Yuhana 4 - LAYIDUKURA

Yezu ni Samari muso dɔ

¹ Yezu bɔra a kala ma ko Farizinyɛw y'a mɛn ko ale ye kalanden caaman sɔrɔ ka tɛmɛ Zan kan ani ka to ka mɔgɔw batize ka tɛmɛ a kan fana.

² K'a sɔrɔ Yezu yɛrɛ tun tɛ mɔgɔw batizera. A ka kalandenw le tun bɛ mɔgɔw batize.

³ O la, Yezu bɔra Zude mara la ka segi ka taa Galile.

⁴ Sanni a ka se Galile mara la, fɔɔ a ka Samari mara cɛtigɛ.

⁵ A sera Samari dugu dɔ la min tɔgɔ ko Sikari. Yakuba tun ye foro min di a deen Yusufu ma, o n'o dugu nin man jan.

⁶ Yakuba ka kɔlɔn tun b'o yɔrɔ la. Yezu sɛgɛnna taama fɛ, a taara sigi o kɔlɔn nin daa la. O y'a sɔrɔ tile tun gwanna.

⁷ Samari muso dɔ nana jii bɔyɔrɔ, Yezu y'a fɔ a ye ko: “N sɔn jii la n b'a min.”

⁸ O y'a sɔrɔ a ka kalandenw tun taara dumuni sanyɔrɔ dugu kɔnɔ.

⁹ Muso nin y'a jaabi ko: “Uun! E min ye Zuwifu ye, i bɛ sɔn ka jii dali ne Samarika fɛ wa?” (Tinyɛ na, bɛɛn tun tɛ Samarikaw ni Zuwifuw cɛ.)

¹⁰ Yezu y'a jaabi ko: “Ala bɛ min di mɔgɔ ma, n'i tun bɛ o lɔn, ani mɔgɔ min ko i k'ale sɔn jii la, n'i tun b'o fana lɔn, e yɛrɛ le tun bɛna kɔn k'ale dali. A tun bɛna jii d'i ma o min bɛna hɛrɛ banbali d'i ma.”

¹¹ Muso y'a jaabi ko: “Juru t'i bolo, kɔlɔn fana ka dun. I bɛna o jinyuman nin bɔ min?

¹² O tuma na, an bɛma Yakuba min ye kɔlɔn nin sogi an ye, e ka fisa o ye wa? Ale n'a deenw n'a ka begɛnw bɛɛ y'a jii min.”

¹³ Yezu y'a jaabi ko: “Ni mɔgɔ o mɔgɔ ye kɔlɔn nin jii min, minnɔgɔ bɛna o tigi minɛ tugu.

¹⁴ Nga jii min bɛ ne fɛ, ni ne y'o di mɔgɔ min ma k'a min, minnɔgɔ tɛna o tigi minɛ tugu fewu. Ne bɛna jii min d'o tigi ma, o bɛna kɛ jii woyota ye min bɛ woyo a kɔnɔ tuma bɛɛ, o min bɛ sini hɛrɛ di.”

¹⁵ Muso nin y'a fɔ a ye ko: “Matigi, o jii nin di ne ma waasa minnɔgɔ kana n minɛ tugu ani n kana na yan jita kama tugu.”

¹⁶ A y'a fɔ muso nin ye ko: “Taa i cɛɛ wele ka na.”

¹⁷ Muso y'a jaabi ko: “Cɛɛ tɛ n fɛ.”

¹⁸ Yezu ko: “I ye tinyɛ fɔ ko cɛɛ t'i fɛ. Bari i furula cɛɛ duuru fɛ ka tɛmɛ. E ni min bɛ nyɔgɔn fɛ sisan, i cɛɛ tɛ, o ye tinyɛ ye.”

¹⁹ Muso ko: “Matigi, ne y'a lɔn, i ye kira le ye.

²⁰ An faaw ye Ala bato kulu nin kan, nga aw Zuwifuw ko fɔɔ Zeruzalɛmu.”

²¹ Yezu y'a jaabi ko: “Muso, la a la ko loon bɛna se, mɔgɔw tɛna na Faa Ala bato kulu nin kan ani Zeruzalɛmu tugu.

²² Aw bɛ min batora aw t'o lɔn. Nga anw b'an ka batofɛn lɔn, bari Kisibaga bɛna bɔ an Zuwifuw le cɛma.

²³ Ayiwa, loon bɛna se, a yɛrɛ sera ka ban. Alabatobagasɛbɛw bɛna na Faa Ala bato u dusu la ni tilenninya ye. Bari Faa b'o mɔgɔw nyɔgɔn le fɛ.

²⁴ Ala ye Nii le ye, mɔgɔ minw b'a bato, u ka kan k'a bato n'u dusu bɛɛ ye tilenninya la.”

²⁵ Muso ko: “Ne y'a lɔn ko Ala ka Mɔgɔ wolomanin ka kan ka na, min bɛ wele ko Krista. N'ale nana, a bɛna koo bɛɛ fɔ an ye.”

²⁶ Yezu y'a jaabi ko: “Ale le bɛ kumana n'i ye ten.”

²⁷ K'u to kuma na, a ka kalandenw sera. Olu kabakoyara ka Yezu barokɛtɔ ye ni muso ye. Nga u si ma se k'a nyininga ko: “A kɛra di?” Walima ko: “Mun na i bɛ kuma a fɛ?”

²⁸ Muso y'a ka duun filinin to o yɔrɔ la ka boli ka n'a fɔ dugu kɔnɔ ko:

²⁹ “Ee! Aw ye bɔ ka na cɛɛ dɔ filɛ! N ye koo minw bɛɛ kɛ n sii la, a y'a bɛɛ fɔ n ye. N'a sɔrɔ Ala ka Mɔgɔ wolomanin nin lo!”

³⁰ Mɔgɔw bɔra dugu kɔnɔ n'u bɛ taara Yezu sɛgɛrɛ.

³¹ O tuma na, a ka kalandenw y'a daminɛ k'a dali ko a ka dumuni kɛ. U tun b'a fɔ ko: “An karamɔgɔ, sabali ka dumuni kɛ sa.”

³² Nga a y'u jaabi ko: “Dumuni bɛ ne fɛ aw tɛ min lɔn.”

³³ A ka kalandenw tora ka nyɔgɔn nyininga ko: “Mɔgɔ dɔ nana dumuni d'a ma le wa?”

³⁴ O la, Yezu y'a fɔ u ye ko: “Ka n cibaga sago kɛ, o le ye n ka dumuni ye. Ne ka kan k'a ka baara kɛ fɔɔ ka se a daan na.

³⁵ N ko aw bɛ to k'a fɔ ko yan ni kalo naani ko suman tigɛtuma bɛ se. Ayiwa, ne b'a fɔ aw ye ko aw k'aw kuun kɔrɔ ta ka filɛli kɛ. Sumanw mɔnin lo kongo kɔnɔ.

³⁶ Mɔgɔ min y'o tigɛbaga ye, o tigi bɛ sumankisɛ lajɛn sini kama. A b'a ka sara sɔrɔla ka ban. O min ye sini hɛrɛ ye. O bɛ kɛ, waasa sumantigi ni sumantigɛbaga bɛɛ ka jɛn ka nisɔndiya nyɔgɔn fɛ.

³⁷ Talen dɔ ko: ‘Dɔ bɛ suman dan, dɔ wɛrɛ b'a tigɛ.’ O ye tinyɛ yɛrɛ le ye.

³⁸ Ne y'aw ci ko aw ka taa suman tigɛ foro dɔ la aw m'o min sɛnɛ. Dɔw le sɛgɛnna a sɛnɛ na, aw ye nafa sɔrɔ olu barika la.”

³⁹ Dugu nin mɔgɔw caaman lara Yezu la. Bari muso nin tun y'a fɔ u ye ko ale ye koo min bɛɛ kɛ a sii la, ko a y'o bɛɛ fɔ ale ye.

⁴⁰ O Samarika nunu nana se Yezu fɛ fana, u y'a dali ko a ka to n'u ye. A ye tile fila kɛ u fɛ.

⁴¹ Mɔgɔ caaman lara a la a ka kuma kɔsɔn ka tɛmɛ muso ta kan.

⁴² U tora k'a fɔ muso nin ye ko: “K'i ka kuma yɛrɛ bɔ a la, anw lara a la bari an y'a yɛrɛ lamɛn. An lanin b'a la ko nin le ye dinyɛ kisibaga yɛrɛ yɛrɛ ye.”

Yezu bɛ faamacɛ dɔ deen kɛnɛya Kana

⁴³ Tile fila tɛmɛnin kɔ, Yezu bɔra o yɔrɔ la ka taa Galile mara la.

⁴⁴ Yezu yɛrɛ tun y'a fɔ ka kɔrɔ ko kira si tɛ bonya sɔrɔ a yɛrɛ ka dugu la.

⁴⁵ A sera Galile tuma min na, u y'a minɛ ka nya. Bari a ye koo minw bɛɛ kɛ nyanagwɛ tuma na Zeruzalɛmu, u y'o bɛɛ ye, bari u bɛɛ tun taara yen nyanagwɛ la.

⁴⁶ Yezu tun ye jii yɛlɛma k'a kɛ dɔrɔ ye dugu min na n'o ye Kana ye Galile mara la, a segira ka taa yen. Masacɛ ka baarakɛlaw kuntigi dɔ tun bɛ yen, a deen tun man kɛnɛ Kafaranamu.

⁴⁷ A y'a mɛn ko Yezu segira ka bɔ Zude ka na yen minkɛ, a taara bɔ a fɛ k'a dali ko a ka sabali ka taa ale deen kɛnɛya, ko n'o tɛ, a bɛ nyini ka sa.

⁴⁸ Yezu y'a fɔ a ye ko: “N'aw ma kabakobabaw kɛnin ye, aw tɛ la ne la fewu.”

⁴⁹ Cɛɛ ko: “Matigi, an ka taa ni n deen ma sa.”

⁵⁰ Yezu y'a fɔ a ye ko: “Taa, i deen kɛnɛyara.” Cɛɛ lara Yezu ka kuma na, a ye sira ta.

⁵¹ K'a to sira kan, a ka baaradenw tun y'a kɔɔ gwɛn, u nan'a kunbɛn sira kan k'a fɔ a ye ko a deen kɛnɛyara.

⁵² A y'u nyininga ko a nɔgɔyara waati jumɛn. U ko kunun tilefɛ lo, a ka farigwan banna.

⁵³ Cɛɛ y'a ye k'o waati yɛrɛ lo Yezu tun y'a fɔ ale ye ko: “Taa, i deen kɛnɛyara.” O la, ale n'a ka somɔgɔw bɛɛ lara Yezu la.

⁵⁴ Yezu y'o kabako filanan nin kɛ Galile mara la, a seginin kɔ ka bɔ Zude mara la.