेर चालिस बर्स्ह भुन्दा भौति छियो। बिसासिहरुको प्रार्थना 23 ताँइबाट छुट्यापछि पत्तुरुस र युहन्ना आम्ना बिसासि स्हात्याहरुति आया, र मुख्य पुजारिहरु र अगुवाहरुले भुन्या स्हबै कुडाहरु तिनुहरुकन भुन्दिया। 24 जब तिनुहरुले यइ स्हुन्या, तब तिनुहरु एकै मुनका भैइ परमेसोरतिर आम्नो डाको गाडि भुन्या, “हे सर्बसक्तिमान प्रभु, तुमिले सोर्ग, धत्ति, समुन्द्र र ताँइमै भया स्हबै चिज बुनायौं। 25 तुमिले पबित्त आत्माबाट आम्ना सेबक हाम्मा पुर्खा दाउदका मुखबाट भुन्यौं, “‘परमेसोरकन बिसास नगन्न्या अरु जातिहरु क्यान झोकाया, क्यान मान्ठहरुले बेकारका कुडाहरुको बिचार गद्दाछुन्? 26 परमप्रभुको बिरुद्दमै र उनुले छान्या ख्रिस्टका बिरुद्दमै धत्तिका राजाहरु उठ्या, र सासन गन्न्याहरु स्हबै जुम्मा भया।’ 27 यइथै कुडा स्हाँच्चि भयाछ, क्यानकि तुमिले छान्या तुम्मा पबित्त सेबक इसुका बिरुद्दमै हेरोद र पन्तियस पिलातस दुबैजुना, परमेसोरकन बिसास नगन्न्या मान्ठ र इस्राएलिस्हात यइ सहरमै जुम्मा भयाछिया। 28 तेइ गन्नाबिअ ज्या तुम्मो सक्तिबाट र तुम्मो इच्छ्या उन्सार अगाडिबाटै ठराइया छियो। 29 हे प्रभु, अब तिनुहरुले दिया धुम्किमाथि ध्यान गर, र तुम्मा सेबककन पुरा हिक्मतले तुम्मो बचन बोल्ल्या सक्ति देउ, 30 र भलो गन्ना निम्ति तुमिले आम्नो सक्ति देउ, र आम्ना पबित्त सेबक इसुको नाउँबाट चिनारि र अचुम्मका कामहरु होउन्।” 31 तिनुहरुले प्रार्थना गरिस्हक्यापछि तिनुहरु जुम्मा भया ठौर हल्लियो, र तिनुहरु स्हबै जुना पबित्त आत्माले भरिया, र भेइ नमानिकन परमेसोरको बचन बोल्न लाग्या। बिसासिहरुका स्हाजा धुनहरु 32 प्रभुमै बिसास गन्न्याहरु स्हबै एकै हिर्दया र एकै आत्माका भयाछिया, र तिनुहरुमद्दि कोइले पुनि आम्नो धुन स्हुम्पतिको केइ चिज मेरो हो भुन्ना छियानुन्, तर तिनुहरुका स्हबै चिज स्हाजा छिया। 33 मुख्य चेलाहरुले ठुलो सक्ति पायर प्रभु इसु मर्याबाट ज्युँदिया हुन् भुनि स्हाँचि दिन्छिया र परमेसोरले तिनुहरु स्हबैकन मथ्थै असिपात दिन्छिया। 34 तिनुहरुमद्दि कैकनै केइ कुडाको खाँचो पड्डैन छियो, क्यानकि जति जुना जग्गा जुमिन या घरका मालिक छिया, तिनुहरुले तिँ बेचेर तेइको मोल ल्याउन्छिया, 35 र मुख्य चेलाहरुकन जुम्मा लाउन्छिया, र जै जैकन ज्या ज्या कुडाको खाँचो पड्डो छियो, तेइ स्हबैकन बाँडि दिन्छिया। 36 लेबि कुलका योसेफ नाउँ भया एकजुना मान्ठ छियो। तेइ साइप्रस भुन्न्या ठौरबाट आयाछियो। मुख्य चेलाहरुले तेइकन बारनाबास भुनि घोइराउन्छिया, (जैखो अथ्थ आँट दिन्या मान्ठ हो)। 37 बारनाबासले आम्नो जुमिन बेचेर ल्याया रुपियाँ मुख्य चेलाहरुकन जुम्मा दिया। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.