प्रेरित 20 - जुम्लीपावल माकेडोनिया र ग्रिस भुन्या ठौरमै गया 1 मान्ठहरुले खैलाबैला गन्न छोड्यापछि पावलले बिसासिहरुकन घोइराउन पठाया, र तिनुहरुकन बिसासमै भरिला हुनु भुनि अत्तो दिया तब तिनुहरुबाट छुट्टियार माकेडोनिया इलाकामै गया। 2 ताँइ पुग्यापछि पावल ठौर ठौर भैकन गया र ताँइका बिसासिहरुकन मथ्थै कुडा भुन्यार हौसला दियापछि तिँ ग्रिसमै गया। 3 पावल ताँइ तिन मुइनास्हम्म बस्या। ति पानि झाँज चडिकन सिरिया भुन्या ठौरमै जान लाग्दा तिनुकन यहुदिहरुले मान्न्या स्हल्ला गर्या छुन् भुन्न्या कुडा थाँ पायार तिँ माकेडोनिया भैइ जान्या निदो गर्या। 4 तब बेरिया भुन्न्या ठौरको पुरसको छोरो सोपात्तोरस, थेसलोनिकेबाट अरिस्तार्खस र सिकन्दस, डर्बिबाट गायस, तिमोथि, एसिया ठौरा तुखिकस र तोरोफिमस पुनि तिनुस्हात गया। 5 तिनुहरु हामि भुन्दा अगेडि नै तोरोआसमै पुग्यार हाम्मा बिअ ढुक्या छिया। 6 तब हामिहरु अखमिरि रोटाको त्युबार मानि स्हक्यापछि फिलिप्पिबाटै पानिझाँज चडि आउँदा पाँच दिनमै तिनुहरु भया ठौर तोरोआसमै आयौं, र ताँइ सात दिन स्हम्म बस्यौं। पावलले युटिकसकन ज्युँदो पाड्या 7 हप्ताको पैलो दिनमै हामि प्रभु भोज खान जुम्मा भयौं। तब पावलले ताँइबाट भोलिपल्ट जान्या मुन गर्या हुनाले, तिनुहरुस्हात मद्दि रातस्हम्म कुडा गरि बस्या। 8 हामिहरु जुम्मा भया घरा हपाल्लो तलाको कोठामै मथ्थै बत्तिहरु छिया। 9 ताँइ एक जुना युटिकस नाउँ भया तुन्नेरि मान्ठ झ्यालमै बस्या छियो। पावलले मथ्थै सुमयस्हुम्म कुडा गरिरया हुँदा तेइले माइमरि ढुल्याइ मान्यो र ढुल्यो। तेइ तिन तलाबाट छत्तियो र तेइकन तिनुहरुले उठाउँदा मरिस्हक्या छियो। 10 तब पावल तलि गया, र घोप्टो पडि तेइकन अँगालो हाल्या र भुन्या, “तुमिहरु भेइ नमान क्यानभुन्या यइ ज्युँदैछ।” 11 तब पावल हपल्ला तला गया र प्रभुभोज खाइस्हक्यापछि छगलको उज्यालो नहुन्जै मथ्थै सुमयस्हम्मै कुडाकानि गरि बस्या। तेइपछि तिनुहरुबाट पावल छुट्टियार गया। 12 अनि तिनुहरुले तेइ ठेटाकन ज्युँदै घर ल्हियार मथ्थै खुसि भया। पावल तोरोआसबाट मिलेटस भुन्न्या ठौरस्हम्म गया 13 हामि त्रोआसबाट पानिझाँजमै चडि अस्सोस सहरमै गयौं। पावलले अस्सोस सहरस्हम्म पैदेला जान्या र ताँइ मात्तै पानिझाँजमै चड्न्या तिनुले निदो गर्या छिया। 14 अनि पावलले हामिकन अस्सोसमै भेटाया, र हामिले तिनुकन पानिझाँजमै चडायौं, र मितिलेने सहरमै गयौं। 15 ताँइबाट पानिझाँजमै चडि गयार भोलिपल्ट खियस टापुति पुग्यौं, र पर्सिपल्ट सामोस टापुमै पुग्यौं। तेइको अक्को दिन मिलेटस सहरमै पुग्यौं। 16 एसियामै सुमय बिताउन्या मुन नगर्या हुनाले तिनुले एफिसस सहरमै नपसि जान्या निदो गर्या। स्हक्यास्हम्म पेन्तिकोसको दिन यरुसलेममै पुग्नुपड्छ भुनि पावल आत्तिया छिया। पावल एफिससका बिसासिहरुबाट बिदा भया 17 मिलेटस सहरबाटै पावलले एफिससमै भया मन्डलिका अगुवाहरुकन घोइराउन मान्ठ पठाया। 18 तिनुहरु पावल भया ठौरमै आयापछि पावलले तिनुहरुकन भुन्या, “एसियामै पुग्या अगेल्लो दिनबाटै नै मोइले स्हबै सुमयस्हुम्म तुमिहरुका भ्हाँजौनो क्यागरिकन बस्याँ भुन्या कुडा त तुमिहरुले थाँ पाया छौ। 19 अनि यहुदिहरुले सड्यान्त गर्यार मुकन फसाउन खोज्या हुनाले मोकन माइमरि दुख भयो, तर पुनि स्होजो भैकन रुनै प्रभुको काम गर्या। 20 तुमिहरुकन राम्मो हुन्या कुडा तुमिहरुकै अगेडि सिकायाछु र घर घरमै गैइ स्हबै कुडा तुमिहरुकन सिकाउनबाट मु पछि स्हरिन। 21 यहुदिहरु र ग्रिकहरुकन आम्नो आम्ना पापबाट पछ्ताप गरि परमेसोरपट्टि फर्क र हाम्मो प्रभु इसु ख्रिस्टमै बिसास गर भुन्न्या कुडाको बार्यामै मोइले सिकायाछु। 22 अब स्हुन, मुकन पबित्त आत्माले भुन्या उन्सार बाद्य भयार यरुसलेममै जानैछु, ताँइ मुकन क्या कैथो हुन्या हो मुकन केइ पुनि थाँ नाइ। 23 तर मोइले यति मात्तै थाँ पायाछु, कि स्हबै सहरमै मुकन दुख हुन्याछ र मोइले झ्यालखानमै मथ्थै दुख स्हनु पड्न्याछ भुनि पबित्त आत्माले मुकन भुन्याछुन्। 24 तर मु आम्नो जिबनकन ठुलो र प्यारो ठान्नैन। यइ मात्तै स्हुइतोछु, कि परमेसोरको दयाको राम्मो रैबार स्हुनाउन प्रभु इसुबाट पाया यइ काम मु पुरा गन्न स्हकु। 25 “अब हेर, मु जान्नाछुकि तुमिहरु मद्दि स्हबै जो जोकन मोइले परमेसोरको राज्याको बार्यामै स्हुनाउँदै हड्या। तुमिहरुले मेरो मुख फेरि अब कैले पुनि देख्न्यानाइ। 26 यइबिअ आजै मु तुमिहरुकन स्हाँचि दिनै भुन्नोछु, यति तुमिहरुमद्दि कोइ नास भयौं भुन्या तेइखो दोस मुकन लाग्न्यानाइ। 27 क्यानभुन्या परमेसोरले हाम्मो निम्ति गर्या र पछि हुन्या कामको बार्यामै एक पुनि नछोडिकन स्हबै भुन्याछु। 28 तुमिहरु आम्नो निम्ति र आम्ना स्हबै मन्डलिका बिसासिहरुका निम्ति होस्यार रया। पबित्त आत्माले तुमिहरुकन मन्डलिको जुम्मा लाया हुनाले उनुले आम्नै रगतले किन्या परमेसोरको मन्डलिको हेरबिचार तुमिहरु गर। 29 क्यानभुन्या मुकन थाँ छ, कि मु गयापछि झुटा कुडा सिकाउन्याहरु ब्वाँसा जैथा मान्ठ तुमिहरुकै म्हाँजौनो पैन्याछुन्, र तिनुहरुले बिसासिहरुकन दुख दिन्याछुन्। 30 तुमिहरुकै म्हाँजौनोबाट झुटो कुडा सिकाउन्या मान्ठहरु निस्कुन्याछुन, जोले बिसासिहरुकन आपुस्हात ल्हिन्याछुन्। 31 यइबिअ तुमिहरु यइ कुडा स्हुम्जि होस्यार भैकन बस। मोइले तिन बर्स्हस्हुम्मै दिन रात रोइ रोइ तुमिहरु स्हबैकन भुन्या कुडा स्हुम्ज। 32 “अब मु तुमिहरुकन परमेसोरमै र उनुको अनुग्रको बचनकन जुम्मामै छोडिदिन्याछु, जोले तुमिहरुकन बिसासमै भरिलो पाड्न्याछ, अनि परमेसोरले आम्ना पबित्त मान्ठहरुकन असिपातको हक पुनि दिन्याछुन्। 33 मोइले कोइ मान्ठको सुन, चाँदि, र टालाको लोभ गरिन। 34 मोइले आपै काम गरिकन मेरो र मेरा स्हात्याहरुकन खाँचो पड्न्या कुडाहरु आपै पुरा गर्या तुमिहरुले देख्याछौ। 35 मोइले स्हबै कुडाको उदारन तुमिहरुकन दियाछु, कि तुमिहरुले पुनि यइथैगरि नै भौति म्हिँनेत गरि नहुन्याहरुकन देउ। प्रभु इसुको बचन स्हुम्ज, क्यागरि तिनुले आपै भुन्याछुन, ‘ल्हिन्या भुन्दा दिन्या झुन धन्न्याको हो।’” 36 यति भुन्यार पावलले घुँडा टेक्या र तिनुहरुस्हातै प्रार्थना गर्या। 37 तिनुहरु स्हबै रोया, र पावलकन अँगालो हालि माइ खाया। 38 तिनुहरुले फेरि कैले पुनि पावलको मुख देख्न पाउन्यानाइ भुनि तिनुहरु माइमरि स्हम्जुनै रोया। अनि तिनुहरुले पावलकन पानिझाँजमै पिर्याउन गया। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.