१ तिमोथि 5 - जुम्लीबिदुआ, एल्डर र कमाराहरु बार्या स्हल्ला 1 बुडापाका मान्ठकन नहप्काया, तर तिनुकन बाबाका जैथै स्हुम्जाया। आपुभुन्दा नानाकन भाइकाजो बेबार गर्या। 2 बुडि स्हैनिकन आमा मान्नु, टोकेनिहरुकन दिदि बुइनि मानि चोखो मुनले स्हुम्जाया। 3 आम्ना कोइ नभयइ बिदुआहरुको मान गन्नु। 4 कोइ बिदुआका छाचुरि या नाति-नातिनिहरु छुन् भुन्या तिनुहरुले नै हेरबिचार गरुन्। तिनुहरुले पैला आम्ना घरा झानमै धार्मिक काम पुरा गरुन् र आम्ना बाबाआमाले लाया गुन तिरुन् क्यानभुन्या यइ परमेसोरको हेराइमै ग्रहन गरिन्या लायकको हुन्छ। 5 आम्ना कोइ नहुन्या बिदुआले आम्नो आस परमेसोरमै राख्यै हुन्छ, र दिनरात सयोग पाउ भुनि प्रार्थनामै लागिराख्तिछ। 6 तर यति तिँ मोजमजामै रमलिरन्छुन् भुन्या तिँ बाँचेर पुनि मर्या जतिको हो। 7 तिनुहरुकन यइ कुडाको आग्या देउ, क्यानकि तिनुहरु बिना दोसको जिबन काटुन्। 8 यति कोइले स्हागहरुको र स्हबै भुन्दा पैला आम्ना झानको हेरबिचार गद्दैन भुन्या तेइले स्हाँचो बिसासकन छोड्या हुन्छ। तिनुहरु बिसास नगन्न्याहरु भुन्दा भौति अराम्मा हुन्छुन्। 9 साठि बर्स्ह देखि उबै बिदुआ, जैको एक चोटि मात्तै भ्या भया छियो, तिनुहरुकन मात्तै बिदुआको सुचिमै राख्या। 10 तिनुले राम्मो काम गर्यै, छाचुरिहरु हुर्कायै, परदेसिहरुको स्हुम्मान गर्यै, ख्रिस्टकन बिसास गन्न्याहरुका गोडा धोयै, दुखिहरुकन सयोग गर्यै र स्हबै किसिमका राम्मा काममै पुनि ध्यान दियै हुनु पड्छ। 11 तर बालि बिदुआहरुको नाउँ बिदुआको सुचिमै नराख्या, क्यानकि तिनुहरु फेरि भ्या गन्न मुनमान्निछुन् र ख्रिस्टमै मुन लाउन छोड्डिछुन्। 12 यइथैगरि तिनुहरुले गर्या पैलो बाचा भङ्ग गर्या हुनाले तिनुहरु दुन्डमै पड्डिछुन्। 13 तिनुहरु घरघरै डुल्या अल्छो मान्न्या तेति मात्तै हैन अक्का खिसि गन्न्या, बोल्ल नमिल्या कुडा गन्न्या हुनिछुन्। 14 यइबिअ बालि बिदुआहरुले भ्या गरि छाचुरिहरु पाइ घरबार हेरुन् र स्हत्तुरहरुले हामिकन निच्यौन्या मौका नपाउन् भुन्या मेरो मुन छ, 15 क्यानभुन्या कोइ कोइ बालि बिदुआहरु सैतानका पछि लाग्यइछुन्। 16 यति बिसासि स्हैनिका कोइ स्हाग स्हुन्तानहरुमै बिदुआ छुन् भुन्या तिनुले तिँ बिदुआहरुको हेरबिचार गन्नुपड्छ, र मन्डलिमाथि भार नपरोस्, र मन्डलिले तेइथि बिदुआहरुको हेरबिचार गन्न्न स्हकोस् जैका कोइ नाइ। 17 मन्डलिको राम्मो गरि हेरबिचार गन्न्या एल्डरहरु दोब्बर मान पाउन्या लायकका हुन्छन्, खास गरि जोले परमेसोरको बचनको प्रचार र सिच्छ्यामै म्हिनेत गद्दाछुन्। 18 क्यानभुन्या पबित्त सास्त्तरमै लेखियाछ, “दाँ माड्न्या बल्लका थोलौनो मुगालो नलाया, र काम गन्न्याले आम्नो कामको ज्याला पाउनुपड्छ।” 19 दुइ या तिन जुना स्हाँचिको बयान बिना एल्डरकन लाया बदि नमान्नु। 20 पाप गरिरन्याहरुकन स्हबैका म्हाँजौदो हप्काया, र यइथैगरि अरुहरुले पुनि पाप गन्न भेइ मानुन्। 21 परमेसोर र ख्रिस्ट इसुको अगेडि र छानिया सोर्गका रैबार्याका अगेडि मु तुमिकन स्हारो आग्या दिन्छु, कैकनै आखापाखा नगरि मोइले दिया नियमहरु तुमिले मान्नु। 22 जो पायो तेइकन हात राखेर मन्डलिको कामको जुम्मा दिन तापाताप नगर्या। कोइ पुनि मान्ठको पापमै नमिस्सिया र आपुकन पबित्त राख्या। 23 पैलाकाजुन पानि मात्तै पिन्या नगर्या, तर तुम्मा पेटा धेउका बिअ र बारबार अस्हन्चि भयाहुनाले नापा नापा अंगुरको जाँड पिन्या गर्या। 24 कोइ कोइ मान्ठका पापहरु स्होजै देखाला पड्डाछुन् र न्यायमै पड्डाछुन्। तर कोइकोइका पापहरु पछि देखाला पड्डाछुन्। 25 यइथै गरि राम्मा कामहरु देखाला हुन्छुन् र ज्या काम अदेखाला हुन्छुन् ति पुनि लुक्तैनुन्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.