Yirari 9 - LAYIDUKURA

Buru duurunan fiyɛta

¹ O kɔ, mɛlɛkɛ duurunan y'a ka buru fiyɛ, n ye lolo dɔ ye min bɔra ka ben dugukolo kan. Dingɛjugu daa konnigɛ dira ale ma.

² A y'a dayɛlɛ dɔrɔn, sisiba dɔ bɔra i n'a fɔ waga jɛnitɔ sisi. O sisi nin ye tile nyaa bɛɛ dibi, ka yɔrɔ bɛɛ fin.

³ Tɔɔnw bɔra o sisi nin na ka dugukolo bɛɛ fa. U ka fariya ni bunteni ta bɛɛ ye kelen ye.

⁴ A fɔra u ye k'u kana maga biin na, ni yiriw la. Ko fɛɛn o fɛɛn bɛ furaburu bɔ, k'u kana foyi kɛ o si la. Ko Ala ka taamasinyɛ tɛ mɔgɔ minw teen na, k'u ka sin olu le ma.

⁵ A fɔra u ye fana, k'u kana u faga, ko k'u tɔɔrɔ dɔrɔn kalo duuru kɔnɔ. N'u ye mɔgɔ cin, o dimi ni bunteni ta bɛɛ ye kelen ye.

⁶ O waati la, mɔgɔw bɛna saya nyini ka dɛsɛ. U bɛna koo bɛɛ kɛ janko u bɛ sa, nga u tɛna sa.

⁷ Tɔɔn nunu bɔnin bɛ soow fɛ, u ye minw labɛn kɛlɛ kama. A kɛra i n'a fɔ sanu fugulan le b'u kuun na. U nyada bɔnin bɛ mɔgɔ ta fɛ.

⁸ U kunsigi bɛ i n'a fɔ muso ta. U nyiin bɛ i n'a fɔ jara ta.

⁹ A kɛra i n'a fɔ nigɛ le donnin bɛ u disi la. U gamanw mankan bɔnin bɛ kɛlɛkɛso caaman bolikan fɛ ni wotorow ye.

¹⁰ Kuu b'u la, o kuuw bɔnin bɛ bunteni ta fɛ. Mɔgɔw tɔɔrɔfɛn b'o kuu nunu kɔnɔ, o min bɛ se ka tɔɔrɔ lase mɔgɔw ma kalo duuru kɔnɔ.

¹¹ Mɛlɛkɛ min ye Dingɛjugu nin kuntigi ye, ale le ye u ka masacɛ ye. A tɔgɔ ko Abadɔn eburukan na. Girɛkikan na, a tɔgɔ ko Apoliyɔn. O kɔrɔ ko Halakibaga.

¹² Ayiwa, bɔnɛ fɔlɔ tɛmɛna, fila wɛrɛ le bɛna na sisan.

Buru wɔɔrɔnan fiyɛta

¹³ O kɔ, mɛlɛkɛ wɔɔrɔnan y'a ka buru fiyɛ. Sarakabɔlan sanulaman min bɛ Ala nyafɛ, ne ye kumakan dɔ mɛn o nɔnkɔnw na

¹⁴ n'a b'a fɔra mɛlɛkɛ nin ye, buru bɛ min bolo ko: “Mɛlɛkɛ naani minw sirinin bɛ Efarati baji daa la, u foni ka bila.”

¹⁵ O mɛlɛkɛ nunu tun labɛnna ka bila o waati nin kama, o loon nin na, o kalo kelen nin kɔnɔ, o saan nin na, waasa ka mɔgɔw tilan sabanan faga. U labilara.

¹⁶ Ne y'u ka kɛlɛbolo mɔgɔda mɛn, k'u ye sotigi miliyɔn kɛmɛ fila ye.

¹⁷ O sotigi nunu ka yɛrɛtangafɛn minw tun bɛ u la, u wulennin tun lo fɔɔ ka kɛ bulaman ni nɛrɛmuguman ye. Soo nunu kungolow tun bɛ i n'a fɔ jara ta, tasuma ni sisi ani kiribi le tun bɛ bɔ u daaw la.

¹⁸ Tasuma, ni sisi ani kiribi min tun bɛ bɔ u daaw la, o balawu nunu ye adamadenw tilan sabanan bɛɛ faga.

¹⁹ Soo nunu ka sebagaya bɛ bɔ u daaw, n'u kuuw le kɔnɔ. O kuu nunu tun bɛ i n'a fɔ saaw. O b'u kuunw le kɛ ka adamadenw tɔɔrɔ.

²⁰ Mɔgɔ minw tora n'u ma sɔrɔ ka sa balawu nin na, sanni u ka nimisa k'u ka kɛwalijuguw dabila, ayi. U tora ka jinaw bato, ka joow sɔn. O joow tun ye sanu ye, dɔw warigwɛ, dɔw zira, dɔw kabakuru, dɔw yirikuru, k'a sɔrɔ o batofɛn nunu tɛ yeli kɛ, u tɛ mɛnni kɛ, u tɛ se ka taama.

²¹ Mɔgɔ nunu ma sɔn k'u ka mɔgɔfaga ni subagaya ani kakalaya ni sonyaliw dabila.