२ तिमोथि 2 - जुम्ली1 यइबिअ मोइले मान्याको छोरा तिमोथि, ख्रिस्ट इसुमै भया अनुग्रमै भरिला हौ। 2 एतिका जुनाकन स्हाँचि राखि तुमिले मुबाट ज्या कुडा स्हुन्याछौ, ति कुडा अरुहरुकन पुनि सिकाउन स्हक्न्या बिसासिला मान्ठकन जुम्मा लाया। 3 ख्रिस्ट इसुका राम्मा सिपाइकाजैथै तुमिले दुख स्हौ। 4 सेनामै भत्ति भया सिपाइ अरु धन्दामै अल्जुनैनन्, क्यानकि उनुकन भत्ति गद्दिन्याकन खुसि पाड्नु तेइको काम हुन्छ। 5 खेलमै भाग ल्हिन्याले नियम उन्सार नखेल्या स्हम्म कोइ खेलाडिले पुनि इनाम पाउन स्हक्तैन। 6 म्हिनेत गन्न्या किसानले नै बालिको पैलो भाग पाउनुपड्डोछ। 7 मु क्या भुन्नाछु तेइ राम्मरि बिचार गर, क्यानभुन्या स्हबै कुडामै प्रभुले तुमिकन बुइन्या तागत दिन्याछुन्। 8 मर्याकाहरुबाट ज्युँदिया इसु ख्रिस्टकन स्हुम्ज, उनु दाउद राजाका सुन्तान हुन्, मोइले प्रचार गर्या राम्मो रैबार यइ हो। 9 तेइ राम्मो रैबार स्हुनाया हुनाले मोइले जात्ति दुख पाइरयाछु र अपरादिका जैथै स्हाङ्लाले बानियाँछु। तर परमेसोरका बचन स्हाङ्लाले बानिदैनुन्। 10 यइबिअ परमेसोरले छान्याहरुका लेखि मु स्हबै स्हन स्हक्छु, क्यानभुन्या तिनुहरुले पुनि कैलै नस्हकिन्या महिमा र ख्रिस्ट इसुमै भया मुक्ति पाउन स्हकुन्। 11 यइ कुडा पक्का छ, यति हामि उनुस्हातै मर्याकाछौं भुन्या, हामि पुनि उनुस्हातै ज्युँदिन्याछौं, 12 हामिले स्हयौं भुन्या, हामि पुनि उनुस्हातै राज गन्याछौं, हामिले उनुकन मान्न छोड्यौं भुन्या, उनुले पुनि हामिकन मान्न छोड्न्याछुन्, 13 हामि बिसासिलो नभया पुनि, उनु त बिसासिलो रैइरन्या छुन्, क्यानकि उनुले आम्ना कुडा कैले पुनि इन्कार गन्न स्हक्तैनुन्। परमेसोरले छान्या सेबक 14 यि कुडा तिनुहरुकन स्हुम्जाइदिया, र तिनुहरुले सब्द सब्दमै बोलाबोल गन्न्या काम नगर भुनि प्रभुका अगेडि आग्या देउ, तेइले राम्मो गद्दैन तर स्हुन्न्याहरुको बिसासमै हानि गद्दोछ। 15 स्हरम मान्न नपड्न्या र स्हाँचो बचनकन स्हइ किसिमले काम गन्न्या जैथै आपुकन परमेसोरको मुन पड्न्या हुन कोसित गर। 16 परमेसोरकन नमान्न्या कुडा छोड क्यानभुन्या यइले मान्ठहरुकन झुन परमेसोरबाट परै राख्तोछ। 17 तिनुहरुका कुडा कैले निकै नहुन्या सुइनको घाजैथै बड्डै जान्याछ। तेइथा कुडा गन्न्या मान्ठहरु मद्दि हुमेनियस र फिलेतस हुन्। 18 मर्याबाट ज्युँदिन्या कुडा पैले भैगो अब हुनैन भुनि यि दुइजुनाले स्हाँचो कुडा छोड्याछुन्। कोइ कोइका बिसासकन यिनुहरुले खलबल्याइ रयाछुन्। 19 तर परमेसोरले बिसाया जग पक्का रैरन्छ। ताँउनो छापलाइ यइ लेखियाछ, “प्रभुले आम्ना जतिकन रौन्छुन्,” र “परमेसोरको नाउँ ल्हिन्याहरु जति स्हबै अराम्मा कामहरुबाट परै बसुन्।” 20 स्हाउका घर सुन र चाँदिका भाँडाहरु मात्तै हुनैनन्, तर काठा र माटाका पुनि हुन्छुन्। कोइ मान गन्न र कोइ मान नहुन्या कामका लेखि हुन्छुन्। 21 तेइबिअ ज्या कुडाको मान हुनैन, यति कोइले तेइ कुडाबाट आपुकन स्हुद्दो पार्यो भुन्या तेइ मान भया काममै चलाइन्या भाँडो बन्न्याछ। घरा मालिकका लेखि तेइ चोखो र राम्मा काममै चलाइन्या मुनपड्दो हुन्याछ। 22 यइबिअ बुँइस हुन्जै मुनौदो आउन्या अराम्मा कुडाहरु छोड, र स्हुद्दो मुनले प्रभुको नाउँ ल्हिन्याहरु स्हात धार्मिकता, बिसास, माया र सान्तिमै लाग। 23 तर मुर्ख र लग नलाग्या कुडाहरुबाट परै रौ। तुमिकन थाँ छदैछ यइथा कुडाहरुले राडो ल्याउन्छ। 24 प्रभुको सेबा गन्न्याले राडो पाड्नुहुनैन, तर स्हबैका लेखि दया गन्न्या, सिकाउन स्हक्न्या, स्हन स्हक्न्या, 25 र स्होजो भइ आपुकन बिरोद गन्न्याहरुकन स्हुम्जाउन्या हुनुपड्डोछ। काँइकेइगरि परमेसोरले तिनुहरुकन पछ्ताप गन्न्या र स्हाँचो कुडाकन बुइन्या मुन दिन्याछुन्, 26 र तिनुहरु चेताया भुन्या सैतानको पास्होबाट फुत्कुन्याछुन्, क्यानकि सैतानले आम्नो ज्या मुन लाग्यो तेइ गन्न तिनुहरुकन थुनि राख्याछ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.