Yuhana 2 - LAYIDUKURA

Yezu bɛ jii yɛlɛma duvɛn ye Kana

¹ Tile fila tɛmɛnin kɔ, kɔnyɔya dɔ tun kɛra Kana, Galile mara la. Yezu bamuso tun bɛ yen.

² Yezu n'a ka kalandenw fana welenin tun bɛ yen.

³ Duvɛn tun banna minkɛ, Yezu baa taar'a fɔ a ye ko: “U ka dɔrɔ banna.”

⁴ Nga Yezu y'a jaabi ko: “Muso! E ko ne ka mun kɛ? Ne ka waati ma se fɔlɔ.”

⁵ A baa taar'a fɔ baaradenw ye ko: “N'a ye fɛɛn o fɛɛn fɔ aw ye, aw k'o kɛ.”

⁶ Daga wɔɔrɔ tun bɛ o yɔrɔ la, olu tun bilanin bɛ Zuwifuw ka yɛrɛ saniyali kɔsɔn ka kɛnyɛ n'u ka landa ye, o kelen kelen bɛɛ tun bɛ litiri kɛmɛ nyɔgɔn bɔ.

⁷ Yezu y'a fɔ u ye ko: “Aw ye daga nunu fa jii la.” U y'u fa.

⁸ Yezu y'a fɔ u ye ko: “Aw ye dɔ bɔ sisan ka ta'a di nyamɔgɔ ma.” U ye dɔ bɔ ka ta'a d'a ma.

⁹ A ye jii nin nɛnɛ, o jii min tun yɛlɛmana ka kɛ duvɛn ye. Cɛɛ m'o duvɛn bɔyɔrɔ lɔn. Nga baaradenw kɔni tun b'a lɔn, bari olu yɛrɛw le tun ye dagaw fa jii la. Nyamɔgɔ ye kɔnyɔcɛ wele

¹⁰ k'a fɔ a ye ko: “O nyɔgɔn na, mɔgɔ bɛɛ bɛ bɔ ni duvɛn diman le ye fɔlɔ. Ni mɔgɔ weleninw bɛ nyini ka fa tuma min na, u bɛ sɔrɔ ka bɔ ni dɔrɔ kumunin ye. Nga ele kɔni ye dɔrɔ diman mara fɔɔ sisan!”

¹¹ Yezu y'a ka kabako fɔlɔ kɛ ten le Kana, Galile mara la. A y'a ka sebagaya yira ten a ka kalandenw na, u lar'a la.

¹² O kɔ, a taara Kafaranamu n'a bamuso, n'a dɔgɔninw n'a ka kalandenw ye. Nga u ye tile damani dɔrɔn le kɛ yen.

Yezu bɛ feerelikɛlaw gwɛn Alabatosoba kɔnɔ

¹³ Zuwifuw ka Hɔrɔnya nyanagwɛ tun surunyana, Yezu taara Zeruzalɛmu.

¹⁴ A donna Alabatosoba kɔnɔ ka misiw ni sagaw ni tubaninw feerebagaw ani warifalenbagaw sɔrɔ yen.

¹⁵ A ye juru kɛ busan ye k'u bɛɛ gwɛn ka bɔ Alabatosoba kɔnɔ, misiw ni sagaw bɛɛ. A ye warifalenbagaw ka tabaliw bɛɛ nyagami nyɔgɔn na k'u ka wariw bɛɛ yɛrɛkɛ!

¹⁶ A y'a fɔ tubanin feerebagaw ye ko: “Aw ye nunu ta ka bɔ yan! Aw kana n Faa ka soo kɛ jago kɛyɔrɔ ye.”

¹⁷ O la, a ka kalandenw hakili jigira a la ko a fɔra Ala ka kuma na ko: “Ala, e ka soo hami bɛ ne tɔɔrɔ n dusu la kosɛbɛ.”

¹⁸ O tuma na, Zuwifuw nyamɔgɔw y'a nyininga ko: “I ye koo min kɛ sisan, i bɛ se ka kabako jumɛn kɛ min b'a yira an na ko i ka kan ka nin kɛ?”

¹⁹ Yezu y'u jaabi ko: “Aw ka Alabatosoba nin ci, ne bɛn'a bɛɛ lɔ tile saba kɔnɔ.”

²⁰ Zuwifuw y'a jaabi ko: “I ko di? Soo nin lɔra saan bi naani ni wɔɔrɔ kɔnɔ, e ko i bɛna o lɔ tile saba kɔnɔ kɛ!”

²¹ Yezu tun bɛ Alabatosoba min ma, o tun ye a yɛrɛ koo ye.

²² Ayiwa, Yezu sara ka kunun tuma min na, a ka kalandenw hakili sɔrɔla ka jigi a ka kuma fɔnin na. O tuma na, u lara Ala ka kuma na, ka la ale Yezu ka kuma fɔninw fana na.

Yezu bɛ adamaden kɔnɔnako lɔn

²³ Ka Yezu to Zeruzalɛmu Hɔrɔnya nyanagwɛ la, a ye kabako minw kɛ mɔgɔw nyana, caaman lara a la olu kɔsɔn.

²⁴ Nga Yezu kɔni tun ma la olu la, bari a tun b'u bɛɛ kɔnɔnakow lɔn.

²⁵ Ka mɔgɔw ka koo nyafɔ a ye, a mako tun tɛ o la, bari a bɛ adamaden n'a kɔnɔnako bɛɛ lɔn.