Yirari 6 - LAYIDUKURA

Sagaden bɛ taamasinyɛ wɔɔrɔ bɔ

¹ Ayiwa, tuma min na ne y'a ye Sagaden ye taamasinyɛ fɔlɔ bɔ sɛbɛ nin kan, ne ye nimanfɛn naani nunu kelen pɛrɛnkan mɛn i n'a fɔ sanpɛrɛn. A y'a fɔ ko: “Na yan!”

² Ne ko n bɛ filɛli kɛ, ne ye soo gwɛman dɔ ye. Mɔgɔ min tun siginin b'a kan, kala tun b'o bolo. A gwɛrɛla, u ye masafugulan d'a ma. A bɔra ni setigiya ye, a bɛna see sɔrɔ.

³ O kɔ, Sagaden ye taamasinyɛ filanan bɔ, ne ye nimanfɛn filanan pɛrɛnkan mɛn ko: “Na yan!”

⁴ O tuma na, soo wɛrɛ bɔra, ale wulennin tun lo. Mɔgɔ min tun yɛlɛnin b'a kan, see dira ale ma ko a ka balawu le wili dinyɛ na waasa mɔgɔw ka nyɔgɔn fagafaga. Murujan dir'a ma.

⁵ Sagaden ye taamasinyɛ sabanan bɔ tuma min na, n ye nimanfɛn sabanan pɛrɛnkan mɛn ko: “Na yan.” Ne ye filɛli kɛ, n y'a ye soo finman bɔra. Mɔgɔ min tun b'a kan, kilo tun b'o bolo.

⁶ N ye kumakan dɔ mɛn ka bɔ nimanfɛn naani nunu cɛma ko: “I ka malo suma sɔngɔgwɛlɛn na, kilo kelen, deniye wari kelen. Nyɔɔ kilo saba sɔngɔ ye deniye wari kelen ye. I kana maga tulu ni duvɛn na.”

⁷ Sagaden ye taamasinyɛ naaninan bɔ tuma min na, n ye nimanfɛn naaninan pɛrɛnkan mɛn ko: “Na yan.”

⁸ N ye filɛli kɛ, n y'a ye soo binkɛnɛman bɔra. Mɔgɔ min tun b'a kan, ale tɔgɔ ko Saya. Lahara tugunin tun b'a kɔ. See dira olu ma waasa ka dinyɛ mɔgɔw tilan naaninan faga ni murujan ye, ni kɔngɔ, ni banajuguw, ani kongosogo farimanw ye.

⁹ Sagaden ye taamasinyɛ duurunan bɔ tuma min na, u tun ye mɔgɔ minw faga Ala ka kuma, n'u ka seereya kɔsɔn, ne ye olu ye sarakabɔlan jukɔrɔ.

¹⁰ Olu y'u kaan kɔrɔ ta k'a fɔ ko: “Matiginyuman, e min tilennin lo, ani e bɛ tinyɛ fɛ, e bɛ waati jumɛn le kɔnɔna ka dinyɛ mɔgɔw kiti k'u nyaa gwan? Bari u tun ye anw faga.”

¹¹ O la, fani gwɛman dira u kelen kelen bɛɛ ma, k'a fɔ u ye k'u ka munyu dɔɔni, sanni u ka baarakɛnyɔgɔnw, n'u balimaw bɛɛ ka na, u bɛna olu minw faga i n'a fɔ olu fana.

¹² Sagaden ye taamasinyɛ wɔɔrɔnan bɔ tuma min na, dugukolo yɛrɛyɛrɛla kosɛbɛ. Tile finna kirikiri. Kalo wulenna i n'a fɔ joli.

¹³ Lolow burunna duguma i n'a fɔ fɔnyɔba bɛ toro mɔbali burun cogo min na.

¹⁴ Sankolo sinna ka meleke ka bɔ yen i n'a fɔ mɔgɔ bɛ dɛbɛ meleke cogo min na. Kuluw ni kɔgɔji cɛma dugukoloninw bɛɛ tununa ka bɔ u nɔɔ na.

¹⁵ Ayiwa, masaw ni dugutigiw ni sɔlidasi kuntigiw, ani nafolotigiw, ni setigiw ani adamaden tɔw bɛɛ, jɔɔn fara hɔrɔnw kan, bɛɛ bɛ bolila ka dingɛ ni kuluwow yɔrɔ nyini,

¹⁶ ka to k'a fɔ kuluw ni faraw ye ko: “Aw ye ben an kan, aw ye an sutura waasa min siginin bɛ masasigilan kan, o kana an ye, ani ka kisi Sagaden ka dimi ma!

¹⁷ O lonba le sera, jon yɛrɛ bɛ se ka lɔ?”