१ तिमोथि 4 - जुम्लीझुटो सिच्छ्या दिन्याहरुको बिरुद्दमै चेताउनि 1 पबित्त आत्माले छर्लङ्गै पारि भुन्याछुन्, पछि आउन्या सुमयमै मान्ठहरुले छल्ल्या आत्मा र भुतका सिच्छ्यामै मुन लायर बिसासबाट तर्किन्याछुन्। 2 यइथा सिच्छ्या लबार्न्या मान्ठहरुका छलबाटै हुन्याछ, जैका स्हुचाइ पोल्ल्या फलामले डाम्मि मरिस्हक्या जैथो केइ थाँ नपउन्या बोदो हुन्छ। 3 भ्या गन्न मिल्लैन र केइ खान्या कुडा खान मिल्लैन भुनि तिनुहरुले भुन्नाछुन्। तर बिसास गन्न्याहरु र स्हाँचो कुडा जान्याहरुले धन्यबाद दिइ खान मिल्लोछ क्यानभुन्या परमेसोरले नै खान्या कुडाहरु स्हज्या हुन्। 4 परमेसोरले स्हज्या स्हबै कुडाहरु राम्मा छुन्, तेइबिअ परमेसोरकन धन्याबाद दियापछि खान नहुन्या चिज केइ नाइ। 5 क्यानभुन्या परमेसोरको बचन र प्रार्थनाले चोखो पाड्दोछ। इसु ख्रिस्टका राम्मा सेबक 6 यति तुमिले भाइहरुकन यि स्हबै कुडाका बार्यामै सिकायौ भुन्या, तुमिले मान्या राम्मा सिच्छ्या र बिसास गर्या बचनमै बलियो भइ तुमि ख्रिस्ट इसुका राम्मा सेबक हुन्याछौ। 7 परमेसोरकन मान नगन्न्या र बिना अथ्थका सिलकहरुमै मुन नलाउ। बतु परमेसोरको भक्ति गन्न्या तालिम ल्हेउ। 8 क्यानभुन्या हडको तालिमले थोकै फाइदा देला तर परमेसोरको भक्तिको तालिमले जतातेतैबाट फाइदा मिल्लोछ, क्यानभुन्या यइमै अइलेको जिबन र पछिको जिबनको फइदाको निम्ति कबुल गरियाछ। 9 यइ भनाइ पक्का हो र स्हबैले ग्रहन गन्नु पाड्न्या लाएकको छ। 10 क्यानकि यइ उदेस्यले हामि म्हिनेत र कोसित गद्दाछौ, क्यानकि हाम्मो आस ज्युँदा परमेसोरमै राख्या छ। उनु नै स्हबै मान्ठका र बिसेसगरि उनिमै बिसास गन्न्याहरुका मुक्ति दिन्या हुन्याछुन्। 11 यि कुडाहरुको बार्यामै आग्या दिनु र सिकाउनु। 12 तुमि तुन्नेरि भया हुनाले कोइले पुनि हेला गन्न नस्हकोस्, तर बिसासिहरुका म्हाँजौदो तुम्मा बोलिबचनमै, चालचलनमै, मायामै, बिसासमै र चोखो रन्या कुडामै तुमि एक उदारन बन। 13 मु नआउन्जै तुमिले मान्ठहरुकन धर्मसास्तर पाडेर स्हुनाउन्या, प्रचार गन्न्या र सिच्छ्या दिन्या कुडामै मुन लाया। 14 एल्डरहरुका हात तुमिमै राखि परमेसोरबाट बोल्दै तुमिले पाया बरदानकन लापरबाइ नगर। 15 तुमिकन जिम्मालाया कामहरु राम्मोगरि गर। तिँ कुडामै ध्यान लाया क्यानभुन्या तुम्मो फल्लिफाप भया स्हबैले देखोस्। 16 आम्नो बार्यामै र आम्नो सिच्छ्याका बार्यामै चनाखो भइ बस। यि कुडाहरुमै लागिरौ। यइथो गर्यौ भुन्या तुमि आपै र स्हुन्याहरु दुबैले मुक्ति पाउन्याछुन्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.