Yuhana 21 - LAYIDUKURA

Yezu b'a yɛrɛ yira a ka kalanden wolonwula la

¹ O kɔ fana, Yezu y'a yɛrɛ yira a ka kalandenw na tugu, Tiberiyadi bada la. A y'a yɛrɛ yira cogo min na, o filɛ.

² Simɔn Piyɛri ni Toma min tɔgɔ ko Filanin, ani Natanayɛli ka bɔ Kana Galile mara la, ni Zebede deenw, ani Yezu ka kalanden mɔgɔ fila wɛrɛw, u tun bɛ nyɔgɔn fɛ.

³ Simɔn Piyɛri y'a fɔ u ye ko ale bɛ taa mɔni kɛ. Olu y'a fɔ fana k'olu bɛ taa n'a ye. U bɔra ka taa don kurun kɔnɔ, u y'o suu bɛɛ kɛ u ma jigɛ si minɛ.

⁴ Dugu gwɛra tuma min na, Yezu nana bada la, nga kalanden nunu tun m'a lɔn.

⁵ Yezu y'a fɔ u ye ko: “Hee! N teriw, jigɛ tɛ aw fɛ wa?” U y'a jaabi ko ayi.

⁶ A y'a fɔ u ye ko: “Aw ka jɔɔ fili kurun kinibolo fɛ, aw bɛna sɔrɔli kɛ.” U y'a fili yen, u yɛrɛ tun tɛ se k'u ka jɔɔ sama jigɛ ka caya kojugu fɛ.

⁷ Kalanden min koo tun ka di Yezu ye ale y'a fɔ Piyɛri ye ko: “Matigi lo!” Simɔn Piyɛri y'o mɛn tuma min na dɔrɔn ko Matigi lo, a y'a ka fani ta k'o don ka sɔrɔ ka jigi jii kɔnɔ ka taa.

⁸ Kalanden tɔw tun bɛ nana ni kurun ye n'u bɛ jɔɔ nin samana a fanin jigɛ la, bari u yɔrɔ tun man jan badagolo la, u furancɛ tun bɛ nyini ka se mɛtɛrɛ kɛmɛ bɔ.

⁹ U bɔra baa kɔnɔ tuma min na, u ye tasuma mananin sɔrɔ yen ni jigɛ lanin b'a kan, ani buru.

¹⁰ Yezu y'a fɔ u ye ko: “Aw ye jigɛ minw sɔrɔ sisan sisan, aw ye na n'u ye.”

¹¹ Simɔn Piyɛri donna kurun kɔnɔ, ka jɔɔ sama ka na n'a ye dugukolo kan. A tun fanin bɛ jigɛbaba kɛmɛ ni bi duuru ni saba la, jɔɔ n'a ka fako bɛɛ, a ma faran.

¹² Yezu y'a fɔ u ye ko: “Aw ye na an bɛ dumuni kɛ.” Kalanden si ma se k'a nyininga ko ale ye jon le ye. U tun b'a lɔn ko Matigi lo.

¹³ Yezu gwɛrɛla ka buru ta, ka dɔ di u ma, a ye jigɛ fana di u ma.

¹⁴ O le tun kɛra Yezu sinyɛ sabanan ye n'a b'a yɛrɛ yira a ka kalandenw na kabini a kununna a sanin kɔ.

Yezu bɛ Piyɛri nyiningana

¹⁵ U ye dumuni kɛ ka ban tuma min na, Yezu y'a fɔ Simɔn Piyɛri ye ko: “Zan dencɛ Simɔn, i bɛ ne kanu ka tɛmɛ nunu kan wa?” A y'a jaabi ko: “Ɔnhɔn Matigi, e yɛrɛ y'a lɔn ko ne b'i kanu.” Yezu y'a fɔ a ye ko: “I ka ne ka sagadenw dɛndɛ.”

¹⁶ O kɔ, a y'a fɔ a ye tugu a sinyɛ filanan na ko: “Zan dencɛ Simɔn, ne koo ka di i ye wa?” Piyɛri y'a fɔ a ye ko: “Ɔnhɔn Matigi, e yɛrɛ y'a lɔn ko ne b'i kanu.” Yezu y'a fɔ a ye ko: “I ka ne sagaw kɔlɔsi.”

¹⁷ O kɔ, a y'a fɔ a ye a sinyɛ sabanan na ko: “Zan dencɛ Simɔn, ne koo ka di i ye wa?” Piyɛri hakili nyagamina bari a y'a nyininga fɔɔ sinyɛ saba ko ale koo ka di a ye wa. A y'a jaabi ko: “Matigi, e yɛrɛ bɛ koo bɛɛ lɔn, e b'a lɔn ko e koo ka di ne ye.” Yezu y'a fɔ a ye ko: “I ka ne ka sagaw dɛndɛ.”

¹⁸ A ko: “Tinyɛ tinyɛ na, ne b'a fɔ i ye ko e tun ye kanbelen ye tuma min na, e tun b'i yɛrɛ cɛɛ siri i yɛrɛ ma, ani n'i tun b'a fɛ ka taa yɔrɔ min na, i tun bɛ taa yen. Nga i mana kɛ mɔgɔkɔrɔba ye tuma min na, i bɛna i bolo jan mɔgɔ wɛrɛ bɛna i siri, ka taa n'i ye yɔrɔ la i t'a fɛ ka taa yɔrɔ min na.”

¹⁹ Piyɛri tun bɛna sa cogo min ka bonya la Ala kan, a tun b'a fɛ k'o le fɔ a ye. O kɔ, a y'a fɔ a ye ko: “Tugu ne kɔ.”

Zan ka seereya

²⁰ Piyɛri y'a nyaa yɛlɛma ka kalanden min koo tun ka di Yezu ye kosɛbɛ o min tun y'a yɛrɛ jɛngɛn ka la Yezu disi kan dumuni tuma na, k'a nyininga ko: “Matigi, jon le bɛ i donna bolo la?”

²¹ Piyɛri y'ale ye tuma min na, a ye Yezu nyininga ko: “Nin do Matigi, mun le bɛna kɛ ale la?”

²² Yezu y'a fɔ a ye ko: “Hali ni ne b'a fɛ ale ka to yen fɔɔ ne ka kɔsegi ka na, e ka mun le b'o la? Ele kɔni e ka tugu ne kɔ.”

²³ O kuma le kɔsɔn, kalandenw tora k'a fɔ nyɔgɔn ye k'o kalanden nin tɛna sa tugu, nga Yezu tun m'a fɔ ko kalanden nin tɛna sa. A tun ko: “Hali ni ne b'a fɛ a ka to yen fɔɔ ne ka kɔsegi ka na, e ka mun le b'o la?”

²⁴ O kalanden kelen kelen le b'o koo nin fɔ aw ye, ale fana le y'o sɛbɛn. An fana do y'a lɔn ko a ka fɔta nunu ye tinyɛ ye.

²⁵ Yezu ye koo caaman dɔ wɛrɛw kɛ, n'u kelen kelen bɛɛ tun sɛbɛnna, ne ma l'a la k'o sɛbɛ nunu marayɔrɔ tun bɛ sɔrɔ dinyɛ na.