Zude 1 - LAYIDUKURA

¹ Ne Zude Zaki dɔgɔcɛ, ne min kɛra Yezu Krista ka baaraden ye, n bɛ bataki nin ci Ala ka mɔgɔ weleninw ma, aw minw koo ka di Faa Ala ye, ani aw minw maranin bɛ Yezu Krista ye.

² Ala ka makari ni kanuya ani hɛrɛ ka kɛ aw ye kosɛbɛ.

Ladili kalanjugu koo la

³ Ne teriw, ne tun y'a lanyini sɛbɛ la ka sɛbɛ ci aw ma an bɛɛ ka kisili koo la. Ne y'a ye k'o kɛra wajibi ye ne ma k'o kɛ waasa ka ladili di aw ma, ko aw ka jija lanaya koo la Ala y'o min di a ka jama ma sinyɛ kelen, o nyɔgɔn tɛna kɛ tugu.

⁴ Bari nanbaranmɔgɔ dɔw donna aw cɛma minw ka jalakiko fɔra Ala ka kuma na kabini tumajan. O Alanyasiranbali nunu bɛ an ka Ala ka nɛɛma koo ta k'o kɛ kokolon kɛli ye, ani u bɛɛ bɛ ban an Matigi Yezu Krista la, ale min kelenpe ye an kuntigi ye.

⁵ Aw bɛ koo nin bɛɛ lɔn kosɛbɛ, nga ne b'a fɛ k'aw hakili jigi o la, ko Matigi ye a ka jama Isirayɛlidenw kisi k'u bɔ Ezipiti jamana na tuma min na, mɔgɔ minw tun ma l'a la, ale yɛrɛ ye olu faga.

⁶ Mɛlɛkɛ minw ma se ka wasa u ka lɔyɔrɔw la n'u bɔra yen, Ala ye olu siri ni jɔrɔkɔ tigɛbali ye k'u mara dibi kɔnɔ sini kitiba kama.

⁷ O cogo la fana, Sodɔmu ni Gɔmɔri ani u dafɛ duguw mɔgɔw tun kɛra i n'a fɔ o mɛlɛkɛ nunu, u tun y'u yɛrɛ bila kakalaya la. Hali koo minw tun tɛ bɛn adamaden cogo ma, u tun bɛ u kɛ. O la, olu jɛnina ni tasuma fagabali ye, ka kɛ nyayira fɛɛnw ye.

⁸ O cogo la fana, o mɔgɔ nunu b'o koow kɛ k'u yɛrɛ nɔgɔ ka ban Ala ta ma ka mɛlɛkɛw nɛni nɔɔrɔ bɛ o minw kan.

⁹ O ye koo ye, hali mɛlɛkɛw ka nyamɔgɔ Misɛli ma sɔn k'o min kɛ. Tuma min na, a tun bɛ sɔsɔli kɛra ni Sutana ye Musa suu koo la, a y'a yɛrɛ minɛ, a ma sɔn ka Sutana nɛni. Nga a y'a fɔ ko: “Ala bɛna i sara.”

¹⁰ O mɔgɔ nunu tɛ fɛɛn minw lɔn, u bɛ olu le lɔgɔbɔ. Lɔnniya min b'u fɛ, o ye adamaden ta ye, o ni kongosogo bɛɛ ta ka kan, o le b'u bila halakili la.

¹¹ Bɔnɛ y'u ta ye, bari u ye Kayɛn ka sirajugu nyɔgɔn taama. U ye tinyɛ sira bila sara kama i n'a fɔ Balamu tun y'a kɛ cogo min na. U ta cɛnna murutili kama i n'a fɔ Kɔre halakira cogo min na.

¹² Olu le bɛ koo caaman nyagami aw ka balimaya dumuni kɛtuma na, u tɛ malo, u tɛ mɔgɔ si jati, u b'a fɛ olu dama ka fa. U kɛra i n'a fɔ sankaba gwɛmanw, fɔnyɔ b'o minw ta ka yaala n'u ye. U bɛ i n'a fɔ yiri denbaliw, yiri minw juuw bɔnna, u fagara pewu.

¹³ U kɛra i n'a fɔ jikuruw kɔgɔji kan, u ka kɛta bɛ i n'a fɔ jii kankan min b'u maloya. U bɛ i n'a fɔ lolo minw bɛ bɔ sankolo la ka ben. Ala y'u mara dibiba kama min tɛ tɛmɛ.

¹⁴ Enɔki min ye wolokun wolonwulanan ye k'a ta Adama ma, ale ye kiraya kuma fɔ u koo la ko: “Heyi! Matigi bɛna na n'a ka mɛlɛkɛ senuman waa caaman ye.

¹⁵ A bɛna bɛɛ kiti, ka Alanyasiranbaliw jalaki u ka kojugu sifa bɛɛ la, ani u ka kumajugu fana u ye olu minw fɔ a koo la.”

¹⁶ O mɔgɔ nunu dusu man di, u bɛ ;nunu;nunu, u bɛ taama ka kɛnyɛ n'u yɛrɛ ka nigɛjugu ye dama. U dalakuma bɛɛ kɛra yɛrɛbonya kuma ye, u bɛ mɔgɔw nigɛ u yɛrɛ ka nafa kama.

Kangari lanin mɔgɔnyumanw ye

¹⁷ Ne teriw, aw k'aw hakili to an Matigi Yezu Krista ka cidenw ka kuma fɔninw na.

¹⁸ Olu tun y'a fɔ aw ye ko: “Waati laban na, kolɔgɔbɔbagaw bɛna sɔrɔ. U bɛna taama ka kɛnyɛ n'u ka nigɛjugu ye.”

¹⁹ O mɔgɔ nunu yɛrɛ yɛrɛ lo, olu le bɛ mɔgɔw bila nyɔgɔn na, u ka koo bɛɛ ye adamadenya ye, Ala ka Nii tɛ u fɛ.

²⁰ Nga aw kɔni, ne teriw, aw ka jija ka taa nya aw ka jiginyuman koo la, ani ka Ala dali Nii Senuman barika la.

²¹ Aw ka to Ala ka kanuya la, k'aw jigi la an Matigi Yezu Krista ka makari kan, ka sini hɛrɛ kɔnɔ.

²² Mɔgɔ minw bɛ sigasiga, aw ye makari u la,

²³ k'u kisi ka bɔ tasuma na, ka makari tɔ nunu na fana, nga o ka kɛ ni siranya ye. U ka kɛwalijuguw koo ka goya aw ye i n'a fɔ u ka faniw minw nɔgɔra u ka kɛwalijuguw fɛ.

Ala tandoli

²⁴ Ala min bɛ se k'aw tanga aw kana ben, ani k'aw kɛ jalakibaliw ye ka nisɔndiya di aw ma kosɛbɛ a nyakɔrɔ,

²⁵ ale kelenpe min y'an Kisibaga ye an Matigi Yezu Krista barika la, nɔɔrɔ ni bonya ani sebagaya ni kuntigiya ka kɛ ale ye k'a ta a daminɛ, ka se sisan ma ni tuma bɛɛ. Amiina.