Yuhana 1 - LAYIDUKURA

Kuma kɛra mɔgɔ ye

¹ Fɔlɔfɔlɔ, sanni dinyɛ ka dan, Kuma tun bɛ yen, o Kuma nin tun bɛ ni Ala ye, o Kuma nin tun ye Ala yɛrɛ ye.

² A tun bɛ ni Ala ye fɔlɔfɔlɔ.

³ Fɛɛn bɛɛ danna ale barika la. O fɛɛn si tɛ yen min ma dan a barika la.

⁴ Nii tun bɛ sɔrɔ ale barika la, o min bɛ yeelen bɔ adamadenw ye.

⁵ O yeelen nin bɔra dibilamɔgɔw ye. Nga u ma sɔn o ma.

⁶ Ala ye cɛɛ dɔ ci min tɔgɔ ko Zan.

⁷ Ale nana waasa ka kɛ yeelen nin seere ye k'a koo fɔ mɔgɔw ye janko u bɛɛ ka la yeelen nin na ale sababu la.

⁸ Ale Zan tun tɛ yeelen nin ye, nga a nana waasa ka yeelen le koo fɔ.

⁹ O yeelen nin le tun ye yeelen yɛrɛ yɛrɛ ye, min nana dinyɛ na ka kɛnɛ bɔ mɔgɔw bɛɛ ye.

¹⁰ A tun bɛ dinyɛ na, ale le ye dinyɛ dan, nga dinyɛ mɔgɔw banna a la.

¹¹ A nana jigi a yɛrɛ ka soo, a ka siya banna a la.

¹² Nga minw sɔnna a ma, ka la a la, a ye see di olu ma u kɛra Ala deenw ye.

¹³ O minw ma sɔrɔ adamaden joli n'a fari sababu la. Nga u sɔrɔla Ala yɛrɛ sababu la.

¹⁴ O kuma nin kɛra mɔgɔ ye, ka na sigi n'an ye, tinyɛtigi ni makaritigi lo. An y'a ka nɔɔrɔ ye. Dencɛ kelen b'o min sɔrɔ a Faa fɛ.

¹⁵ Zan y'a koo fɔ ko: “Ne tun ye min koo fɔ ko a bɛna na ne kɔfɛ, ale le ye nin ye. A ka bon ni ne ye, bari sanni ne ka wolo, ale tun bɛ yen.”

¹⁶ Anw bɛɛ ye duba caaman sɔrɔ a ka nɛɛma barika la.

¹⁷ Ala ka sariya sɔrɔla Musa sababu la. Nga Yezu Krista le nana ni Ala ka nɛɛma, n'a ka tinyɛ ye.

¹⁸ Mɔgɔ si ma deli ka Ala ye abada, nga a Deen kelenpe, min ye Ala ye fana, ale n'a Faa Ala bɛ nyɔgɔn fɛ, ale le nana Ala cogo yira an na.

Zan batizelikɛla ye seereya min kɛ

¹⁹ Zuwifuw tun ye sarakalasebaga dɔw ni Levi kɔmɔgɔ dɔw ci ka bɔ Zeruzalɛmu ka taa Zan sɛgɛrɛ tuma min na, u y'a nyininga ko: “E ye jon ye?” Zan y'u jaabi ni kuma min ye, o filɛ.

²⁰ A ma sigasiga, a y'a fɔ ka gwɛ u ye ko: “Ne tɛ Ala ka Mɔgɔ wolomanin ye dɛ.”

²¹ U y'a nyininga ko: “O tuma na, e ye jon ye? E ye Eli ye wa?” A y'u jaabi ko: “Ne tɛ Eli ye.” U ko: “E ye kiraba nin ye wa?” A ko ayi.

²² O tuma na u y'a fɔ a ye ko: “E ye mɔgɔ min ye, o fɔ an ye, waasa an ka se ka taa o fɔ an cibagaw ye. Ɔnhɔn. O tuma na, e ye jon ye?”

²³ A ye kira Ezayi ka kuma ta k'u jaabi ko: “Mɔgɔ min bɛ pɛrɛnna kongokolon kɔnɔ ko: ‘Aw ka siratilennin labɛn Matigi ye,’ ” a ko o y'ale Zan ye.

²⁴ Ciraden nunu tun ye Farizinyɛw ye.

²⁵ U ye Zan nyininga tugu ko: “Ni e tɛ Ala ka Mɔgɔ wolomanin nin ye, ni e tɛ Eli ye, walima kiraba, e do bɛ mɔgɔw batize mun na?”

²⁶ A y'u jaabi ko: “Ne kɔni bɛ mɔgɔw batize jii la. Nga mɔgɔ dɔ b'aw cɛma, aw m'ale lɔn,

²⁷ ale bɛ na ne kɔ, ne kuun ka dɔgɔ k'a ka sanbara juru foni.”

²⁸ O koo nunu bɛɛ kɛra Betani faan fɛ Zurudɛn baa kɔfɛ, Zan tun bɛ mɔgɔw batizera yɔrɔ min na.

Ala ka Sagaden Yezu

²⁹ O dugusagwɛ, Zan ye Yezu natɔ ye a fɛ, a y'a fɔ ko: “Ala ye Sagaden min di mɔgɔw ka kojuguw yafa kama, o filɛ nin ye.

³⁰ N tun bɛ ale le koo fɔra ko mɔgɔ dɔ bɛna na ne kɔ min ka bon ni ne ye, bari sanni ne ka wolo, ale tun bɛ yen.

³¹ Ne yɛrɛ tun t'a lɔn, ne nana ka to ka mɔgɔw batize jii la, waasa Isirayɛlidenw k'a lɔn.”

³² Zan y'a fɔ tugu ko: “Ne ye Nii Senuman jigitɔ ye a kan ka bɔ sankolo la, i na fɔ tubanin, ka to a kan.

³³ Ne tun t'a lɔn, nga min ye ne ci ka na mɔgɔw batize jii la, ale le y'a fɔ n ye ko ni ne ye Nii Senuman jigitɔ ye ka sigi min kan, k'o tigi le bɛna mɔgɔw batize ni Nii Senuman ye.

³⁴ Ne y'o ye, o la ne ko ale le ye Ala Deen ye.”

Kalanden fɔlɔw

³⁵ O dugusagwɛ, Zan tun b'o yɔrɔ kelen nin na, n'a ka kalandenw mɔgɔ fila ye.

³⁶ A ye Yezu tɛmɛtɔ ye, a y'a fɔ ko: “Ala ka sagaden filɛ nin ye.”

³⁷ A ka kalanden fila nunu y'o mɛn minkɛ, u tugura Yezu kɔ.

³⁸ Yezu y'a nyaa yɛlɛma k'u ye a kɔ, a y'u nyininga ko: “Aw bɛ mun le nyinina?” U y'a jaabi ko: “Arabi, e ka yɔrɔ bɛ min?” (Arabi kɔrɔ ko karamɔgɔ.)

³⁹ A ko: “Aw ye na, aw bɛn'a ye.” U taara n'a ye k'a ka yɔrɔ ye. Wuladafɛ tun lo. U tora n'a ye o loon na.

⁴⁰ Mɔgɔ fila minw tun ye Zan ka kuma mɛn ka tugu Yezu kɔ, u kelen tun ye Simɔn Piyɛri dɔgɔcɛ Andere ye.

⁴¹ A sinna ka ta'a fɔ a kɔrɔcɛ Simɔn ye ko: “Anw ye Krista ye”, o kɔrɔ ko Ala ka Mɔgɔ wolomanin nin.

⁴² U taara Yezu fɛ. Yezu y'a filɛ furututu k'a fɔ a ye ko: “E ye Zan dencɛ Simɔn ye. An bɛna i wele ko Sefasi”, girɛkikan na, o ye Piyɛri ye.

⁴³ O dugusagwɛ, Yezu y'a ;naniya ta ko a bɛ taa Galile mara la. A ye Filipi ye, k'a fɔ a ye ko: “Tugu ne kɔ.”

⁴⁴ Filipi ni Andere ani Piyɛri nunu bɛɛ tun ye Bɛtisayidakaw ye.

⁴⁵ Filipi ye Natanayɛli kunbɛn k'a fɔ a ye ko: “Mɔgɔ min koo fɔnin bɛ Musa ka sariya sɛbɛ ni kiraw ka sɛbɛw kɔnɔ, anw y'a ye. Yezu lo, Yusufu dencɛ, ka bɔ Nazarɛti.”

⁴⁶ Natanayɛli ko: “Ka bɔ Nazarɛti? Fɛnnyuman bɛ se ka bɔ Nazarɛti wa?” Filipi y'a jaabi ko: “E ka na sa, e bɛn'a ye.”

⁴⁷ Yezu ye Natanayɛli natɔ ye a fɛ, a y'a fɔ ko: “Nin ye Isirayɛliden yɛrɛ ye tigitigi. Nanbaranmɔgɔ tɛ.”

⁴⁸ Natanayɛli ko: “I ye ne lɔn min?” Yezu y'a jaabi ko: “Yan ni Filipi k'i wele, ne nyaa tun b'i la torosun kɔrɔ.”

⁴⁹ Natanayɛli y'a jaabi ko: “Karamɔgɔ, i ye Ala Deen ye, i ye Isirayɛli ka masa ye.”

⁵⁰ Yezu ko a ma: “Ne y'a fɔ ko ne y'i ye torosun kɔrɔ minkɛ o la i lara ne la kɛ. I bɛna fɛɛn wɛrɛw ye minw bɛna tɛmɛ nin kan.”

⁵¹ Yezu y'a fɔ tugu ko: “Tinyɛ tinyɛ na, aw bɛna sankolo dayɛlɛnin ye ka Ala ka mɛlɛkɛ yɛlɛtɔw n'u jigitɔw ye Mɔgɔ Dencɛ kan.”