Yuhana 17 - LAYIDUKURA

Yezu bɛ Ala dali a ka mɔgɔw ye

¹ Yezu y'o kuma nin fɔ ka ban dɔrɔn, a y'a nyaa kɔrɔ ta sanfɛ k'a fɔ ko: “N Faa, waati sera sisan i ka bonya la i Deen kan, janko ne fana ka bonya la ele kan,

² bari i ye kuntigiya di ne ma adamaden bɛɛ kan, ka hɛrɛ banbali di ne ka mɔgɔw bɛɛ ma i ye o minw di ne ma.

³ Sini hɛrɛ sɔrɔko bɛ bɔ ele lɔnko la. Ele min ye Ala kelenpe ye, ani ka ne Yezu Krista lɔn, e ye ne min ci.

⁴ Ne y'i bonya ka ban dugukolo kan, i tun ye baara minw di ne ma, ne ye olu bɛɛ kɛ ka ban.

⁵ Sisan n Faa, bonya min tun bɛ ne kan i gɛrɛfɛ fɔlɔfɔlɔ sanni dinyɛ ka dan, i k'o nyɔgɔn la ne kan ne ka to i gɛrɛfɛ tugu.

⁶ “I ye mɔgɔ minw woloma k'u bɔ dinyɛ mɔgɔw cɛma k'u di ne ma, ne y'i ka koo yira u la. U tun ye i taw ye, e tun y'u di ne ma, olu fana y'i ka kuma labato.

⁷ Sisan u y'a faamu ko i ye fɛɛn minw di ne ma, ko u bɛɛ bɔra ele fɛ,

⁸ ne ye kuma min bɛɛ fɔ u ye, u lara o la ko ele le y'o fɔ ne ye, u sɔnna o ma, u fana y'a faamu sɛbɛ la ko ne bɔra e fɛ, u lar'a la ko ele le ye ne ci.

⁹ “Ne t'i dali dinyɛ mɔgɔw bɛɛ ye dɛ. Nga i ye minw di ne ma, ne b'i dali olu le ye, bari u kɛra i ta ye.

¹⁰ Fɛɛn o fɛɛn ye ne ta ye, o fana ye ele ta ye i n'a fɔ min ye i ta ye, o fana ye ne ta ye cogo min na, ne ye bonya sɔrɔ olu sababu la.

¹¹ Ne tɛna to dinyɛ kɔnɔ tugu. Olu bɛna to dinyɛ na, ne do bɛ taara e fɛ. N Fanyuman, ne b'i dali i k'u mara i tɔgɔ kɔsɔn i y'o min di ne ma, janko u ka se ka kɛ kelen ye i n'a fɔ ne ni ele ye kelen ye cogo min na.

¹² Ka ne to n'olu ye yan, i ye o minw woloma k'o di ne ma, ne y'o bɛɛ mara i barika la, k'u tanga juguman ma, fɔɔ min tun latigɛra halaki ma. O fana kɛra janko min fɔra i ka kuma na, o ka kɛ.

¹³ Sisan ne bɛ taara e fɛ, ne bɛ nin kuma fɔ u ye dinyɛ na, janko u ka ne ka nisɔndiya nyɔgɔn sɔrɔ.

¹⁴ Ne ye i ka kuma fɔ u ye, o la dinyɛ mɔgɔw bɛ u kɔniya, bari u ma kɛ dinyɛ mɔgɔw ye, i n'a fɔ ne fana ma kɛ dinyɛ mɔgɔ ye cogo min na.

¹⁵ Ne tɛ i dali ko i k'u ta ka bɔ dinyɛ na, nga i k'u tanga juguman ma.

¹⁶ U ma kɛ dinyɛ ka mɔgɔw ye i n'a fɔ ne tɛ dinyɛ ka mɔgɔ ye cogo min na fana.

¹⁷ I k'o kɛ u bɛ saniya i ka tinyɛ barika la. I ka kuma le ye tinyɛ ye.

¹⁸ E ye ne ci dinyɛ na cogo min na, o cogo la fana ne b'u ci dinyɛ kɔnɔ.

¹⁹ Ne fana bɛ ne yɛrɛ di u kɔsɔn, janko u fana ka se k'u yɛrɛ d'i ma sɛbɛ la.

²⁰ “Ne t'i dali olu dama ye dɛ, nga minw bɛna la ne la u ka kuma barika la, ne b'i dali olu fana ye,

²¹ janko u bɛɛ ka kɛ kelen ye, n Faa, i n'a fɔ ne ni ele ye kelen cogo min na. Olu fana ka kɛ kelen ye ten n'an ye, janko dinyɛ mɔgɔw ka l'a la ko e ye ne ci.

²² I ye bonya min di ne ma, ne y'o di u ma, janko u ka se ka kɛ kelen ye i n'a fɔ an fana ye kelen ye cogo min na.

²³ Ne ka to u fɛ, i n'a fɔ ele bɛ ne fɛ cogo min, janko u ka se ka bɛn ka kɛ kelen ye, ani dinyɛ mɔgɔw k'a lɔn ko e ye ne ci ani ko i y'u kanu i n'a fɔ i ye ne kanu cogo min na.

²⁴ N Faa, e ye minw woloma k'o di ne ma, ne b'a fɛ ne bɛ yɔrɔ min na olu fana ka kɛ o yɔrɔ la, i ye bonya min la ne kan u ka se k'o ye, bari e ye ne kanu kabini fɔlɔfɔlɔ sanni dinyɛ ka dan.

²⁵ “N Faa, e min ka nyi, dinyɛ mɔgɔw ma e lɔn, ne ye i lɔn. Nunu fana y'a lɔn ko ele le ye ne ci.

²⁶ Ne y'i koo fɔ u ye, ani n bɛna tila k'a fɔ u ye tugu, janko i ye ne kanu cogo min na, o kanuya nyɔgɔn ka don u dusu la, ani ne fana ka kɛ olu fɛ.”