१ तिमोथि 6 - जुम्ली1 कमाराहरुले आम्ना मालिककन स्हबै कुडामै मान गन्नु, तेइथै गर्यौ भुन्या परमेसोरको नाउँ र हाम्मो सिच्छ्याकन निच्यौन नस्हकुन्। 2 बिसासि मालिकहरुकन तिनुका कमाराहरुले बिसासि दाजुभाइ हौ भुन्दै मान गन्न नछोड्या। बतु तिनुहरुले मालिकको अज भौति सेबा गन्नु, क्यानभुन्या तिनुहरुले गर्या सेबाको फाइदा आपैले माया गर्या बिसासि मालिकले नै पाउदाछुन्। रुपियाँ पुइसाको लाल्चो 3 यति कोइले अक्कै सिच्छ्या सिकाउन्छ र हाम्मा प्रभु इसु ख्रिस्टको स्हाँचो सिच्छ्या र परमेसोरको भक्ति गन्न्या सिछ्या मान्दैन भुन्या, 4 तेइ घमन्डले फुल्या हुन्छ, र केइ पुनि जान्या हुनैन। तेइले बिनाकामका बिसयमै राडो पाड्न्या, र सब्द सब्दको अथ्थको कुडामै निउ खोइदोछ। यि कुडाहरुले खोइरा पैन्या, राडो पाड्न्या, निच्यौन्या र अराम्मो संकाहरु हुन्या काम गद्दाछुन्। 5 अनि यइथा कुबुद्दि भया र स्हाँचो कुडाबाट पर गया मान्ठहरुका म्हाँजौदो फाटो आउन्छ, र परमेसोरको भक्ति गन्नु फाइदा उठाउन्या बाटो हो भुनि तिनुहरु स्हुइताछुन्। 6 आपुति ज्या छ तेइ कुडामै सन्तोस मानेर परमेसोरको भक्ति गन्नु नै तेइ स्हबै भुन्दा ठुलो स्हुम्पति हो। 7 क्यानभुन्या हामिले न त यइ धत्तिमै केइ ल्यायौं न त नेइबाट केइ ल्हिन स्हक्ताछौं। 8 तर खान र लाउन पुग्दोछ भुन्या तेइमै सन्तोस भया भैगो। 9 तर स्हाउ हुन्या मुन गन्न्याहरु जाँचमै पडि पास्होमै पड्डाछुन्, अनि बेकाम र दुख दिन्या कुडामै भौति मुन लाउन्छुन् र ताउनो डुब्दाछुन्। तेइथा मुन भया मान्ठहरुकन बरबाद र सत्यानासमै डुबाउन्छ। 10 क्यानभुन्या रुपियाँ पुइसाको लाल्चो गन्नु नै स्हबै किसिमका अराम्मा कुडाको जडो हो। पुइसाको लाल्चो मानि कोइ कोइ बिसासबाट अराम्मो बाटोमै लाग्याछुन्, र मथ्थै दुखले तिनुहरुका मुन पोल्या छुन्। पावलले तिमोथिकन स्हुम्जाया 11 तर परमेसोरको मान्ठ तिमोथि, यि स्हबै कुडा छोड। अनि धार्मिकता, भक्ति, बिसास, माया, धिर गन्न र झुक्न्या कुडामै मुन लाउ। 12 तुमिले बिसास गर्या कुडामै राम्मो लडाइ लड। अजम्बरिको जिबन नछोड। यइकैबिअ परमेसोरले तुमिकन छान्या, अनि तुमिले मथ्थै स्हाँचिहरुका म्हजौदो तुम्मो बिसासको राम्मो स्हाँचि दियौ। 13 स्हबै कुडाकन जिबन दिन्या परमेसोर र पन्तियस पिलातसको अगेडि स्हाँचि दिन्या ख्रिस्ट इसुको अगेडि, 14 मु तुमिकन आदेस दिन्छु, प्रभु इसु ख्रिस्ट फेरि देखाला नपरुन्जै यइ आग्याकन स्हुद्दो मुनले मान, क्यानकि कोइले पुनि तुमिकन बदि लाउन नस्हकोस्। 15 अनि धन्य र स्हबै भुन्दा माथि, राजाहरुका म्हाँराजा, प्रभुहरुका म्हाँप्रभुले स्हइ सुमयमै ख्रिस्टकन फेरि देखाला पाड्न्याछुन्। 16 उनु अजम्बरि रैरन्छुन्, र उनु तेइथो उजिलाउदो बैथाछुन् तेइ उजिला काखति कोइ पुनि जान स्हक्तैनुन्। उनुकन कोइ मान्ठले पुनि देख्या नाइ, न त देख्न स्हक्तोछ। उनुको मान होस् र सक्ति उकुरै रैरहोस्। आमेन। 17 यइ धत्तिका स्हाउहरुकन घमन्ड नगर भुन, र स्हकिन्या स्हुम्पतिमै हैन तर हाम्मो खुसिका बिअ स्हबै कुडा मथ्थै दिन्या परमेसोरमै तिनुहरुले आस राख भुनि आग्या देउ। 18 तिनुहरुले भलो गन्न्या काम गरुन्, र राम्मो कामहरुमै स्हाउ भइ खुल्ला मुनले अरुकन दिन्या होउन्। 19 यइथैगरि तिनुहरुले पछि आम्नो स्हाँचो जिबनमै काम लागन्या धुनस्हुम्पति जुम्मा गरुन् र तिनुहरुले स्हाँचो जिबन जगाइ राख्न स्हक्न्याछुन्। 20 तिमोथि, ज्या तुमिकन जुम्मा दियाछ, तेइ जगाइ राख्या। परमेसोरकन मान नहुन्या कुडाहरु नगर्या, तेइ झुटा ग्यान हुन्, तेइथा कुडाहरुबाट टाडै बस्या। 21 यइथा कुडाहरुका पछि लागेर कोइ मान्ठहरु बिसास छोडेर गया। तुमिस्हात परमेसोरको अनुग्र रैरहोस्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.