Yuhana 10 - LAYIDUKURA

Sagaw dɛndɛbaganyuman

¹ Yezu ko: “Tinyɛ tinyɛ na, ne b'a fɔ aw ye ko ni mɔgɔ min ma don ni saga wɛɛrɛ daa ye, fɔɔ ka pan ka don ni faan wɛrɛ ye, k'o tigi ye soon ye, benkannikɛla lo.

² Nga min bɛ don ni wɛɛrɛ daa ye, ale le ye saga nunu dɛndɛbaga ye.

³ Daa kɔlɔsibaga bɛ daa yɛlɛ a ye. Sagaw bɛ mɛnni kɛ a fɛ, minw y'a taw ye, a b'u tɔgɔw wele kelen kelen ka bɔ n'u ye kɛnɛma.

⁴ N'a bɔra n'a ta nunu bɛɛ ye kɛnɛma ka ban, a bɛ bila u nya, u bɛ tugu a kɔ, bari u b'a kaan lɔn.

⁵ U tɛna tugu mɔgɔ wɛrɛ kɔ fewu, u bɛna boli a nya yɛrɛ, bari u tɛ ale kaan lɔn.”

⁶ Yezu y'o talen nin la u ye ten. Nga, u m'a taayɔrɔ lɔn.

Yezu ye sagaw dɛndɛbaganyuman ye

⁷ Yezu y'a fɔ tugu ko: “Tinyɛ tinyɛ na, ne b'a fɔ aw ye ko sagaw bɛ don ni daa min ye wɛɛrɛ kɔnɔ, ne le ye o daa nin ye.

⁸ Minw bɛɛ kɔnna ne nya, olu bɛɛ ye soonw ni benkannikɛlaw le ye. Nga sagaw ma mɛnni kɛ u fɛ.

⁹ Ne le ye donda ye. Ni mɔgɔ min donna n'o daa ye, o tigi bɛna kisi. A bɛna don, ka bɔ, k'a ka dumuni sɔrɔ.

¹⁰ Soon kɔni tɛ na foyi kama ni sonyali ni fagali ni cɛnni tɛ. Ne nana waasa mɔgɔw ka kisi ani u ka hɛrɛ ka sabati.

¹¹ “Ne ye sagaw dɛndɛbaganyuman ye. Sagaw dɛndɛbaga nyanaman b'a nii di a ka sagaw kɔsɔn.

¹² Nga min b'u dɛndɛ sara kɔsɔn n'a ta tɛ sagaw ye, n'ale ye wara natɔ ye, a bɛ sagaw to, ka kɛnɛ minɛ. Wara bɛ minɛni kɛ, sagaw bɛ jɛnsɛn.

¹³ A bɛ boli bari warinyinila dama lo, a mako tɛ sagaw fagako la.

¹⁴ Ne ye sagaw dɛndɛbaga nyanaman ye. Ne bɛ n ka sagaw lɔn, n ka sagaw fana bɛ ne lɔn.

¹⁵ O cogo la, ne bɛ n Faa lɔn, n Faa fana bɛ ne lɔn. Ne bɛ n nii di n ka sagaw kɔsɔn.

¹⁶ Saga wɛrɛw bɛ ne fɛ minw tɛ wɛɛrɛ nin kɔnɔ. U bɛna na n kaan mɛn. Fɔɔ n ka na n'u ye, u bɛɛ bɛ kɛ kulu kelen ye, ani dɛndɛbaga kelen u kɔ.

¹⁷ N Faa bɛ n kanu, o la, ne bɛ n nii saraka, janko ka tila k'a sɔrɔ tugu.

¹⁸ Mɔgɔ si tɛ ne nii bɔ dɛ, ne yɛrɛ le b'a di. See bɛ ne ye k'a di, see bɛ ne ye k'a minɛ tugu. N Faa y'o le nyini ne fɛ.”

¹⁹ O kuma nunu nana ni farali ye Zuwifuw cɛma tugu.

²⁰ U caaman tun b'a fɔra ko: “Jinatɔ lo, a kuun wilila, a lamɛnkun?”

²¹ Dɔw ko: “A ka kuma nunu tɛ jinatɔ kumaw ye han! Jina bɛ se ka finyɛntɔ nyaa yɛlɛ wa?”

Zuwifuw bɛ ban Yezu la

²² Alabatosoba saniya nyanagwɛ tun bɛ kɛra Zeruzalɛmu, nɛnɛ tuma na.

²³ Alabatosoba donda yɔrɔ min bɛ wele ko Solomani ka bolonda, Yezu tun bɛ taamataamana yen.

²⁴ Zuwifuw taar'a lamini k'a nyininga ko: “I bɛ waati jumɛn le kɔnɔ ka sɔrɔ ka tinyɛ fɔ an ye? N'o y'a sɔrɔ i ye Ala ka Mɔgɔ wolomanin nin ye, a fɔ an ye ka gwɛ.”

²⁵ Yezu y'u jaabi ko: “Ne y'a fɔ aw ye ka ban, nga aw tɛ lara n la. O bɛɛ n'a ta, ne bɛ kɛwali minw kɛ n Faa tɔgɔ la, o bɛ ne ka koo yira fana.

²⁶ Aw tɛ la n la bari aw tɛ n ka sagaw dɔw ye.

²⁷ Ne bɛ n ka sagaw lɔn, u bɛ mɛnni kɛ n fɛ, u bɛ tugu ne kɔ.

²⁸ Ne fana bɛ hɛrɛ banbali di u ma. U tɛna halaki abada, mɔgɔ si fana tɛ se k'u bɔsi n na.

²⁹ N Faa min y'u di ne ma, ale ka bon ni fɛɛn bɛɛ ye. O mɔgɔ tɛ yen min bɛ se ka fɛɛn bɔsi n Faa bolo.

³⁰ Ne ni n Faa ye kelen ye.”

³¹ Zuwifu nunu wilila tugu ka kabakuruw cɛ k'u b'a bon.

³² O la, Yezu y'a fɔ u ye ko: “Ne ye konyuman caaman kɛ n Faa barika la, aw y'u ye. Aw b'a fɛ ka ne bon olu jumɛn kama?”

³³ U y'a jaabi ko: “Anw m'a fɔ ko an b'i bon konyuman kɛnin kama, nga anw b'a fɛ k'i bon bari i ye kuma fɔbali fɔ. Ele adamadentɔ, i b'a fɔ ko i ye Ala ye!”

³⁴ Yezu y'u jaabi ko: “Ala ko: ‘Aw ye ala dɔw ye.’ O ma sɛbɛn aw ka sariyasɛbɛ kɔnɔ wa?

³⁵ Ala ye min fɔ, o ye kuma yɛlɛmabali ye. A tun bɛ kumana mɔgɔ le fɛ, n'a y'a fɔ u ye ko: ‘Aw ye ala dɔw ye’,

³⁶ Ala ye mɔgɔ min woloma k'a ci dinyɛ na, aw ko ale ma: ‘I ye kuma fɔbali fɔ’. Bari ne y'a fɔ ko ne ye Ala Deen ye.

³⁷ N'o y'a sɔrɔ ni ne tɛ n Faa ka kɛwaliw kɛ, aw kana la ne la.

³⁸ Nga ne b'o kɛra, o bɛɛ n'a ta, aw tɛ lara ne la. Ayiwa, n bɛ baara minw kɛra, aw ye la olu la, janko aw ka se k'a lɔn ko n Faa bɛ ni ne ye, ko ne bɛ ni n Faa ye.”

³⁹ O la, u tun b'a fɛ k'a minɛ tugu nga a sera k'a yɛrɛ bɔsi u bolo.

⁴⁰ Zan tun ye mɔgɔ batizeli daminɛ Zurudɛn baa kɔ yɔrɔ min na, Yezu segira ka taa to o yɔrɔ la.

⁴¹ Mɔgɔ caaman taar'a fɛ. U tun bɛ to k'a fɔ ko: “Zan kɔni ma kabakow kɛ, nga a ye min bɛɛ fɔ cɛɛ nin koo la, a bɛɛ kɛra tinyɛ ye.”

⁴² Mɔgɔ caaman y'u jigi la Yezu kan o yɔrɔ la yen.