Yuhana 15 - LAYIDUKURA

Yezu ko ale ye ɛrɛzɛnsun ye

¹ A y'a fɔ tugu ko: “Ne le ye ɛrɛzɛnsunsɛbɛ ye, n Faa le y'a tigi ye.

² Bolo minw bɛɛ bɛ yen, n'u tɛ deen kɛ, a bɛna olu tigɛ k'o bɔ yen, ani ne bolo o bolo min bɛ deen kɛ a bɛna olu gɛrɛfɛ bolo misɛmanw bɔ, janko a ka se ka deen caaman kɛ ka tɛmɛ fɔlɔ kan.

³ Aw saniyara ka ban ne ka kuma kɔsɔn ne ye o min fɔ aw ye.

⁴ Aw ye to ni ne ye i n'a fɔ ne bɛ n'aw ye cogo min na. Yiribolo tɛ se ka tigɛ ka to a kelen na ka se ka deen kɛ cogo min na a yɛrɛ ma, o cogo kelen na fana, n'aw ma to ne fɛ aw tɛ se ka foyi kɛ.

⁵ Ne ye ɛrɛzɛnsun ye, aw kɛra a bolow ye. Ni mɔgɔ min tora ne fɛ, ni ne fana kɛra a tigi fɛ, o tigi nin bɛna se ka baara caaman kɛ Ala ye, bari ni ne sababu tɛ, aw tɛ se ka foyi kɛ aw yɛrɛ ma.

⁶ Ni mɔgɔ min ma sɔn ka to ne fɛ, o tigi kɛra i n'a fɔ yiribolotigɛnin, u b'a fili kɛnɛma a bɛ ja, u b'a ta k'a bila tasuma na a bɛ jɛni.

⁷ Ni aw tora ne fɛ, ani ne ka kuma ka to aw kɔnɔ, aw bɛ fɛɛn min fɛ, aw k'o dali aw bɛna o sɔrɔ.

⁸ Ni aw ye baara caaman kɛ, o le b'a to n Faa bɛ bonya sɔrɔ, ani aw fana bɛ kɛ ne ka kalandenw ye.

⁹ N Faa ye ne kanu cogo min na, ne fana ye aw kanu ten. Aw ye to o kanuya kelen na.

¹⁰ Ni aw bɛ ne ka ciiw labato, aw fana bɛ to ne ka kanuya la, i n'a fɔ ne bɛ n Faa ka ciiw labato cogo min na ka to a ka kanuya la.

¹¹ “Ne y'o koo nunu fɔ aw ye janko aw ka nisɔndiya sɔrɔ ne fɛ, ani aw ka nisɔndiya kosɛbɛ.

¹² “Ne ka cii ye nin ye, aw ka nyɔgɔn kanu i n'a fɔ ne ye aw kanu cogo min na.

¹³ K'i yɛrɛ nii di i teriw kɔsɔn, kanuya wɛrɛ tɛ yen min ka fisa n'o ye.

¹⁴ Aw ye ne teriw ye ni aw bɛ sɔn ka ne ka cii labato.

¹⁵ Ne tɛ aw wele tugu ko baaradenw, bari baaraden tɛ a ka kuntigi ka koo kala ma. Ne b'aw wele n teriw, bari ne ye fɛɛn min bɛɛ mɛn n Faa fɛ, ne y'o bɛɛ yira aw la.

¹⁶ A ma kɛ ko aw le ye ne woloma dɛ, ne le ye aw woloma k'aw bila janko aw ka taa ka baara caaman kɛ, ani o baara nafa ka to, janko aw mana fɛɛn o fɛɛn dali n Faa fɛ ne tɔgɔ la, a k'o di aw ma.

¹⁷ Ne bɛ min nyini aw fɛ o ye nin ye: aw ka nyɔgɔn kanu.

U bɛna Yezu ka kalandenw kɔniya

¹⁸ “N'aw y'a ye ko dinyɛ mɔgɔw b'aw kɔniya, aw ka la a la ko u kɔnna ka ne le kɔniya.

¹⁹ N'aw tun kɛra dinyɛ ta ye, dinyɛ mɔgɔw tun bɛna aw kanu, nga aw ma kɛ dinyɛ ta ye. Ne le ye aw woloma ka bɔ dinyɛ mɔgɔw la, o la dinyɛ mɔgɔw b'aw kɔniya.

²⁰ Aw y'aw hakili jigi ne ka kuma nin na. N tun y'a fɔ aw ye ko baaraden man fisa n'a ka kuntigi ye. N'u ye ne tɔɔrɔ, u bɛna aw fana tɔɔrɔ. N'u ye ne ka kuma labato, u bɛna aw fana ta labato.

²¹ U bɛna o bɛɛ kɛ aw la ne kɔsɔn bari u ma ne cibaga lɔn.

²² Ni ne tun ma na ka kuma u fɛ, u tun tɛna jati kojugukɛlaw ye, nga sisan yɛrɛ u ka kojugu jatira ka ban.

²³ Mɔgɔ min bɛ ne kɔniya, o tigi bɛ n Faa fana kɔniya.

²⁴ Mɔgɔ wɛrɛ ma se ka koo minw kɛ, ni ne tun ma na k'o nyɔgɔn kɛ u cɛma, u ka kojugu nunu tun tɛna jati kojugu ye, nga u y'o bɛɛ ye, a bɛɛ n'a ta u bɛ ne ni n Faa kɔniya tugu.

²⁵ Nga kuma min fɔra u ka sariya sɛbɛ kɔnɔ fɔɔ o ka kɛ. A fɔra ko: ‘U ye ne kɔniya ni kuun t'a la.’

²⁶ “Ne bɛna Dɛmɛbaga min sɔrɔ n Faa fɛ k'a ci aw ma, ale min ye Tinyɛtigi ye, n'a nana tuma min na, a bɛna ne koo fɔ aw ye. O Nii min bɛ bɔ Ala fɛ.

²⁷ Aw fana, aw bɛna ne koo fɔ, bari aw tun bɛ ni ne ye kabini ne ka baara daminɛ na.