Yuhana 8 - LAYIDUKURA

Kakalamuso ka koo

¹ O kɔ, Yezu taara Olivuyirikulu kan.

² Sɔgɔmada joona dɔrɔn, a segira ka na Alabatosoba kɔnɔ. Jama tun bɛ nan'a fɛ minkɛ, a sigira ka to k'u kalan.

³ Sariya karamɔgɔw ni Farizinyɛw ye muso dɔ minɛ kakala kɛyɔrɔ la ka na n'a ye k'a lɔ jama cɛma

⁴ ka Yezu nyininga ko: “Karamɔgɔ, muso nin tun lanin bɛ ni cɛɛ dɔ ye, an y'a minɛ.

⁵ Sariya la, Musa y'a fɔ an ye ko an k'o muso sugu bon k'a faga ni kabakuruw ye. Ele do, e ko di?”

⁶ U ye jaan la ten n'u ka kuma ye waasa ka se ka Yezu jalaki. Nga Yezu y'a kuun biri ka to ka sɛbɛnni kɛ duguma n'a bolokɔniden ye.

⁷ U tora ka nyiningali kɛ minkɛ, Yezu y'a kuun wili k'a fɔ u ye ko: “Mɔgɔ min b'aw cɛma n'a ma kojugu kɛ ka ye, o tigi ka kɔn ka muso nin bon.”

⁸ A y'a kuun biri tugu ka to ka sɛbɛnni kɛ duguma.

⁹ O fɔra u ye minkɛ, u bɛɛ bɔra kelen kelen, fɔɔ ka taa ban, k'a daminɛ u bɛɛ kɔrɔw ma, ka muso nin to a kelen ni Yezu ye.

¹⁰ Yezu y'a kuun wili, k'a fɔ a ye ko: “Muso, u bɛ min do? Mɔgɔ si m'i jalaki kɛ?”

¹¹ A y'a jaabi ko: “Matigi, mɔgɔ si.” Yezu ko: “Ne fana tɛna i jalaki. Taa, nga i kana kojugu kɛ tugu.”]

Yezu ye dinyɛ ka yeelen ye

¹² Yezu kumana jama fɛ tugu ko: “Ne ye dinyɛ ka yeelen ye. Ni mɔgɔ min sɔnna ne ma, o tigi tɛna taama dibi la. A bɛna to yeelen na min bɛ ta'a don sini hɛrɛ yɔrɔ la.”

¹³ O la, Farizinyɛw y'a fɔ a ye ko: “E b'i yɛrɛ koo fɔra sisan kɛ, tinyɛ tɛ i ka fɔta nin na.”

¹⁴ Yezu y'u jaabi ko: “Ayiwa, ne bɛ n yɛrɛ koo fɔ, ne bɛ tinyɛ le fɔra, bari ne bɛ n bɔyɔrɔ lɔn ka n taayɔrɔ lɔn. K'a sɔrɔ aw tɛ ne bɔyɔrɔ lɔn, aw tɛ n taayɔrɔ fana lɔn.

¹⁵ Aw kɔni bɛ mɔgɔw jalaki ka kɛnyɛ ni adamadenya ye. Ne tɛ mɔgɔ si jalaki.

¹⁶ Nga ni ne bɛ mɔgɔ jalaki, n b'a kɛ ni tilenninya ye. Bari ne kelen t'o kɛ. Ne ni n cibaga le b'o kɛ.

¹⁷ A yɛrɛ fɔra aw ka sariya la ko ni mɔgɔ fila ka seereya bɛnna nyɔgɔn ma, o ye tinyɛ ye tigitigi.

¹⁸ Ne bɛ n yɛrɛ koo fɔ, ani Faa min ye ne ci, ale ye ne seere ye fana.”

¹⁹ U y'a nyininga ko: “E Faa nin bɛ min?” Yezu y'u jaabi ko: “Aw tɛ ne lɔn, aw tɛ n Faa fana lɔn. N'aw tun bɛ ne lɔn, aw tun bɛna n Faa fana lɔn.”

²⁰ Alabatosoba yɔrɔ min bɛ wele ko Nafolo marayɔrɔ, a ye kuma nunu fɔ o yɔrɔ la le, o y'a sɔrɔ a bɛ mɔgɔw kalanna. Mɔgɔ si ma se ka maga a la, bari a ka waati tun ma se fɔlɔ.

Yezu cibaga y'a Faa ye

²¹ Yezu y'a fɔ jama ye tugu ko: “Ne bɛ taa, aw bɛna ne yɔrɔ nyini ka dɛsɛ, aw bɛna sa n'aw ka kojuguw ye. Ne bɛ taara yɔrɔ min na, aw tɛ se ka taa yen.”

²² O la, Zuwifuw y'a fɔ ko: “N'a sɔrɔ a b'a fɛ k'a yɛrɛ faga le, bari a b'a fɔra ko ale bɛna taa yɔrɔ min na, ko an tɛ se ka taa yen.”

²³ Yezu y'u jaabi ko: “Aw ye dugukolo kan mɔgɔw ye, nga ne bɔra sankolo la. Aw ye dinyɛ nin ka mɔgɔw ye. Nga, ne tɛ yan mɔgɔ ye.

²⁴ O kama lo ne y'a fɔ aw ye ko aw bɛna sa n'aw ka kojuguw ye. Ne ko ne ye min ye, n'aw ma la o la, aw bɛna sa n'aw ka kojuguw ye sɛbɛ la.”

²⁵ O la, u y'a nyininga ko: “E ye jon ye?” Yezu y'u jaabi ko: “Kabini a daminɛ na, n m'o fɔli dabila.

²⁶ Kuma caaman bɛ n fɛ k'o fɔ aw koo la, k'aw jalaki. Ne cibaga ye tinyɛtigi ye, ne ye min mɛn ale fɛ, ne b'o le fɔ mɔgɔw ye.”

²⁷ U ma se k'a faamu ko a bɛ Faa Ala le koo fɔra u ye.

²⁸ O la, Yezu y'a fɔ u ye ko: “N'aw ye Mɔgɔ Dencɛ kɔrɔ ta sanfɛ ka ban tuma min na, ne ye min ye, aw bɛna o lɔn, ko ne tɛ foyi kɛ n yɛrɛ ma. N Faa ye min fɔ n ye, ne b'o le fɔ.

²⁹ Ne cibaga bɛ ni ne ye. A ma ne to n kelen, bari min ka d'a ye, ne bɛ o le kɛ tuma bɛɛ.”

³⁰ A tun bɛ kumana ten minkɛ, mɔgɔ caaman lara a la.

Yezu ni Zuwifuw bɛ nyɔgɔn sɔsɔra

³¹ Zuwifuw nyamɔgɔ minw lara Yezu la, a y'a fɔ olu ye ko: “N'aw ye ne ka kuma labato, aw bɛ kɛ n ka kalandenw ye tinyɛ na.

³² O la, aw bɛna tinyɛ lɔn, o tinyɛ le bɛna aw kɛ hɔrɔnw ye.”

³³ U y'a jaabi ko: “Anw ye Ibrayima deenw ye. An ma deli ka kɛ mɔgɔ si ka jɔɔn ye. I bɛ se k'a fɔ cogo di ko an bɛna kɛ hɔrɔnw ye?”

³⁴ Yezu y'u jaabi ko: “Tinyɛ tinyɛ na, mɔgɔ o mɔgɔ bɛ to ka kojugu kɛ, o tigi ye kojugu ka jɔɔn le ye.

³⁵ Jɔɔn tɛ jati a kuntigi ka somɔgɔw dɔ ye, nga a kuntigi deen jatinin lo tuma bɛɛ.

³⁶ Ayiwa, n'o Deen nin y'aw hɔrɔnya, o bɛ kɛ hɔrɔnya dafanin ye.

³⁷ Ne y'a lɔn ko aw ye Ibrayima deenw ye. Nga ne ka kuma tɛ donna aw dusu la, o kama aw bɛ ne fagayɔrɔ nyinina.

³⁸ Ne ye min ye n Faa Ala fɛ, ne b'o le fɔ. K'a sɔrɔ aw ye min mɛn aw faa fɛ, aw b'o le kɛ.”

³⁹ U y'a jaabi ko: “Anw faa ye Ibrayima le ye.” Yezu y'a fɔ u ye ko: “N'aw faa ye Ibrayima ye, aw k'a ka kɛwaliw nyɔgɔn kɛ.

⁴⁰ Aw t'o kɛ. Ne ye tinyɛ kuma min mɛn Ala fɛ, ne y'o bɛɛ fɔ aw ye. Nga aw bɛ ne fagayɔrɔ le nyini, k'a sɔrɔ Ibrayima m'o nyɔgɔn kɛ.

⁴¹ Aw b'aw faa ka kɛwaliw le kɛ.” U y'a jaabi ko: “A ma kɛ i n'a fɔ ko anw ye nyamɔgɔdenw ye dɛ! Faa kelen le bɛ an fɛ: o ye Ala ye.”

⁴² Yezu y'a fɔ u ye ko: “Ni Ala tun ye aw Faa ye, ne koo tun bɛna diya aw ye, bari ne bɔra Ala le fɛ ka na. Ne ma na n yɛrɛ ma. Ale le ye ne ci.

⁴³ Ne bɛ minw fɔ aw ye, mun na aw t'o faamu? Bari aw ma sɔn ka mɛnni kɛ.

⁴⁴ Aw faa ye Sutana le ye. Aw do b'a fɛ k'ale sago le kɛ. Kabini dinyɛ daminɛtuma na, ka mɔgɔ nii bɔ, o le kɛra a sago ye. A ma sɔn ka tinyɛ fɔ ka ye, bari tinyɛtigi tɛ. N'a bɛ kuma o kuma fɔ, o bɛɛ bɛ kɛ galon ye, bari, ale yɛrɛ le ye galon faa ye.

⁴⁵ Ne kɔni, ne bɛ tinyɛ fɔra minkɛ, o kama lo aw tɛ lara ne la.

⁴⁶ Aw la jon bɛ se k'a disi gosi ko ne ye kojugu kɛ? Ne bɛ tinyɛ fɔ aw ye, mun na aw tɛ la ne la?

⁴⁷ Mɔgɔ min ye Ala ka mɔgɔ ye, o tigi bɛ mɛnni kɛ Ala fɛ. Aw tɛ Ala ka mɔgɔw ye minkɛ dɛ, o kama aw tɛ sɔn ka mɛnni kɛ ne fɛ.”

⁴⁸ Zuwifu nunu y'a jaabi ko: “An ye min fɔ tinyɛ yɛrɛ lo. I ye Samarika ye, i ye jinatɔ ye.”

⁴⁹ Yezu y'u jaabi ko: “Ne tɛ jinatɔ ye dɛ, ne bɛ kunkɔrɔta di n Faa le ma, k'a sɔrɔ aw b'a la ka ne dɔgɔya.

⁵⁰ O n'a ta bɛɛ, ne tɛ n yɛrɛ ka bonya nyinina. Ne bonyabaga bɛ yen, min bɛ bonya la ne kan, a bɛ kiti tigɛ fana.

⁵¹ Tinyɛ tinyɛ na, ne b'a fɔ aw ye ko ni mɔgɔ min ye ne ka kuma labato, o tigi tɛ sa abada!”

⁵² O la, Zuwifuw nunu y'a fɔ a ye ko: “Sisan kɔni, an y'a lɔn ko i ye jinatɔ ye tinyɛ na! Ibrayima sara, kiraw fana sara. E ko ni mɔgɔ min ye ele ka kuma labato, k'o tigi tɛna sa abada!

⁵³ An faa Ibrayima min sara, e ka fisa n'o ye wa? Kiraw fana sara. E b'i yɛrɛ jati mun le ye sa?”

⁵⁴ Yezu y'u jaabi ko: “Ni ne bɛ n yɛrɛ tando, o tandoli nin tɛ foyi nya. Ne Faa le bɛ n tando. Aw k'o min y'aw ka Ala ye.

⁵⁵ K'a sɔrɔ aw do t'a lɔn. Ne kɔni b'a lɔn. Ni ne y'a fɔ ko n t'a lɔn, an bɛɛ bɛ kɛ kelen ye, ne fana bɛ kɛ galontigɛla ye. Nga, ne b'a lɔn, n b'a ka kuma labato fana.

⁵⁶ Aw faa Ibrayima nisɔn tun diyara, bari a miirila ko a bɛna ne ka tile ye. A do y'a ye, o nisɔndiya nin y'a wasa.”

⁵⁷ Zuwifu nunu ko: “E yɛrɛ sii ma saan bi duuru bɔ fɔlɔ, e ko i ye Ibrayima ye!”

⁵⁸ Yezu y'a fɔ u ye ko: “Tinyɛ tinyɛ na, ne b'a fɔ aw ye ko sanni Ibrayima ka wolo, ne tun bɛ yen.”

⁵⁹ Aa, o yɔrɔ la u ye kabakuruw cɛ k'u bɛ Yezu bon, nga a dogora ka bɔ Alabatosoba kɔnɔ.