प्रेरित 2 - जुम्लीपेन्तिकोसको दिनमै पबित्त आत्मा आया 1 पेन्तिकोस भुन्न्या यहुदिहरुले मनाउन्या त्युबारको दिनमै इसुकन बिसास गन्न्याहरु स्हबै एकै ठौरमै जुम्मा भयाछिया। 2 अनि सोर्गबाट एक्कासि एक ठुलो बतास जैथै डाको आयो, र तिनुहरु बस्या पुरै घर घुन्कियो। 3 आगाका जिबा जैथै तिनुहरुति देखला पड्या, र भाग भाग भयार तिनुहरु स्हबैका माथि बस्या। 4 अनि तिनुहरु स्हबै जुना पबित्त आत्माले भरिपुरि भयार, तिनुहरुकन पबित्त आत्माले दिया सक्ति उन्सार तिनुहरुले अरु भासाहरुमै बोल्ल लाग्या। 5 तेइबेला सुन्सारका मथ्थै देसबाट इसोरभक्त यहुदिहरु यरुसलेममै आइ बस्याछिया। 6 यइ डाको स्हुन्यार मथ्थै मान्ठहरु जुम्मा भया। तिनुहरुले अचुम्म मान्या, क्यानकि मथ्थै ठौरबाट आया यहुदिहरुले आम्ना आम्ना भासामै तिनुहरुले बोलिरया स्हुन्या। 7 तिनुहरु स्हबैले अचुम्म मान्या, र भुन्न लाग्या, “क्या यिँ बोल्ल्याहरु स्हबै गालिलका मान्ठहरु हैनुन् र? 8 अनि तिनुहरुले क्यागरि हाम्मा आम्नै भासामै बोल्या हामिले स्हुन्यौं? 9 हामि नेइ पार्थिहरु, मादिहरु, एलामिहरु, मेसोपोटामियाका, यहुदियाका, कापाडोकियाका, पोन्टस र एसियाका मान्ठहरु छौ। 10 अनि फ्रिगिया, पामफिलिया, मिस्र र कुरेनिमै पड्न्या लिबियाका मथ्थै ठौरहरु र रोमबाट आया यहुदि धर्म मान्याहरु छौ, 11 क्रेटमै बैन्या मान्ठहरु र अरबिहरु पुनि छौ, अनि तिनुहरुले आम्ना आम्ना भासामै परमेसोरका म्हाँन कामहरुको बयान गरिरया हामि स्हुन्दैछौं।” 12 तिनुहरु स्हबैले अचुम्म मान्या र अल्लमल्ल पडि एकाले अक्काकन स्होदपुछ गन्न लाग्या, “नेइ क्या भैरयाछ?” 13 तर अरुहरुले हाँसो गर्यार भुन्या, “तिनुहरु नौलो जाँडले मात्तिया हुन्।” मान्ठहरुकन पत्तुरुसको प्रचार 14 तर पत्तुरुसले एगार जुना मुख्य चेलाहरु स्हात ढुक्यर ठुलो डाको गाडि तिनुहरुकन भुन्या, “यहुदियाका मान्ठौ, अनि यरुसलेममै बैन्याहरु हौं, यइ क्या भया हो मु तुमिहरुकन भुन्दोछु र तुमिहरुले यइ कुडा राम्मो गरि स्हुन। 15 क्यानभुन्या तुमिहरुले स्हुच्या जैथै यिनुहरुले अंगुरको जाँड खायर मात्तिया नाइ। अइले त ब्यानको नौ मात्तै बज्याछ। 16 तर योएल परमेसोरका रैबार्याबाट भुन्या कुडा यइ हो, 17 “‘अन्तिम दिनमै यइथो हुन्याछ भुनि परमेसोर यइथो भुन्नाछुन्, मु स्हबै मान्ठहरुमाथि मेरो आत्मा हालिदिन्याछु, र तुमिहरुका छोराहरु, र छोरिहरुले परमेसोरको रैबार बोल्ल्याछुन्, तुमिहरुका तुन्नेरिहरुले दर्सन देख्न्याछुन्, र तुमिहरुका बुडापाकाहरुले स्हुइना देख्न्याछुन्। 18 अनि तिँ दिनमै आम्ना सेबक सेबिका माथि मेरो आत्माले भरिपुरि गद्दिन्याछु, र तिनुहरुले परमेसोरको रैबार बोल्ल्याछुन्। 19 माथि सरगमै मु अचुम्मका चिनारिहरु देखाउन्याछु, र तलि धत्तिमै अचुम्मका कामहरु गन्न्याछु। रगत, आगो र ध्वाँन तिनुहरुकन देखाउन्याछु। 20 परमप्रभुको म्हाँन र अचुम्मको दिन आउनु अगाडि बेल उँद्यारो हुन्याछ र जुन रक्त जैथै हुन्याछ। 21 अनि जोले परमप्रभुको नाउँ पुकार्न्या छ, तेइले उद्दार पाउन्याछ।’” 22 “इस्राएलका मान्ठौ, मेरा कुडा स्हुन, नासरतका इसु यइथा मान्ठछिया, जैकन परमेसोरले सक्तिसालि कामहरु, अचुम्मका कामहरु र चिनारिहरुबाट तुमिहरुका अगाडि छर्लङ्गै पाड्या। तुमिहरुकन थाँ है छ कि परमेसोरले तुमिहरुका म्हाँजौनो यिँ कामहरु इसुबाट गर्याहुन्। 23 परमेसोरले गर्या पक्का योजना र पैलैदेखि थाँ भया उन्सार इसुकन तुमिहरुका हातमै दिया र यिँ इसुकन तुमिहरुले दुस्ट मान्ठहरुका हातमै स्हुम्प्यौर क्रुसमै टाँगि मान्न लायौ। 24 इसुकन परमेसोरले मित्युको दुखबाट छुटाया र ज्युँदो गर्या। क्यानकि मित्युले इसुकन कब्जामै राखिरन सुम्भब छियोन। 25 क्यानकि दाउद राजाले इसुको बार्यामै भुन्नाछुन्, “‘मोइले प्रभुकन जैलेपुनि मेरा अगाडि देख्याँ, मु भेइ मान्दैन क्यानकि परमेसोर मेरा दाइन्या पट्टि छुन्। 26 यइबिअ मेरो हिर्दया आनन्दित र मेरो मुखले परमेसोरको गाना गाउँछ। मु मरि गया पुनि आसामै ज्युँन्याछु। 27 क्यानकि तुमिले मेरो परानकन मर्याहरु बैन्या ठौरमै छोड्न्यानाइ, न त तुमिले आम्ना पबित्त मान्ठको हड कुइन दिन्याछौ। 28 तुमिले मुकन जिबन दिन्या बाटो देखायौं, अनि तुमि मोइ स्हात भया हुनाले मु जात्ति खुसि हुन्याछु।’ 29 “दाजुभाइहरु हौं, हाम्मा पुर्खा दाउदका बार्यामै मु ढुक्कले भुन्न स्हक्छु, कि दाउद मर्या र गाडिया, अनि आजका दिनस्हम्म तिनुको च्यान नेइ छ। 30 तर दाउद परमेसोरका रैबार्या छिया र तिनुका स्हुन्तानका एकजुना तिनुको राजगद्दिमै बैन्या छ भुन्न्या कुडा तिनुकन थाँ छियो। परमेसोरले तिनुस्हात यइ भाकल गर्याछिया। 31 अनि दाउदले ख्रिस्ट मर्याबाट फेरि ज्युँदिन्या बार्यामै पैलै देखि थाँ पायाछिया। अनि तिनुले ख्रिस्टको बार्यामै यइथो गरि भुन्या, “‘परमेसोरले उनुकन मर्या मान्ठहरु बैन्या ठौरमै छोड्यानुन्, अनि उनुको मर्या हड पुनि कुइन दियानुन्।’” 32 यिँ इसुकन परमेसोरले ज्युँद्याया। यइ कुडाका हामि स्हबै स्हाँचि छौं। 33 यइबिअ परमेसोरले इसुकन सोर्ग ल्हिया र आम्नो दाइन्या हातपट्टि राख्या, र बाबाबाट पबित्त आत्माको बाचा इसुले पाया, अनि तेइ बाचा उनुले हामिमाथि पबित्त आत्माले भरिदिया, जो अइले तुमिहरु देख्दै र स्हुन्दैछौ। 34-35 क्यानकि दाउद त सोर्गमै गयानुन्, तर दाउद आपै भुन्नाछुन्, “‘परमेसोरले मेरा प्रभुकन भुन्या, जब स्हम्म मु तुम्मा सत्तुरहरुकन तुम्मा खुट्टा मुनि राख्तैन। तब तुमि मेरा दाइन्या हातपट्टि बस।’ 36 “तेइबिअ इस्राएलका स्हबै झानले यइ स्हाँच्चै जान्नु पड्छ, कि तुमिहरुले क्रुसमै मार्या इसुकनै परमेसोरले प्रभु र मुक्तिदिन्या ख्रिस्ट बुनाया।” 37 यइ कुडा स्हुन्यार तिनुहरुको हिर्दय छियाछिया भयो, अनि पत्तुरुस र अरु मुख्य चेलाहरुकन तिनुहरुले भुन्या, “या दाजुभाइहरु हौ, तेस्हो भया क्या गन्न्या त?” 38 पत्तुरुसले तिनुहरुकन भुन्या, “तुमिहरु स्हबैले आम्ना पाप माप पाउनाबिअ पछ्ताप गरि इसु ख्रिस्टको नाउमै बप्तिस्मा ल्हेउ, अनि तुमिहरुले पबित्त आत्माको बरदान पाउन्याछौ। 39 क्यानकि यइ बाचा तुमिहरुका निम्ति, तुमिहरुका छोराछोरिका निम्ति र टाडा रया स्हबैका निम्ति हो, जै जैकन प्रभु हाम्मा परमेसोरले घोइराउन्छुन्।” 40 अनि पत्तुरुसले अरु मथ्थै कुडाहरुबाट तिनुहरुकन स्हाँचि दिया, र यइथो भुनि अत्तो दिया, “यइ पापि पुस्ताबाट तुमिहरुले आपैकन आइ पड्न्या दण्डबाट बचाओ।” 41 तब मथ्थैले पत्तुरुसका कुडाकन बिसास गर्या र तिनुहरुले बप्तिस्मा ल्हिया, तेइ दिन लगभग तिन हजार मान्ठहरु तिनुहरुस्हात थपिया। 42 अनि तिनुहरु मुख्य चेलाहरुका सिच्छ्या, सङ्गति, प्रभुभोज र प्रार्थनामै जैलेपुनि लागिरन्छिया। परमेसोरकन पछ्याउन्याहरुको जिबन 43 अनि मुख्य चेलाहरुबाट मथ्थै अचुम्मका काम र चिनारिहरु भया देखेर स्हबैले मुनमुनै भेइ मान्या। 44 प्रभुमै बिसास गन्न्याहरु जति स्हबै बाद्दिनै जुम्मा हुन्छिया, र तिनुहरुका स्हबै चिज स्हाजा छिया। 45 तिनुहरुले आम्ना जग्गा जुमिन र चिजबिज बेचिकन जै जैकन खाँचो पड्डो छियो तिँ स्हबै तिनुहरुकन बाँडिदिन्छिया। 46 तिनुहरु एकै मुनका भइ परमेसोरको मुन्दिरमै जुम्मा हुन्छिया, र घर घरमै प्रभुभोज खान्छिया, अनि तिनुहरु खुसि हुनै र स्हुद्दो हिर्दयाले मिलिजुलि खान्छिया, 47 जैलेपुनि परमेसोरको गुनगान गद्दाछिया, र अरु मान्ठहरुले पुनि तिनुहरुकन ठिक मान्ना छिया। तिनुहरुस्हात मुक्ति पाउन्या मान्ठहरु दिनदिनै परमेसोरले थपि दिन्छिया। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.